ރަޝިއާގެ ސިފައިން ޔޫކްރެއިނަށް ދޭ ހަމަލާތައް ލޯންޗު ކުރާ މަރުކަޒަކަށް ބެލަރޫސް ވެފައިވާ ދަނޑިވަޅެއްގައި އެ ގައުމުގައި ނިޔުކްލިއާ ހަތިޔާރު ބަހައްޓަން ނިންމައިފި އެވެ.
ރަޝިއާގެ ނިއުސް އެޖެންސީތަކުން ބެލަރޫސްގެ އިލެކްޝަންސް ކޮމިޝަނާ ހަވާލަދީ ބުނީ ނިޔުކްލިއާ ހަތިޔާރު ބަހައްޓަން ގާނޫނު އަސާސީއަށް ބަދަލު ގެންނަން ފެންނަ ކަމަށް 65.2 ޕަސެންޓު ރައްޔިތުން ބުނި ކަމަށެވެ.
އެކަމަށް އާއްމުންގެ ފެންނަ ނުފެންނަ ވޯޓަކަށް ހުޅުވާލުމުން ވޯޓުލެވޭ އާބާދީގެ 78.63 ޕަސެންޓު މީހުން ވޯޓުގައި ބައިވެރިވި ކަމަށް އެޖެންސީތަކުން ބުންޏެވެ.
ކުރީގެ ސޯވިއެޓް ޔޫނިއަން ނިމުމަކަށް އައުމާ އެކު ބެލަރޫސްއިން ވަނީ ނިޔުކްލިއާ ހަތިޔާރުތައް ރަޝިއާއާ ހަވާލުކޮށްފަ އެވެ. އެހެންކަމުން ހޯމަ ދުވަހުގެ ނިންމުމާ އެކު ސޯވިއެޓް ޒަމާނަށް ފަހު ފުރަތަމަ ފަހަރަށް ބެލަރޫސްގައި ނިޔުކްލިއާ ހަތިޔާރު ބަހައްޓާނެ ކަމަށް ބެލެވެ އެވެ.
ރަޝިއާގެ ރައީސް ލެޑިމިއަ ޕުޓިން އާއި ބެލަރޫސްގެ ރައީސް އެލެގްޒެންޑާ ލުކަޝެންކޯއާ ގާތް ގުޅުމެއް އޮންނަ އިރު، ޕުޓިން އާދީއްތަ ދުވަހު އެންގެވީ ރަޝިއާގެ ނިޔުކްލިއާ ފައުޖު ތައްޔާރީ ހާލަތަށް ގެނައުމަށެވެ.
އާދީއްތަ ދުވަހު ވޯޓުލާ މަރުކަޒެއްގެ ބޭރުގައި ހުންނަވައި ލުކަޝެންކޯ ވިދާޅުވީ ބެލަރޫސްގައި އަލުން ނިޔުކްލިއާ ހަތިޔާރު ބަހައްޓަން ޕުޓިންގެ އަރިހުގައި ދަންނަވަން ވިސްނަވާ ކަމަށެވެ.
"ހުޅަނގުން ނިޔުކްލިއާ ހަތިޔާރު ޕޮލޭންޑާއި ލިތުއޭނިއާ، އަޅުގަނޑުމެންގެ ބޯޑަރު ކައިރީގައި ބަހައްޓައިފި ނަމަ، ރައްދުގައި އަޅުގަނޑު ވެސް ޕުޓިން އަރިހުގައި އެދޭނަން އެއްވެސް ޝަރުތެއް ނެތި އަޅުގަނޑު ދޫކޮށްލި ނިޔުކްލިއާ ހަތިޔާރުތައް އަނބުރާ ހޯދަން."
ބެލަރޫސްގެ ގާނޫނު އަސާސީއަށް ބަދަލު ގެންނަން ނެގި ފެންނަ ނުފެންނަ ވޯޓުގެ ނަތީޖާއާ އެކު ލުކަޝެންކޯގެ 27 އަހަރުވީ ވެރިކަން 2035 ވަނަ އަހަރާ ހަމައަށް ދިގުދެންމުމަށް ފުރުސަތު ފަހިވެ އެވެ. އަދި މަގާމުން ވަކިވުމުން ވެސް ދުނިޔޭގައި ހުރިހާ ދުވަހަކު އެއްވެސް ދައުވާއެއް ނުކުރެވޭނެ އެވެ.
ހުޅަނގުން ބުނީ ހުދުމުހުތާރު ލީޑަރަކު ރައޔިތުންނަށް ބިރު ދައްކައިގެން ބާޢްވާ އިންތިހާބެއްގެ ނަތީޖާ ގަބޫލު ނުކުރާނެ ކަމަށެވެ.
ބެލަރޫސްގެ އިދިކޮޅު ވެރިން ފުރާނައަށް ބިރުން ގައުމު ދޫކޮށް ގޮސްފައިވާ އިރު، ލުކަޝެންކޯގެ އިސްތިއުފާއަށް ގޮވައި އާ އިންތިހާބަކަށް ޑިމާންކޮށް، މުޒާހަރާ ކުރި 35،000 އަށް ވުރެ ގިނަ މީހުން މިހާރު ވެސް ވަނީ ހައްޔަރުކޮށްފަ އެވެ.
