މޮސްކޯ، ރަޝިއާ (މާޗް 5) - ޔޫކްރެއިންގެ މަތިން އުދުހުން މަނާ "ނޯ ފްލައި ޒޯނެއް" ގާއިމް ކުރަން މަސައްކަތް ކުރާ ކޮންމެ ގައުމަކީ ހަނގުރާމައިގެ ބައިވެރިއެއްގެ ގޮތުގައި ދެކޭނެ ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
"އެ ދިމާލަށް މިސްރާބް ހުރި ކޮންމެ ހަރަކާތަކީ ހަތިޔާރާ އެކު ހިންގާ ހަމަނުޖެހުމެއްގައި އެ ގައުމަކުން ބައިވެރިވުން ކަމުގައި އަޅުގަނޑުމެން ދެކޭނަން،" ރަޝިއާގެ އެއާލައިން އެއިރޯފްލޮޓުގެ މުވައްޒަފުންނާ އެކު ބޭއްވި ބައްދަލުވުމަކަށް ފަހު ޕުޓިން ވިދާޅުވި އެވެ.
އޭގެ އިތުރުން ނޯ ފްލައި ޒޯނެއް ގާއިމް ކުރުމަކީ "ޔޫރަޕާއި މުޅި ދުނިޔެއަށް ވެސް ބިޔަ، ނުރައްކާތެރި ނަތީޖާތަކެއް ނުކުންނާނެ" ކަމެއްގެ ގޮތުގައި ޕުޓިން ސިފަކުރެއްވި އެވެ.
ރަޝިއާގައި މާޝަލް ލޯ ތަންފީޒު ކުރަން އުޅޭ ކަމަށް ފެތުރޭ ހަބަރުތައް ޕުޓިން ދޮގުކުރެއްވި އެވެ. ހުޅަނގުގެ ނޫސްތަކުން ބުނާ ގޮތުގައި މާޝަލް ލޯ ތަންފީޒު ކުރަން އުޅޭތީ ރަޝިއާގެ ގިނަ ބަޔަކު ދަނީ ބޯޑަރު ހުރަސްކޮށް ފިންލޭންޑަށް ހިޖުރަ ކުރަން މަސައްކަތް ކުރަމުންނެވެ.
"މާޝަލް ލޯ ތަންފީޒު ކުރަން ވާނީ ހަމައެކަނި ބޭރުގެ ބާރަކުން ގައުމަށް އަރައި ގެއްލުމެއް ދޭ ނަމަ. މި ވަގުތު އަޅުގަނޑުމެން އެފަދަ ކަމެއް ތަޖުރިބާ ކުރާކަށް ނުޖެހޭ އަދި އަޅުގަނޑުގެ އުއްމީދަކީ އެކަން އެގޮތަށް ދެމިއޮތުން،" ޕުޓިން ވިދާޅުވި އެވެ.
