އދ.، އެމެރިކާ (މާޗް 2) - ރަޝިއާއިން ޔޫކްރެއިނަށް އަރައި ދެމުންދާ ހަމަލާތަކާ ގުޅިގެން ދެ ދުވަސް ވަންދެން ކުރިއަށް ގެންދިޔަ އދ. ގެ އާއްމު މަޖިލީހުގެ ހާއްސަ ޖަލްސާއަކަށް ފަހު ވޯޓަށް އަހަން ތައްޔާރުވެއްޖެ އެވެ.
އާއްމު މަޖިލީހަށް ހުށަހަޅާފައިވާ ގަރާރަކީ ގާނޫނީ ގޮތުން އަމަލު ކުރުން މަޖުބޫރު ގަރާރެއް ނޫނެވެ. ނަމަވެސް ގަރާރު ފާސްވެއްޖެ ނަމަ، ބައިނަލްއަގްވާމީ މުޖުތަމައިން މައްސަލައާ މެދު ދެކޭ ގޮތް ހާމަވެ، ރަޝިއާއަށް ކުރިމަތިވެފައިވާ ފިއްތުން އިތުރުވާނެ އެވެ.
ގަރާރު ފާސްވާނީ ތިންބައިކޮށްފައި ދެބައި ގައުމުގެ ވޯޓު ލިބިގެންނެވެ. ރަޝިއާއިން ޔޫކްރެއިނަށް އަރައި ދެމުންދާ ހަމަލާތަކާ ގުޅިގެން ރަޝިއާއިން ބުނެފައިވަނީ އެއީ އދ. ގެ ޗާޓަރުގެ 51 ވަނަ މާއްދާގައި ބުނާ "އަމިއްލަ ދިފާއު"ގެ ދަށުން ހިންގާ އޮޕަރޭޝަނެއް ކަމަށެވެ.
ނަމަވެސް ހުޅަނގުގެ ގައުމުތަކުން އެ ވާހަކަ ދޮގުކުރުމަށް ބުނީ އދ. ގެ ޗާޓަރުގެ ދެ ވަނަ މާއްދާއާ ރަޝިއާއިން ހިލާފުވެފައިވާ ކަމަށެވެ. އެ މާއްދާގައި ބުނެފައި ވަނީ މައްސަލައެއް ހައްލު ކުރަން ބިރުދެއްކުމާއި ބާރުގެ ބޭނުންކޮށްގެން ނުވާނެ ކަމަށެވެ.
ޔޫކްރެއިނާ ގުޅިގެން ޔޫރަޕްގެ ގައުމުތަކުން ގަރާރުގެ ލިޔުން ތައްޔާރު ކުރިއިރު، އެއަށް ގިނަ އިސްލާހުތަކެއް ވެސް ގެނެސްފައިވެ އެވެ. އެގޮތުން ރަޝިއާގެ އަމަލު "ކުށްވެރި" ކުރުމުގެ ބަދަލުގައި "އެންމެ ހަރުކަށި އިބާރާތުން ހިތްހަމަނުޖެހުން" ފާޅުކުރާ ކަމަށް ބަދަލުކޮށްފައިވެ އެވެ.
އޭގެ އިތުރުން ރަޝިއާގެ ނިޔުކްލިއާ ފައުޖު ތައްޔާރީ ހާލަތަށް ގެނައުން އދ. އިން "ކުށްވެރި ކުރާ" ކަމަށް ގަރާރުގައި ހިމަނާފައިވެ އެވެ. ގަރާރުގައި ގޮވާލަނީ ރަޝިއާގެ ސިފައިން ވަގުތުން ޔޫކްރެއިނުން ފައިބާ ސުލްހައަށް މަސައްކަތް ކުރުމަށެވެ.
މިދިޔަ ހޯމަ އަދި އަންގާރަ ދުވަހު ގަރާރަށް ބަހުސް ކުރަން ހުޅުވާލުމުން، ގިނަ ގައުމުތަކުން ވަނީ ރަޝިއާއާ މެދު ހިތްހަމަނުޖެހުން ފާޅުކޮށްފަ އެވެ.
އަރަބި ދުނިޔެއިން ރަޝިއާއާ ދެކޮޅަށް އެންމެ އަޑުހަރުކޮށް ވާހަކަދެއްކީ 1990 ވަނަ އަހަރު އިރާގުގެ ސިފައިން އަރައި ހަނގުރާމައެއް ކުރިމަތިވި ކުވެއިތުންނެވެ. އޭޝިއާއިން ޖަޕާނާއި ނިއުޒީލޭންޑުން ރަޝިއާއަށް ވަރަށް ބޮޑަށް ފާޑުކިޔެވެ.
ނަމަވެސް އިންޑިއާއިން "ފަރުވާތެރި ބަސްމަގެއް" ބޭނުން ކުރިއިރު، ރަޝިއާއިން ބުނީ "އާ ފިނި ހަނގުރާމައަކުން ލިބޭނެ އެއްޗެއް ނެތް" ކަމަށެވެ.
ރަޝިއާއަށް ފުރިހަމައަށް ތާއީދުކޮށް ވާހަކަދެއްކި ގައުމުތަކަކީ ސީރިއާ، ނިކަރަގުއާ، ކިޔުބާ އަދި އުތުރު ކޮރެއާ އެވެ. ހުޅަނގުގެ ގައުމުތަކުން ގެންގުޅެނީ ދެފުށްކެހެރި އުސޫލުތަކެއް ކަމަށް ބުނެ، ލީބިޔާ، އިރާގް އަދި އަފްގާނިސްތާނަށް ސިފައިން ފޮނުވުން އެ ގައުމުތަކުން ކުށްވެރިކުރި އެވެ.
ބުދ ދުވަހު ގަރާރަށް ވޯޓަށް އަހަން ތައްޔާރުވެފައިވާ އިރު، އަދިވެސް ބައެއް ގައުމުތަކުން ވާހަކަދައްކަން އެދިފައިވެ އެވެ. އޭގެ ތެރޭގައި ރަޝިއާގެ ހަމަލާތައް ޔޫކްރެއިނަށް ފޮނުވަން އެހީވާ ކަމަށް ތުހުމަތު ކުރެވޭ ބެލަރޫސް ހިމެނެ އެވެ. އޭގެ އިތުރުން އެމެރިކާއިން ވެސް މިއަދު ބަހުސްގައި ވާހަކަ ދައްކާނެ އެވެ.
