ނިއު ދިއްލީ، އިންޑިއާ (ފެބްރުއަރީ 28) - އިންޑިއާ ގައުމީ ޓީމުގެ ތަރި ވިރާތު ކޯލީ، ކެރިއަރުގައި ކުޅޭ 100 ވަނަ ޓެސްޓް މެޗަށް ސަޕޯޓަރުން ނުވައްދާ ކުޅޭ ގޮތަށް ނިންމައިފި އެވެ.
ސްރީ ލަންކާއާ ދެކޮޅަށް އިންޑިއާ އިން ކުޅޭ ދެ ޓެސްޓް މެޗުގެ އޮންނާާނެ އެވެ. ގިނަ ބަޔެއްގެ ސަމާލުކަން މިހާރު ހުއްޓިފައިވަނީ ހޮނިހިރު ނޫނީ އާދިއްތަ ދުވަހު ކުޅެން ނިންމާފައިވާ ފުރަތަމަ މެޗަށެވެ. އެއީ ވިރާތުގެ 100 ވަނަ ޓެސްޓް މެޗު ކަމަށްވާތީ އެވެ.
ޕަންޖާބް ކްރިކެޓް އެސޯސިއޭޝަން (ޕީސީއޭ)ގެ ސެކްރެޓަރީ ޕުނީތު ބާލީ ބުނީ ވިރާތުގެ 100 ވަނަ ޓެސްޓް މެޗަށް ކޮވިޑް-19ގެ ސަބަބުން ސަޕޯޓަރުން ނުވައްދައި ކުޅެން ޖެހިފައިވާ ކަމަށެވެ. މިއީ އެއްވެސް ހާލަތެއްގައި ބޭނުންވި ގޮތެއް ނޫން ކަމަށްް އޭނާ ވަނީ ބުނެފަ އެވެ. ސަޕޯޓަރުން ނުވައްދައި ކުޅެން ޖެހުނަސް މި މެޗުގެ ހާއްސަކަން ފާހަގަވާނެ ވަރަށް އިސްތިހާރު ކުރުމުގެ ކަންކަން ރޭވިފައިވާ ކަމަށް ޕުނީތު ބުންޏެވެ.
ވިރާތު، 33، ގެ މި ހާއްސަ މެޗަށް ސަޕޯޓަރުން ވަންނަން ފުރުސަތު ނެތުމުން ގިނަ ބަޔަކު އަންނަނީ ނުރުހުން ފާޅުކުރަމުންނެވެ. ވިރާތުގެ ބައެއް ސަޕޯޓަރުން ސޯޝަލް މީޑިއާގައި ޝުއޫރު ފާޅުކުރަމުން ދައްކަމުން އަންނަ ވާހަކަތަކަށް ބަލާއިރު، ސަޕޯޓަރުން ވެއްދޭ ދަނޑަކަށް މި މެޗު ބަދަލުކުރަން ޖެހޭނެ އެވެ.
އިންޑިއާގެ މެޗެއްގެ ތެރެއިން ވިރާތު: އޭނާގެ 100 ވަނަ ޓެސްޓް މެޗަށް ސަޕޯޓަރުންނަށް ނުވަދެވޭ މައްސަލަ އަށް އަންނަނީ ސަމާލުކަން ލިބެމުން
މިހާރު ޝެޑިއުލްގައި އޮތީ ޓެސްޓް ސީރީސްގެ ފުރަތަމަ މެޗު މޮހާލީގައި ސަޕޯޓަރުން ނުވައްދައި ކުޅެފައި ދެ ވަނަ މެޗު ބެންގަލޫރުގައި މަދު އަދަކަށް ސަޕޯޓަރުން ވައްދައިގެން ކުޅޭ ގޮތަށެވެ. ވިރާތުގެ ސަޕޯޓަރުންގެ ހުށަހެޅުމަކީ ފުރަތަމަ މެޗު ބެންގަލޫރު ނޫނީ އެހެން ސިޓީއެއްގައި ވިޔަސް ސަޕޯޓަރުން ވައްދާފައި ކުޅެފައި، ދެ ވަނަ މެޗު މޮހާލީގައި ކުޅުމަށެވެ. އެކަމަކު، އެ ހުށަހެޅުންތަކަށް ރަސްމީ ފަރާތްތަކުން ޖަވާބެއް ދީފައިނުވެ އެވެ.
ދާދި ފަހުން އިންޑިއާ ގައުމީ ކްރިކެޓްގެ ހުރިހާ ފޯމެޓެއްގެ ޓީމުތަކުގެ ކެޕްޓަންކަން ވިރާތު ވަނީ ދޫކޮށްލައިފަ އެވެ. މީޑިއާތަކުން ރިޕޯޓްކުރާގޮތުގައި މިއީ ވިރާތަށް އިންޑިއާ ކްރިކެޓް ބޯޑުން ކުރިމަތިކުރަމުން އަންނަ ޕްރެޝަރުތަކުގެ ސަބަބުން އައި ނިންމުމެކެވެ.
އިންޑިއާ ކްރިކެޓް ޓީމުން މިހާރު ޓީ20 ސީރީސްއެއްގައި ލަންކާއާ ކުޅެމުން އަންނައިރު، ވިރާތު އެ މެޗުތަކުގައި ނުކުޅެ ހުރީ ބްރޭކެއް ނަގައިގެންނެވެ.
ޓެސްޓް ކްރިކެޓަށް ވިރާތު ނުކުތީ 2011 ވަނަ އަހަރު އެވެ. ވިރާތު ވަނީ 99 ޓެސްޓް މެޗުގައި 7962 ލަނޑު އެއްކޮށްފަ އެވެ. ސަތޭކަ ޓެސްޓް މެޗު ހަމަކޮށްފިނަމަ ވިރާތު ވެގެންދާނީ އެކަން ހާސިލްކުރާ އިންޑިއާގެ 11 ވަނަ ކުޅުންތެރިޔާ އަށެވެ. ޓެސްޓް ކްރިކެޓް މެޗު ކުޅުމުގެ ރެކޯޑް އޮތީ 200 މެޗު ހަމަކޮށް، 2013 ވަނަ އަަހަރު ކްރިކެޓުން ރިޓަޔާކުރި ލެޖެންޑަރީ ކުޅުންތެރިޔާ ސަޗިން ޓެންޑުލްކަރެވެ.
