ވޮޝިންޓަން، އެމެރިކާ (މާޗް 6) - ރަޝިއާ އާއި ޔޫކްރެއިނުން ކުރަމުންދާ ހަނގުރާމަ އިތުރަށް ގޯސްވާ ނަމަ ލިބޭނެ އިގްތިސާދީ ގެއްލުން ވަރަށް ބޮޑު ކަމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ބުނެފި އެވެ.
އައިއެމްއެފުން ނެރުނު ބަޔާނެއްގައި ބުނީ އިގްތިސާދަށް ކުރާނެ އަސަރު "ޔަގީންކަމާ އެކު" އަންދާޒާ ނުކުރެވުނު ނަމަވެސް، މިހާރު ވެސް "ވަރަށް ސީރިއަސް" ބަދަލުތަކެއް ދުނިޔޭގެ އިގްތިސާދަށް އައިސްފައިވާ މަންޒަރު ފެންނަ ކަމަށެވެ.
އެގޮތުގެ ސާފު ނުކުރާ ތެޔޮ ފީފާއެއްގެ އަގު 120 ޑޮލަރަށް އަރާފައިވާ އިރު، ހުރިހާ ގައުމެއްގައި ވެސް ހަކަތަ އާއި ތަކެތީގެ އަގު ދަނީ އުފުލެމުންނެވެ. އެ ބަދަލުގެ އަސަރު އެހާ ބޮޑަށް ކުރަމުން ދަނީ ކޮވިޑާ ގުޅިގެން އިގްތިސާދުތައް ފުރިހަމައަށް ރިކަވާވެފައި ނުވާތީ އެވެ.
"ހަނގުރާމަ ގޯސްވާ ނަމަ، އިގްތިސާދީ ގެއްލުން ވަރަށް ބޮޑު ވާނެ،" ހަނގުރާމައާ ގުޅިގެން އައިއެމްއެފްގެ އެކްޒެކްޓިވް ބޯޑުން ހުކުރު ދުވަހު ބޭއްވި ބައްދަލުވުމަކަށް ފަހު ނެރުނު ބަޔާނުގައި ބުންޏެވެ.
"ތަކެތީ އަގަށް އަންނަ ލޮޅުމުގެ އަސަރު މުޅި ދުނިޔެއަށް ކުރާނެ. ވަކިން ހާއްސަކޮށް އާމްދަނީ މަދު ގޭބިސީތަކަށް ކުރާނެ އަސަރު ވަރަށް ބޮޑު."
"ރަޝިއާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ވެސް ދުނިޔޭގެ އިގްތިސާދާއި މާލީ މާކެޓަށް ބޮޑު އަސަރެއް ކުރާނެ. އަދި ރަޝިއާގެ އިގްތިސާދަށް އަންނަ ބަދަލާ އެކު އެހެން ގައުމުތަކަށް ވެސް އަސަރު ކުރާނެ."
އައިއެމްއެފުން ބުނީ ތަކެތީގެ ދަތިކަމާއި ސަޕްލައިއަށް ހުރަސް އެޅޭނެ ކަމަށް ބޮޑަށް ބެލެވެނީ ޔޫކްރެއިނާއި ރަޝިއާއާ ގާތް އިގްތިސާދީ ގުޅުމެއް އޮންނަ ގައުމުތަކަށް ކަމަށެވެ.
ރަޝިއާގެ ސިފައިން ޔޫކްރެއިނަށް އަރައި ހަމަލާ ދޭން ފެށިތާ 10 ދުވަސް ފާއިތުވެފައިވާ އިރު، ހަނގުރާމަ އިތުރަށް ގޯސްވަމުންދާ ކަމުގެ ނިޝާންތައް ދަނީ ފެންނަމުންނެވެ. އެގޮތުން ޔޫކްރެއިންގެ އެކި ހިސާބުތަކަށް ދަނީ ބޮން އަޅަމުންނެވެ.
އދ. އިން ލަފާކުރާ ގޮތުގައި 1.4 މިލިއަނަށް ވުރެ ގިނަ މީހުން ވަނީ ހަނގުރާމައިގެ ސަބަބުން ރެފިއުޖީންނަށް ބަދަލުވެފަ އެވެ.
