ރަޝިއާ އާއި ޔޫކްރެއިންގެ މަންދޫބުން ބެލަރޫސްގައި މަޝްވަރާ ކުރަން ފަށައިފި އެވެ. މަޝްވަރާ ކުރިއަށް ދަނީ ޔޫކްރެއިނާއި ބެލަރޫސް ގުޅޭ ބޯޑަރު ކައިރީގަ އެވެ.
މަޝްވަރާ ބާއްވާ އިމާރާތް ތައްޔާރު ކުރުމުގެ ކުރިން ރަޝިއާގެ މަންދޫބުން ބެލަރޫސްއަށް ދިޔަ އެވެ. ބެލަރޫސް ފޮރިން މިނިސްޓްރީން އޭރު ބުނީ ދެ ގައުމުގެ މަންދޫބުން ހަމަވުމުން މަޝްވަރާ ފަށާނެ ކަމަށެވެ.
މަޝްވަރާ ކުރަން ތައްޔާރު ކުރުމަށް ފަހު ބެލަރޫސް ފޮރިން މިނިސްޓްރީން އާއްމު ކުރި ފޮޓޯއެއް.
ޔޫކްރެއިންގެ މަންދޫބުން ބެލަރޫސްއަށް ދިޔައީ ހޯމަ ދުވަހުގެ މެންދުރެވެ. ޔޫކްރެއިނުން ދެކޭ ގޮތުގައި މަޝްވަރާގެ އެޖެންޑާގައި ހިމެނޭ އެންމެ މުހިއްމު ކަމަކީ ހަމަލާތައް ހުއްޓުމާއި، ރަޝިއާ ސިފައިން ޔޫކްރެއިނުން ފޭބުމެވެ.
ޔޫކްރެއިން ވަފުދުގައި އިސްކޮށް ތިއްބެވީ ޑިފެންސް މިނިސްޓަރު އޮލެކްސީ ރެޒްނިކޯވް އާއި ވެރިކަން ކުރާ ޕާޓީގެ ލީޑަރު ޑޭވިޑް އަރަހާމިއާ އެވެ.
ބައެއް ރިޕޯޓުތައް ބުނާ ގޮތުން ލޮޖިސްޓިކްސް އާއި ސެކިއުރިޓީއާ ގުޅޭ ސަބަބުތަކާ ހެދި މަޝްވަރާ ފެށުނީ ވަރަށް ފަހަރު ފަސްކުރުމަށް ފަހު އެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވީ މަޝްވަރާއިން އެދެވޭ ނަތީޖާއެއް ފެންނާނެ ކަމަށް އުއްމީދު ނުކުރި ނަމަވެސް، ސުލްހައަށް ކުރެވެން ހުރި ހުރިހާ ކަމެއް ކުރާނެ ކަމަށެވެ.
ރަޝިއާގެ ފަރާތުން މަޝްވަރާގައި ބައިވެރިވާ މަންދޫބުން ބުނީ މަޝްވަރާއާ ބެހޭ ގޮތުން އެއްޗެއް ހާމަކުރާނީ ބައްދަލުވުން ނިންމުމަށް ފަހު ކަމަށެވެ.
