ލަންޑަން، އިނގިރޭސިވިލާތް (މާޗް 5) - ރަޝިއާގެ މަހުޖަނުންނަށް ފިޔަވަޅު އެޅުން ފަސޭހަކޮށް، ޔޫރަޕިއަން ޔޫނިއަން (އީޔޫ) އާއި އެމެރިކާއާ އެއް ގޮތް ފިޔަވަޅުތައް އެޅޭނެ މަގު ފަހިކުރަން އިނގިރޭސިވިލާތުން ނިންމައިފި އެވެ.
ރަޝިއާގެ މަހުޖަނުންނާ ދެކޮޅަށް އިނގިރޭސިވިލާތުން އެކަށީގެންވާ ފިޔަވަޅު ނާޅާ ކަމަށް ބުނެ ފާޑުކިޔުން ވަނީ އަމާޒުވެފަ އެވެ. ރަޝިއާގެ ގިނަ މަހުޖަނުން ވަނީ ލަންޑަންގެ ރިއެލް އެސްޓޭޓް ވިޔަފާރީގައި ބޮޑެތި އިންވެސްޓްމަންޓްތައް ކޮށްފަ އެވެ.
އިނގިރޭސި ސަރުކާރުން ނެރުނު ބަޔާނެއްގައި ބުނީ އިގްތިސާދީ ކުށްތަކާ ބެހޭ ބިލަށް ގެންނަ އިސްލާހުތަކެއްގެ ދަށުން "ކޮރަޕްޓް މަހުޖަނުންނާ މެދު ފިޔަވަޅު އަޅައި ރަޝިއާގެ ރައީސް ލެޑިމިއަ ޕުޓިންގެ ސަރުކާރަށް ޕްރެޝަރު ބޮޑު ކުރެވޭނެ" ކަމަށެވެ.
އިސްލާހުތަކާ އެކު މިހާރަށް ވުރެ "ހަރުކަށި އަދި އަވަސް" ފިޔަވަޅުތައް އެޅޭނެ ކަމަށް ޓްރެޝަރީގެ އިގްތިސާދާ ބެހޭ ސެކެޓްރީ ޖޯން ގްލެން ހޮނިހިރު ދުވަހު ވިދާޅުވި އެވެ.
އޭގެ އިތުރުން އިނގިރޭސިވިލާތާ އެކުވެރި އެމެރިކާ، ކެނެޑާ އަދި އީޔޫއިން އަޅާފައިވާ ފިޔަވަޅުތަކާ އެއް ގޮތް ފިޔަވަޅު އަޅަން ފަސޭހަވާނެ ކަމަށް ސަރުކާރުން ނެރުނު ބަޔާނުގައި ފާހަގަކޮށްފައިވެ އެވެ.
އިނގިރޭސިވިލާތުގައި ބޭރުގެ ކުންފުނިތައް ހިންގާ ވިޔަފާރިން ފައިދާވާ ފަރާތްތައް ރަޖިސްޓްރީ ކުރަން ލިބޭ މުއްދަތު 18 މަހުން ހަ މަހަށް ކުޑަ ކުރަން އިސްލާހުތަކުގެ ތެރޭގައި ހިމެނެ އެވެ. އޭގެ ބޭނުމަކީ ރިއެލް އެސްޓޭޓް ވިޔަފާރީގެ ތެރެއިން މަނީ ލޯންޑާ ކުރުމަށް ހުރަސް އެޅުމެވެ.
އިނގިރޭސި ސަރުކާރުން ބޭނުން ވަނީ ވީ އެންމެ އަވަހަކަށް ބިލް ފާސްކޮށް ގާނޫނަކަށް ހެދުމަށެވެ. އިނގިރޭސިވިލާތުން މިހާރު ވެސް ވަނީ ރަޝިއާގެ މަހުޖަނުންނާ ދެކޮޅަށް ފިޔަވަޅުތަކެއް އަޅާފަ އެވެ.
