ރަޝިއާ އާއި ޔޫކްރެއިންގެ މަންދޫބުން ހޯމަ ދުވަހު ބެލަރޫސްގައި ބޭއްވި މަޝްވަރާތައް ނިންމުމަށް ފަހު، ސަރުކާރުގެ ލަފާ ހޯދަން ހިނގައްޖެ އެވެ.
ބެލަރޫސްގެ ނޫސްތަކާ ހަވާލަދީ ރޮއިޓާޒް އިން ބުނީ ދެ ގައުމުގެ މަންދޫބުން ވެސް އެނބުރި ގޮސް، މަޝްވަރާ ކުރެވުނު ކަންކަން ސަރުކާރަށް ހުށަހަޅާނެ ކަމަށެވެ.
އެއަށްފަހު، ސަރުކާރުން ދެކޭ ގޮތް ހާމަކުރުމަށް ދެ ވަނަ ބައްދަލުވުމެއް ބާއްވާނެ ކަމަށް ބެލެވެ އެވެ. މަޝްވަރާތަކުން ސުލްހައަށް މަގުފަހިވާނެ ކަމަށް ނުބެލެވެ އެވެ.
ޔޫކްރެއިނުން ބުނީ ވަގުތުން ހަމަލާތައް ހުއްޓާލުމަށާއި ރަޝިއާ ސިފައިން ޔޫކްރެއިނުން ފޭބުމަށް ޑިމާންޑް ކުރާ ކަމަށެވެ. ރަޝިއާއިން ބުނީ އެއްޗެއް ހާމަ ކުރާނީ މަޝްވަރާތައް ނިމުމުން ކަމަށެވެ. '
ރަޝިއާގެ މަންދޫބުން ބުނެފައި ވަނީ ދެ ގައުމުގެ މަސްލަހަތަށް ފައިދާވާނެ އެއްބަސްވުމަކަށް އަންނަން މަޝްވަރާގައި މަސައްކަތް ކުރާނެ ކަމަށެވެ.
