ރަޝިއާގެ ފައުޖުގެ 75 ޕަސެންޓު ސިފައިން މިހާރު ތިބީ ޔޫކްރެއިންގެ ފަސްގަނޑުގައި ކަމަށް އެމެރިކާގެ އިސް އޮފިޝަލަކު ބުނެފި އެވެ.
އެމެރިކާގެ އިސް ދިފާއީ އޮފިޝަލަކު ބުނީ ރަޝިއާ ސިފައިންގެ މީހުންގެ 75 ޕަސެންޓު މިހާރު ހަރަކާތްތެރިވަމުން ދަނީ ޔޫކްރެއިންގައި ކަމަށެވެ.
ރޯޔަލް ޔުނައިޓެޑް ސާވިސަސް އިންސްޓިޓިއުޓްގެ އަސްކަރީ ތަޖުރިބާކާރު ޑރ. ޖެކް ވެޓްލިންގް ވެސް ބީބީސީއަށް ވިދާޅުވީ ރަޝިއާ ސިފައިންގެ ދަތުރު ފަށައިގެން އުޅެނީ ބެލަރޫސްއިން ކަމަށެވެ.
އެގޮތުން މިސްރާބު ހުރީ ވެރިރަށް ކިޔެވްއަށް ކަމަށާއި ކިޔެވް ހިފަން ބޭނުންވާ ކަންކަން އިންތިޒާމް ކުރުމުގެ މަސައްކަތް ކުރިއަށްދާ ކަމަށް އޭނާ ވިދާޅުވި އެވެ.
ރަޝިއާގެ 75 ޕަސެންޓު ސިފައިން ޔޫކްރެއިންގައި ތިބި އިރު، ސެޓެލައިޓް ފޮޓޯތަކުން ފެންނަ ގޮތުގައި ރަޝިއާގެ އަސްކަރީ އުޅަނދުތަކުން ކިޔެވް ކައިރީގައި 40 މޭލު ދިގު ސަފެއް ވަނީ ހަދާފަ އެވެ.
ރަޝިއާ ސިފައިންގެ އުޅަނދުތަކުގެ ސަފު ފެންނަ ސެޓެލައިޓް ފޮޓޯއެއް.
މިިދޔަ ބުރާސްފަތި ދުވަހު ރަޝިއާއިން ހަމަލާ ދޭން ފެށުމާ އެކު ޔޫކްރެއިނުންދަނީ ކިޔެވްގެ ދިފާއުގައި ގިނަ މަސައްކަތްތަކެއް ކުރަމުންނެވެ. ސަލާމަތީ އޮފިޝަލުން ބުނާ ގޮތުގައި ރަޝިއާއިން ތައްޔާރު ވަނީ އަނެއްކާވެސް ކިޔެވް ހިފުމުގެ މަސައްކަތަށެވެ.
އެމެރިކާއިން ވެސް ބުނީ ހަނގުރާމައިގެ ފަސް ވަނަ ދުވަހު ހަމަލާތައް މަޑު ޖެހުނު ނަމަވެސް ރަޝިއާގެ މައިގަނޑު އަމާޒަކީ ކިޔެވް ހިފުން ކަމަށެވެ.
