ރަޝިއާގެ ސިފައިން ޔޫކްރެއިނަށް އަރައި ހަމަލާ ދެމުންދާ މައްސަލައިގައި ދެ ގައުމުގެ މެދުގައި މަޝްވަރާގެ ދެ ވަނަ ބުރު ފަށަން ތައްޔާރުވެއްޖެ އެވެ.
ރަޝިއާ އާއި ޔޫކްރެއިނުން މަޝްވަރާގެ ފުރަތަމަ ބައްދަލުކުރީ މިދިޔަ ހޯމަ ދުވަހު އެވެ. ބައްދަލުވުން އޮތީ ޔޫކްރެއިން ބޯޑަރު ކައިރިން ބެލަރޫސްގަ އެވެ.
ބެލަރޫސްގެ ބެލްޓާ ނިއުސް އެޖެންސީން ބުނީ ރަޝިއާގެ ވަފުދު މިހާރު ދަތުރު ކުރަމުން ދަނީ މަޝްވަރާގެ ދެ ވަނަ ބުރުގައި ބައިވެރިވުމަށް ކަމަށެވެ.
މަޝްވަރާގެ ދެ ވަނަ ބުރު އޮންނާނީ ބެލަރޫސް އާއި ޕޮލޭންޑް ގުޅޭ ބޯޑަރު ކައިރީގައި ބުރާސްފަތި ދުވަހު އެވެ. ނަމަވެސް އޮންނާނެ ގަޑިއެއް ސާފެއް ނޫނެވެ.
ރަޝިއާގެ ތަރުޖަމާނު ޑިމިޓްރީ ޕެސްކޯވް ބުދަ ދުވަހުގެ ރޭ ބުނީ މަޝްވަރާގެ ދެ ވަނަ ބުރަށް ރަޝިއާގެ ވަފުތުން ތައްޔާރު ކަމަށެވެ.
އޭގެ އިތުރުން މަޝްވަރާގައި ބައިވެރިވާ ރަޝިއާގެ އިސް މަންދޫބު ލެޑިމިއަ މެޑިންސްކީ ވިދާޅުވީ ހަމަލާތައް މެދުކަނޑާލުމާ ގުޅޭ ގޮތުން ދެ ގައުމުން ވާހަކަ ދައްކާނެ އެވެ.
ޔޫކްރެއިން ރައީސް އެޑްވައިޒަރު އޮލެކްސީ އަރެސްޓޮވިޗް ވެސް ވިދާޅުވީ މަޝްވަރާގެ ދެ ވަނަ ބުރެއް އޮންނާނެ ކަމަށެވެ.
"އެކަމަކު އަޅުގަނޑަކަށް ހިޔެއް ނުވޭ އެއްވެސް ކަމެއް ބަދަލުވާނެ ހެނެއް. އެއްވެސް ކަމެއް ބަދަލެއް ނުވާނެ. އަޅުގަނޑުމެންގެ ވިސްނުން ވެސް ބަދަލެއް ނުކުރާނަން،" އޭނާ ވިދާޅުވި އެވެ.
