ސްޓެލްކޯގެ މެނޭޖިން ޑިރެކްޓަރުގެ މަގާމުން ހަސަން މުގުނީ ވަކިކޮށް، އެ މަގާމަށް އިލެކްޝަންސް ކޮމިޝަނުގެ ކުރީގެ ރައީސް އަހުމަދު ޝަރީފް އައްޔަނުކޮށްފި އެވެ.
ސަރުކާރުގެ ޕްރައިވެޓައިޒޭޝަން އަދި ކޯޕަރޭޝަން ބޯޑު (ޕީސީބީ) ވަނީ ސްޓެލްކޯގެ މެނޭޖިން ޑިރެކްޓަރަކަށް ޝަރީފް އައްޔަނުކުރުމަށް ފާސްކޮށްފަ އެވެ. މުގުނީ ސްޓެލްކޯގެ މެނޭޖިން ޑިރެކްޓަރުގެ މަގާމަށް އައްޔަން ކުރީ ޑިސެމްބަރު، 2018 ގަ އެވެ.
މުގުނީ ވަކިކޮށް، އެ މަގާމަށް ޝަރީފް އައްޔަން ކުރުމުގެ އިތުރުން ވެސް ދައުލަތުގެ ކުންފުނިތަކަށް ބައެއް އެހެން ބަދަލުތައް ގެންނަން ސަރުކާރުން ނިންމާފައިވާ ކަމަށް ޕީސީބީން ވަނީ ބުނެފަ އެވެ.
"...ގިނަ ކުންފުނިތަކެއްގެ ހިންގުމަށް ބަދަލު ގެންނަން ސަރުކާރުން ވަނީ ހުށަހަޅައިފަ. އެކަމާ ގުޅޭގޮތުން ބޯޑުގެ ބައްދަލުވުމެއް މިއަދު ބާއްވަން ވަނީ ހަމަޖެހިފައި،" ޕީސީބީގެ ރައީސް މުހައްމަދު އާސިމް މި ނޫހަށް އިއްޔެ ވިދާޅުވި އެވެ.
