ޕެރިސް، ފްރާންސް (މާޗް 2) - ފްރާންސްގެ ފޮރިން ލީޖަން ސިފައިންގެ ޔުނިޓުގެ މެމްބަރުންގެ ތެރޭގައި ހިމެނޭ ޔޫކްރެއިންގެ 14 މީހުން ރަޝިއާއާ ދެކޮޅަށް ހަނގުރާމައިގައި ބައިވެރިވާން ދާން އުޅެނިކޮށް ހުއްޓުވައިފި އެވެ.
އޭގެ ތެރެއިން ނުވަ މީހުން ޗުއްޓީގައި ތިބި ނަމަވެސް، ފްރާންސުން ބޭރަށް ދިޔުމުގެ ހުއްދަ ލިބިފައެއް ނުވެ އެވެ. ބާކީ ފަސް މީހުން ޗުއްޓީ ނެގުމެއް ނެތި، މަސައްތަށް ރިޕޯޓުކޮށްފައެއް ނުވެ އެވެ. އެ އެންމެން ވެސް ހައްޔަރު ކުރީ ޕެރިހުންނެވެ.
ލީޖަން ކޮމާންޑަރު އަލައިން ލާޑެޓް ވިދާޅުވީ އެ މީހުން ހައްޔަރު ކުރީ ޕޮލޭންޑަށް ދަތުރު ކުރަމުން ދިޔަ އުޅަނދަކުން ކަމަށެވެ. ޕޮލޭންޑަކީ ޔޫކްރެއިނާ ބޯޑަރު ހިއްސާ ކުރާ ގައުމެކެވެ.
ފޮރިން ލީޖަންއަކީ 9،500 ސިފައިން ހިމެނޭ ފްރާންސްގެ އަސްކަރިއްޔާގެ ހާއްސަ ޔުނިޓެކެވެ. އެއީ އެހެން ގައުމުތަކުގެ ރައްޔިތުންނަށް ވެސް ބައިވެރިވެވޭ ގޮތަށް އޮންނަ ޔުނިޓެކެވެ. ވަކި މުއްދަތެއް ވަންދެން ހިދުމަތް ކުރުމުން، ލީޖަންގެ މެމްބަރުންނަށް ފްރާންސްގެ ރައްޔިތުކަން ލިބެ އެވެ.
އެ ޔުނިޓުގެ 14 ސިފައިން ދާން އުޅުނީ ހަނގުރާމައިގައި ބައިވެރިވާން ކަމެއް ނުވަތަ އާއިލާގެ މެމްބަރުންނަށް އެހީވާން ކަމެއް ސާފެއް ނޫނެވެ. އެ މީހުންގެ އަތުން އެއްވެސް ހަތިޔާރެއް ނުފެނެ އެވެ. ނަމަވެސް އެ މީހުންނާ އެކު އުޅަނދުގައި ތިބި އެހެން މީހުން އަތުގައި ހަތިޔާރު ހުއްޓެވެ.
އެހެންކަމުން އިދާރާތަކުން ދެކޭ ގޮތުގައި އެ އުޅަނދުތަކުގައި ތިބި މީހުންގެ މަގްސަދަކީ ހަނގުރާމައިގައި ބައިވެރިވުމެވެ.
ފާއިތުވި ހަފުތާގެ ތެރޭގައި ފޮރިން ލީޖަންގައި ހިމެނޭ ޔޫކްރެއިނަށް ނިސްބަތްވާ 25 ސިފައިން ވަނީ މަސައްކަތަށް ނުކުތުން ހުއްޓާލާފަ އެވެ. އެ އެންމެން ވެސް، ބެލެވޭ ގޮތުގައި، ބޭނުން ވަނީ ޔޫކްރެއިންގައި ހަނގުރާމަ ކުރަން ދިޔުމަށެވެ.
ފޮރިން ލީޖަންގެ ސިފައިންގެ ގޮތުގައި 710 ޔޫކްރެއިން ރައްޔިތުން އެބަ ތިއްބެވެ. އޭގެ ތެރެއިން 210 މީހުންނަށް ވަނީ ފްރާންސްގެ ރައްޔިތުކަން ވެސް ލިބިފަ އެވެ. އެ ޔުނިޓުގައި ހިމެނޭ ރަޝިއާ މީހުންގެ އަދަދަކީ 450 އެވެ.
ހަނގުރާމައިގެ ސަބަބުން އާއިލާއަށް އެހީ ވާން ދާން ބޭނުން މީހުންނަށް ޔުނިޓުން ދަނީ ދެ ހަފްތާގެ ޗުއްޓީއެއް ދެމުންނެވެ. ނަމަވެސް ސީދާ ޔޫކްރެއިނަށް އެތެރެވުމުގެ ހުއްދައެއް ނުދެ އެވެ. އެ މީހުންނަށް ތިބެވޭނީ ޔޫކްރެއިނާ އަވައްޓެރި ގައުމެއްގަ އެވެ.
އަންގާރަ ދުވަހު 25 މީހުންނަށް އެފަދަ ޗުއްޓީއެއް ދިނެވެ. އެހެން ނަމަވެސް، ޕޮލޭންޑަށް ދަނިކޮށް ހުއްޓުވި އުޅަނދުގައި ތިބި 14 މީހުންގެ އަތުގައި އެފަދަ ހާއްސަ ޗުއްޓީއެއް ލިބުނު ކަމުގެ ލިޔުމެއް ނެތެވެ. އެކަމަކު އޭގެ ތެރެއިން ނުވަ މީހުން ތިބީ އާއްމު ޗުއްޓީގަ އެވެ.
އެ ނުވަ މީހުންނާ މެދު އެއްވެސް ފިޔަވަޅެއް އަޅާނެ ކަމަށް ނުބެލެވެ އެވެ. ނަމަވެސް ޗުއްޓީ ނުނަގައި ދަތުރު ކުރަމުން ދިޔަ ފަސް މީހުން ބަންދު ކުރާނެ އެވެ.
