ކިޔެވް، ޔޫކްރެއިން (މާޗް 3) - ޔޫކްރެއިން ދޫވެއްޖެ ނަމަ ޔޫރަޕްގެ ބާކީ ހުރި ގައުމުތަކަށް ނުރައްކާ ވާނެ ކަމަށާއި އެހެންކަމުން ޔޫކްރެއިނަށް ފޯރުކޮށްދޭ އަސްކަރީ އެހީ އިތުރު ކުރަން ރައީސް ވޮލޮޑިމިރް ޒެލެންސްކީ ގޮވާލައްވައިފި އެވެ.
"ވައިގެ ސަރަހައްދު ބަންދު ކުރާނެ ބާރު ނެތް ނަމަ، އަޅުގަނޑަށް ވައިގެ އުޅަނދުތައް ދެއްވާ! އަޅުގަނޑުމެން ދޫވެގެން ހިނގައްޖެ ނަމަ، ދެން ނުރައްކާ އޮތީ ލެޓްވިއާ، ލިތުއޭނިއާ އަދި އެސްޓޯނިއާއަށް،" ޒެލެންސްކީ ވިދާޅުވި އެވެ.
އެމަނިކުފާނު ވިދާޅުވީ ހަނގުރާމަ ހުއްޓޭނެ ހަމައެކަނި ގޮތަކީ ރަޝިއާގެ ރައީސް ލެޑިމިއަ ޕުޓިންއާ ސީދާ މަޝްވަރާ ކުރުން ކަމަށެވެ. އެހެންކަމުން، އެފަދަ ބައްދަލުވުމެއް ބޭއްވުމަށް ގޮވާލެއްވި އެވެ.
"އަޅުގަނޑުމެން ރަޝިއާއަށް ހަމަލާއެއް ނުދެން އަދި ހަމަލާދޭކަށް ނުވެސް ރާވަން. އަޅުގަނޑުމެންގެ އަތުން ބޭނުންވެގެން ތި އުޅުއްވަނީ ކޮން އެއްޗެއްޗޯ؟ އަޅުގަނޑުމެންގެ ބިން ދޫކޮށް އަވަހަށް ވަޑައިގަންނަވާ،" ޕުޓިންއަށް ދެއްވާ މެސެޖެއްގެ ގޮތުން ޒެލެންސްކީ ވިދާޅުވި އެވެ.
ރަޝިއާގެ ސިފައިން ޔޫކްރެއިނަށް އެރީ ފެބްރުއަރީ 24 ވަނަ ދުވަހު އެވެ. ރަޝިއާގެ ހަމަލާތަކުގައި އާއްމުންނަށް އަމާޒު ނުކުރާ ކަމަށް ބުނި ނަމަވެސް، ގިނަ އަދަދެއްގެ އާއްމުން ދަނީ މަރުވަމުންނެވެ. އެގޮތުން ފާއިތުވި ދެ ދުވަހު އެ އަދަދު ވަރަށް ބޮޑަށް އިތުރުވި އެވެ.
ބުދަ ދުވަހު ރަޝިއާގެ ވައިގެ އުޅަނދުތަކުން ޗެރްނިހިވް ސިޓީގެ ސްކޫލަކަށް ހަމަލާ ދިނުމުން ނުވަ މީހުން މަރުވި ކަމަށް ޔޫކްރެއިނުން ބުނެ އެވެ. އެ ގައުމުން ލަފާކުރާ ގޮތުގައި ހަނގުރާމައިގައި މިހާތަނަށް 350 އަށް ވުރެ ގިނަ އާއްމުން މަރުވެއްޖެ އެވެ.
