ބްރަޓިސްލާވާ، ސްލޮވާކިއާ (މާޗް 6) - އުމުރުން 11 އަހަރުގެ ޔޫކްރެއިން ފިރިހެން ކުއްޖަކު ޕްލާސްޓިކް ކޮތަޅަކާއި ޕާސްޕޯޓާއި އަތުގައި ލިޔެފައިވާ ފޯނު ނަންބަރާ އެކު ބޯޑަރު ހުރަސްކޮށް ސްލޮވާކިއާއަށް އެތެރެވެއްޖެ އެވެ.
ސްލޮވާކިއާ ފުލުހުންގެ ތަރުޖަމާނު ޑެނީސާ ބްރްޑްޔޯވާ ވިދާޅުވީ ޔޫކްރެއިންގެ ޒަޕޮރިއްޒިޒިއާއިން ފެށިގެން އެ ކުއްޖާ އެކަނު ދަތުރު ކުރީ ބެލެނިވެރިންނަށް ގައުމު ދޫކޮށް ދެވެން ނެތުމުން ކަމަށެވެ.
ހޮނިހިރު ދުވަހު ބޯޑަރު ހުރަސްކުރި ކުއްޖާއަށް އެހީވީ ވޮލަންޓިއަރުންނެވެ. އެ ކުއްޖާގެ މަންމަ ޔޫކްރެއިންގައި މަޑު ކުރަން ޖެހުނީ ކުއްޖާގެ ނުކުޅެދޭ މާމަ ގޮވައިގެން ދަތުރު ކުރެވެން ނެތުމުންނެވެ. އެހެންވެ، ސްލޮވާކިއާއަށް ދަތުރު ކުރާ ރޭލުގައި އެ ކުއްޖާ އެކަނި ފޮނުވާލީ އެވެ.
"އަޅުގަނޑުގެ ދަރިފުޅުގެ ފުރާނަ ސަލާމަތްކޮށްދިނީތީ ވަރަށް ބޮޑަށް ޝުކުރިއައްޔާ،" އެ ކުއްޖާގެ މަންމަ ޔޫލިއާ ޕިސެޓްސްކާޔާ ފޭސްބުކްގައި ޕޯސްޓުކުރި ވީޑިއޯއެއްގައި ބުންޏެވެ.
"ތިޔަ ކުޑަ ގައުމުގައި ދިރިއުޅެނީ ބޮޑެތި ހިތްތަކެއްގެ ވެރި ބަޔަކު،" ސްލޮވާކިއާއަށް ޝުކުރު އަދާ ކުރަމުން އޭނާ ބުންޏެވެ.
ސްލޮވާކިއާގެ ފުލުހުން ފޭސްބުކްގައި ބުނީ ފިރިހެން ކުއްޖާގެ "ހިނިތުންވުމާއި، ހިތްވަރާއި، ބިރު ކުޑަކަން" ފެނިފައި ހުރިހާ އެންމެންގެ ލޯބި ލިބެމުންދާ ކަމަށެވެ.
ވޮލަންޓިއަރުން ވަނީ ސްލޮވާކިއާގައި ދިރިއުޅޭ އެ ކުއްޖާގެ އާއިލާގެ ބައެއް މެމްބަރުންނަށް ގުޅައި، ކުއްޖާ ހަވާލުކޮށްފަ އެވެ. އެ މީހުން ދިރިއުޅެނީ ވެރިރަށް ބްރަޓިސްލާވާގަ އެވެ.
