މޮސްކޯ، ރަޝިއާ (މާޗް 2) - ޔޫކްރެއިންގައި ކުރަމުންދާ ހަނގުރާމައިގައި މިހާތަނަށް ރަޝިއާ ސިފައިންގެ 498 މީހުން މަރުވެފައިވާ ކަމަށް އެ ގައުމުން ބުނެފި އެވެ.
މިއީ ހަނގުރާމައިގައި މަރުވި ރަޝިއާ ސިފައިންގެ އަދަދު އެ ގައުމުން ހާމަކުރި ފުރަތަމަ ފަހަރެވެ.
"ޒިންމާ އަދާކުރުމަށް ސަފަށް ނުކުމެ އުޅުނު 498 ސިފައިން މަރުވެއްޖެ. އަދި 1،597 ސިފައިންނަށް އަނިޔާވެއްޖެ،" ދައުލަތުގެ ޓީވީން ދެއްކި ހިތާބެއްގައި ޑިފެންސް މިނިސްޓްރީގެ ތަރުޖަމާނު އައިގޯ ކޮނަޝެންކޯވް ވިދާޅުވި އެވެ.
ނަމަވެސް ޔޫކްރެއިނުން ބުނާ ގޮތުގައި ހަނގުރާމައިގައި މިހާތަނަށް ރަޝިއާގެ 5،840 ސިފައިން ވަނީ މަރުވެފަ އެވެ.
ރަޝިއާއިން ބުނީ ޔޫކްރެއިންގެ 2،870 ސިފައިން މަރުވެ، 3،700 ސިފައިންނަށް އަނިޔާވެފައިވާ ކަމަށެވެ. ޔޫކްރެއިން ސަރުކާރުން އެ ތަފާސްހިސާބު އަދި އާއްމެއް ނުކުރެ އެވެ.
ދެ ގައުމުން ހާމަކުރާ އަދަދުތައް ތިން ވަނަ މިނިވަން ފަރާތަކުން މިހާތަނަށް ކަށަވަރުކޮށްދީފައެއް ނުވެ އެވެ.
