ކިޔެވް، ޔޫކްރެއިން (މާޗް 2) - ރަޝިއާގެ ސިފައިން ވަކި ކުޑައިގައި ޔޫކްރެއިންގެ ދެ ވަނައަށް އެންމެ ބޮޑު ސިޓީ ހާރްކީވްއަށް ތިރި ކުރުމާ އެކު، ވަރުގަދަ ހަމަލާތައް ބަދަލުކުރަމުން އެބަދެ އެވެ.
"ވައި ކުޑައިގައި ރަޝިއާ ސިފައިން ހާރްކީވްއަށް ތިރިކޮށްފި. އަދި ހޮސްޕިޓަލަކަށް ހަމަލާ ދީފި،" ޔޫކްރެއިން ސިފައިން ޓެލެގްރާމްގައި ނެރުނު ބަޔާނެއްގައި ބުންޏެވެ.
"އަދުއްވުންނާއި ޔޫކްރެއިންގެ ރައްޔިތުންނާ ދެމެދު ހަމަލާތައް ދަނީ ކުރިއަށް."
ހާރްކީވްއަކީ ރަޝިއާގެ ބޯޑަރު ކައިރީގައި އޮންނަ ސިޓީއެކެވެ. އެ ސިޓީގެ އާބާދީއަކީ 1.4 މިލިއަން މީހުންނެވެ. އޭގެ ތެރެއިން ގިނަ މީހުން ވާހަކަ ދައްކަނީ ރަޝިއާ ބަހުންނެވެ.
މިދިޔަ ބުރާސްފަތި ދުވަހު ރަޝިއާގެ ސިފައިން ޔޫކްރެއިނަށް އަރައި ދޭން ފެށި ހަމަލާތަކުގެ މައިގަނޑު އެއް އަމާޒަކީ ހާރްކީވް ސިޓީ ހިފުމެވެ.
ބްލެކް ސީއާ ދިމާލުން އޮންނަ ހާސަން ސިޓީ ވަށައިގެން ރަޝިއާ ސިފައިންގެ ޗެކްޕޮއިންޓްތައް އަންގާރަ ދުވަހު ގާއިމްކުރި އިރު، އެ ތަނުގެ ރޭލް ސްޓޭޝަނާއި ބަނދަރު ރޭ ދަންވަރު ހިފާފައިވާ ކަމަށް މޭޔަރު އައިގޯ ކޮލީހަޔޭވް ވިދާޅުވި އެވެ.
އަޒޯވް ކަނޑާ ދިމާލުން އޮންނަ މަރިޔުޕޯލް ސިޓީގައި އަންގާރަ ދުވަހުގެ ހަމަލާތަކުގައި 100 އަށް ވުރެ ގިނަ މީހުންނަށް އަނިޔާވި ކަމަށް މޭޔަރު ވަޑީމް ބޮޔިޗެންކޯ ވިދާޅުވި އެވެ.
ވެރިރަށް ކިޔެވްއާ 50 ކިލޯމީޓަރު ދުރުން އޮންނަ ބޮރޮޑިޔަންކާގައި ރަޝިއާއިން އަންގާރަ ދުވަހު އާއްމުން ދިރިއުޅޭ ދެ އިމާރާތަކަށް ވައިގެ ހަމަލާތައް ފޮނުވި އެވެ.
ޔޫކްރެއިންގެ ޑެޕިއުޓީ ފޮރިން މިނިސްޓަރު އެމިނޭ ޒަޕަރޯވާ އާއްމު ކުރެއްވި ވީޑިއޯތަކުން ފެންނަނީ އިމާރާތްތަކަށް ވަރަށް ބޮޑަށް ގެއްލުންވެ، ދުން އަރާ މަންޒަރެވެ.
އޭގެ އިތުރުން ބެލަރޫސްއިން ވެސް ހަމަލާއެއް އަތުވެދާނެ ކަމުގެ ބިރު އެބަ އޮތް ކަމަށް ރޭ ދަންވަރު ޔޫކްރެއިންގެ ޑިފެންސް މިނިސްޓްރީން ބުންޏެވެ.
"ބެލަރޫސް ސިފައިން ތައްޔާރީ ހާލަތަށް ގެނެސް، ޔޫކްރެއިންގެ ބޯޑަރު ކައިރިއަށް ވަނީ ޖަމާކޮށްފައި،" އެ މިނިސްޓްރީން ފޭސްބުކްގައި އާއްމު ކުރި ބަޔާނެއްގައި ބުންޏެވެ.
