ރަޝިއާގެ ސިފައިން ޔޫކްރެއިނަށް އަރައި ހަމަލާ ދޭން ފެށިތާ މިއަދަކީ ހަތް ވަނަ ދުވަހެވެ. ރަޝިއާއިން ހީކުރި ވަރަށް ވުރެ ޔޫކްރެއިންގެ ދިފާއީ ބާރު ގަދަވުމާ އެކު ހަމަލާތަކުން މާ ބޮޑު ކުރިއެރުމެއް ނުފެނެ އެވެ.
އެހެންކަމުން، ހަފްތާއެއް ވާން ގާތްވުމާ އެކު ރަޝިއާގެ ސްޓްރެޓެޖީ ބަދަލުކޮށް، ސިޓީތަކަށް ހަމަލާ ދީ، ވެރިރަށް ކިޔެވް ކައިރިއަށް ގިނަ އަދަދެއްގެ ފައުޖުތައް ޖަމާކުރަން ފެށީ އަންގާރަ ދުވަހު އެވެ.
އޭގެ އިތުރުން، މުއާސަލާތީ ހިދުމަތަށް އަމާޒުކޮށް ފުރަތަމަ ފަހަރަށް ރަޝިއާއިން ހަމަލާ ދިނީ ވެސް އަންގާރަ ދުވަހު އެވެ. ރަޝިއާއިން ބުނީ "ލަނޑުދަނޑިތައް ހާސިލްނުވަނީސް" ނިންމާ ނުލާނެ ކަމަށެވެ.
ތިރީގައި މިވާ މައުލޫމާތަކީ ރަޝިއާ އާއި ޔޫކްރެއިންގެ ވާހަކަތާއި ހުޅަނގުގެ އޮފިޝަލުންނާއި ބައިނަލްއަގްވާމީ ޖަމިއްޔާތަކުގެ ބަހާއި ޖާސޫސީ މަސްދަރުތަކަށް ބިނާކޮށް، ހަނގުރާމަ މިހާރު އޮތް ހާލަތާ ގުޅޭ މައުލޫމާތެވެ.
ސެޓެލައިޓް ފޮޓޯއިން ފެންނަ ގޮތުގައި ރަޝިއާގެ ސިފައިންނާއި އުޅަނދުތައް ވަނީ ކިޔެވް ކައިރިއަށް ޖަމާވާން ފަށާފަ އެވެ. އެގޮތުން 40 މޭލުގެ ދިގު ސަފެއް ފޮޓޯތަކުން ފެެނެ އެވެ.
ކިޔެވް ސިޓީގައި އާއްމު ރައްޔިތުން ނުކުމެ، މަގުތަކުގައި ބެރިކޭޑް ޖަހަން ފެށި އެވެ. އަދި ކިޔެވްގެ ޖާސޫސީ އިދާރާ ކައިރީގައި އުޅޭ އާއްމުން ދުރަށް ދިޔުމަށް ރަޝިއާއިން ގޮވާލި އެވެ.
ޔޫކްރެއިނުން ބުނީ ރަޝިއާގެ ލަޝްކަރަށް ބޮޑެތި ގެއްލުންތަކެއް ވެފައިވާ ކަމަށެވެ. އެގޮތުން 29 ޖެޓު، 29 ހެލިކޮޕްޓަރު އަދި 198 ޓޭންކު ގޮއްވާލާފައިވާ ކަމަށް ބުންޏެވެ.
ދެ ވަނައަށް އެންމެ ބޮޑު ސިޓީ ހާރްކިވްއަށް ވަރުގަދަ ހަމަލާތަކެއް ދީ 10 މީހުން މަރުވެ، 20 މީހުންނަށް އަނިޔާވި އެވެ. ރަޝިއާއަށް ހާރްކީވް އާއި ޗެރްނިހިވްގެ ކޮންޓްރޯލް ނުލިބި ލަސްވާތީ އާއްމުން އުޅޭ ހިސާބުތަކަށް އަމާޒު ކުރާ ކަމަށް ޔޫކްރެއިނުން ތުހުމަތު ކުރި އެވެ.
ދެކުނު ހާސަން ސިޓީގައި ރަޝިއާއިން ޗެކްޕޮއިންޓްތައް ގާއިމްކުރި އެވެ. ފާއިތުވި 24 ގަޑިއިރު ރަޝިއާއަށް މާ ބޮޑު ކުރިއެރުމެއް ނުލިބޭ ކަމަށާއި ޔޫކްރެއިންގެ ވައިގެ ސަރަހައްދު ވެސް ކޮންޓްރޯލް ނުކުރެވޭ ކަމަށް އިނގިރޭސީ ޖާސޫސީ މަސްދަރުތަކުން ބުންޏެވެ.
ފްރާންސްގެ އިތުރު ސިފައިން ރޮމޭނިއާއަށް ފޮނުވި އެވެ. އަދި ނޭޓޯ ގައުމުތަކުގެ ބިމުގެ "އެންމެ އިންޗިއެއް" ވެސް ދޫނުކޮށް ދިފާއު ކުރާނެ ކަމަށް ނޭޓޯއިން ބުންޏެވެ.
އދ. އިން ލަފާކުރާ ގޮތުގައި ޔޫކްރެއިންގެ 12 މިލިއަން މީހުންނަށް އެހީ ބޭނުންވެ އެވެ. ޔޫކްރެއިންގެ އެތެރޭގައި މިލިއަނަކަށް ވުރެ ގިނަ މީހުންގެ ގެދޮރު ގެއްލިފައިވާ އިރު، 660،000 އަށް ވުރެ ގިނަ މީހުން ވަނީ ރެފިއުޖީންގެ ގޮތުގައި ކައިރި ގައުމުތަކަށް ގޮސްފަ އެވެ.
