މޮސްކޯ، ރަޝިއާ (މާޗް 4) - ރަޝިއާގެ ހުރިހާ ޝަރުތެއް ގަބޫލުކޮށްފި ނަމަ މަޝްވަރާ ކުރަން ތައްޔާރު ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
ޕުޓިން އެގޮތަށް ވިދާޅުވީ ހުކުރު ދުވަހު ޖަރުމަނު ޗާންސެލަރު އޯލާފް ޝޯލްޒްއާ ފޯނުން ގުޅުއްވައި ދެއްކެވި ވާހަކަތަކުގައި ކަމަށް ރަޝިއާ ސަރުކާރުން ނެރުނު ބަޔާނެއްގައި ބުންޏެވެ.
"ޔޫކްރެއިނާއި ޔޫކްރެއިންގައި ސުލްހަ ގާއިމްކުރަން ބޭނުންވާ ކޮންމެ ބަޔަކާ އެކު ވެސް މަޝްވަރާއަށް ތައްޔާރު ކަމަށް ވިދާޅުވި. އެކަމަކު އެއީ ރަޝިއާގެ ހުރިހާ ޝަރުތެއް ގަބޫލުކުރާ ނަމަ،" ބަޔާނުގައި ބުންޏެވެ.
ޕުޓިން އެގޮތަށް ވިދާޅުވި އިރު ޔޫކްރެއިންގެ ރައީސް ވޮލޮޑިމިރް ޒެލެންސްކީ ބުރާސްފަތި ދުވަހު ޕުޓިންއަށް ގޮވާލެއްވީ އެމަނިކުފާނާ އެކު ސީދާ މަޝްވަރާއަށް ވަޑައިގެންނެވުމަށެވެ.
ޖަރުމަނު ޗާންސެލަރާ އެކު ދެއްކެވި ވާހަކައިގައި ޕުޓިން ވަނީ ރަޝިއާގެ ފައުޖުން ޔޫކްރެއިންގެ ސިޓީތަކަށް އަމާޒުކޮށް ބޮން އަޅަމުންދާ ކަމަށް ބުނާ ވާހަކަ ދޮގުކޮށްފަ އެވެ.
ޕުޓިން ވިދާޅުވީ އެއީ ދޮގު ހަބަރުތަކެއް ކަމަށާއި ކިޔެވް އާއި އެހެން ބޮޑެތި ސިޓީތަކަށް ވައިގެ ހަމަލާދޭ ކަމަށް ބުނެ ފަތުރަނީ ފޭކު ޕްރޮޕެގެންޑާ ކަމަށެވެ.
