ރަޝިއާ އާއި ޔޫކްރެއިނުން ބޭއްވި މަޝްވަރާތަކުގެ ދެ ވަނަ ބުރުން ނަތީޖާއެއް ނުނެރެވުނު ކަމަށް ޔޫކްރެއިނުން ބުނެފި އެވެ.
ޔޫކްރެއިންގެ މަންދޫބް މީހައިލޯ ޕޮޑޯލިޔެކް ވިދާޅުވީ "އުއްމީދު ކުރި ނަތީޖާ ނުނެރެވުމުން ވަރަށް ބޮޑަށް ހިތާމަ ކުރާ" ކަމަށެވެ.
ނަމަވެސް "ވަރަށް އަވަސް މުސްތަގްބަލެއްގައި" މަޝްވަރާގެ ތިން ވަނަ ބުރެއް ބާއްވަން ދެ ގައުމުން ވެސް އެއްބަސްވި ކަމަށް އޭނާ ވިދާޅުވި އެވެ.
"އަޅުގަނޑަށް ދެންނެވެން އޮތް ހަމައެކަނި އެއްޗަކީ، އިންސާނީ ހާލަތާ ގުޅޭ ގޮތުން ވަރަށް ތަފްސީލްކޮށް މަޝްވަރާތައް ދިޔަ ކަމަށް. އެއީ ގިނަ ސިޓީތަކެއް މިހާރު ވަށާލާފައި ވާތީވެ،" އޭނާ ވިދާޅުވި އެވެ.
އެގޮތުން ހަނގުރާމައިގައި ބައިވެރި ނުވާ އާއްމުން ރައްކާތެރި ހިސާބުތަކަށް ގެންދާނެ މަގުތައް ދެ ގައުމުން ވެސް ތަނަވަސްކޮށްދޭން އެއްބަސްވި ކަމަށް އޭނާ ވިދާޅުވި އެވެ.
އޭގެ އިތުރުން އެންމެ ބޮޑަށް ހަނގުރާމަ ކުރިއަށްދާ ހިސާބުތަކަށް ބޭހާއި، ކާބޯތަކެތީ ސަޕްލައިކޮށްދޭން ވެސް އެއްބަސްވި ކަމަށް ޔޫކްރެއިންގެ މަންދޫބް ވިދާޅުވި އެވެ.
ޕޮޑޯލިޔެކް ވިދާޅުވީ އާއްމުން ރައްކާތެރި ހިސާބަށް ގެންދަން ހޭދަވާ މުއްދަތުގައި "ވަގުތީ ގޮތުން ހަމަލާ ބަދަލު ކުރުން މެދުކަނޑާލުމުގެ ފުރުސަތު" އެބަ އޮތް ކަމަށެވެ.
