ރަޝިއާގެ ނިޔުކްލިއާ ފައުޖު ތައްޔާރީ ހާލަތަށް ގެނައީ އިނގިރޭސި ފޮރިން ސެކެޓްރީ ލިޒް ޓްރުސް އާއި އެހެން ފަރާތްތަކުގެ ބަސްމަގު ހުރި ގޮތުން ކަމަށް ރަޝިއާއިން ބުނެފި އެވެ.
ރަޝިއާ ސަރުކާރުގެ ތަރުޖަމާނު ޑިމިޓްރީ ޕެސްކޯވް ވިދާޅުވީ ރަޝިއާއިން ޔޫކްރެއިނަށް ދެމުންދާ ހަމަލާތަކާ ގުޅިގެން ނޭޓޯ އާއި ރަޝިއާގެ "ކުރިމަތިލުންތަކެއް" ހިނގާފާނެ ކަމަށް ދޭހަވާ ގޮތަށް ވާހަކަ ދައްކާފައިވާ ކަމަށެވެ.
"އެކި މަންދޫބުން އެކި ފެންވަރުގައި ދެއްކެވި ވާހަކަތަކުގައި ނޭޓޯ އާއި ރަޝިއާގެ ކުރިމަތިލުމެއް ސިފަކޮށްފައިވޭ. އެއީ އެއް ގޮތަކަށް ވެސް ބަލައިގަންނާނެ ވާހަކަތަކެއް ނޫން. އެ ވާހަކަތައް ދެއްކި ފަރާތްތަކުގެ ސީދާ ނަން ހާމަކުރަން ބޭނުމެއް ނޫން، އެކަމަކު އޭގެ ތެރޭގައި އިނގިރޭސި ފޮރިން މިނިސްޓަރު ހިމެނޭ."
ނަމަވެސް އިނގިރޭސި ފޮރިން ސެކެޓްރީ ދެއްކެވި ވާހަކަތަކުގެ ތެރެއިން ރަޝިއާ ހިތްހަމަނުޖެހުނީ ސީދާ ކޮން ކަމަކާ މެދު ކަމެއް ސާފެއް ނޫނެވެ.
އާދީއްތަ ދުވަހު އެކަމަކާ ވިދާޅުވީ ރަޝިއާ ނުހުއްޓުވައިފި ނަމަ، އެހެން ދައުލަތްތަކަށް ނުރައްކާ އެބަ އޮތް ކަމަށާއި، އެހެން ވެއްޖެ ނަމަ ނޭޓޯއިން ހަނގުރާމައިގެ ތެރެއަށް ވަންނަން ޖެހިދާނެ ކަމަށެވެ.
"ޔޫކްރެއިނާ ހަމައިން ޕުޓިން ނުހުއްޓުވައިފި ނަމަ އެހެން ގައުމުތަކަށް ނުރައްކާ ވާނެ، އޭގެ ތެރޭގައި ބޯލްޓިކް ގައުމުތަކާޢި ޕޮލޭންޑް އަދި މޯލްޑޯވާ ހިމެނޭ. އޭރުން މިއީ ނޭޓޯ ބައިވެރިވާން ޖެހޭ ހަނގުރާމައަކަށް ވެދާނެ، އެ ހިސާބަށް ދާން އަޅުގަނޑުމެން ބޭނުމެއް ނޫން،" ޓްރުސް އާދީއްތަ ދުވަހު ސްކައި ނިއުސްއަށް ވިދާޅުވި އެވެ.
