ރަޝިއާ އާއި ޔޫކްރެއިނާ ދެމެދު ކުރަމުންދާ ހަނގުރާމައިގެ ތެރެއިން ރަޝިއާއިން މިހާރު ވަނީ އެ ގައުމުގެ ނިޔުކްލިއާ ފައުޖު ތައްޔާރީ ހާލަތަށް ގެނެސްފަ އެވެ.
ޓީވީ މެދުވެރިކޮށް އާދީއްތަ ދުވަހު ދެއްވި ހިތާބެއްގައި ރަޝިއާގެ ރައީސް ލެޑިމިއަ ޕުޓިން ވިދާޅުވީ ރަޝިއާގެ ނިޔުކްލއާ "ޑެޓެރެންޓް ފައުޖު" އެންމެ މަތީ އެލާޓަށް ގެނެސް، ތައްޔާރީ ހާލަތުގައި ތިބި ކަމަށެވެ.
ތަޖުރިބާކާރުން ލަފާކުރާ ގޮތުގައި ރަޝިއާއިން އަބަދުވެސް ތައްޔާރީ ހާލަތުގައި 1،600 ނިޔުކްލިއާ ހަތިޔާރު ބަހައްޓަ އެވެ. އަދި ބޭނުން ޖެހިއްޖެ ނަމަ އެންމެ 10 މިނެޓު ތެރޭގައި އެފަދަ ހަތިޔާރު ލޯންޗު ކުރެވެ އެވެ.
ތިރީގައި އެ ވަނީ ނިޔުކްލިއާ ހަތިޔާރާ ގުޅޭ ގޮތުން އެނގުން މުހިއްމު ބައެއް މައުލޫމާތުތަކެވެ.
ނިޔުކްލިއާ ބޮމުގެ މައިގަނޑު ދެ ބާވަތެއްވެ އެވެ. އެއީ އެޓޮމިކް ބޮމާއި ހައިޑްރޮޖަން ބޮމެވެ. ދެ ބޮމުން ވެސް ގިނަ އަދަދެއްގެ ހަކަތަ ބޭރުކޮށް، ބޮޑު ގޮވުމެއް ގޮވަ އެވެ.
ދެ ވަނަ ބޮޑު ހަނގުރާމައިގައި 1945 ވަނަ އަހަރު އެމެރިކާއިން ޖަޕާނުގެ ހިރޯޝިމާ އާއި ނަގަޒާކީއަށް ވައްޓާލި ދެ ނިޔުކްލިއާ ބޮމުގެ ސަބަބުން 200،000 މީހުން މަރުވި އެވެ. އޭގެ ފަހުން ޒަމާނީ ނިޔުކްލިއާ ހަތިޔާރުތައް އުފައްދާފަ ވާތީ، އެއަށްވުރެ އެތައް ގުނައެއް ބާރުގަދަ ހަތިޔާރު މިހާރު އެބަ ހުއްޓެވެ.
ޖަޕާނުގެ ހިރޯޝިމާ އަދި ނަގަޒާކީއަށް ނިޔުކްލިއާ ބޮން އެޅުމުން ގޮވި ގޮވުން.
އެންމެ ބާރުގަދަ ނިޔުކްލިއާ ހަތިޔާރެއް މިހާތަނަށް ޓެސްޓު ކުރީ ސޯވިއެޓް ޔޫނިއަންއިން 1961 ވަނަ އަހަރު އެވެ. "ޒާ ބޮމްބާ"ގެ ނަން ދީފައިވާ އެ ނިޔުކްލިއާ ބޮމުގެ ބާރުގައި 50 މިލިއަން ޓަނުގެ ޓީއެންޓީ ހިމެނެ އެވެ. އެއީ ހިރޯޝިމާ އާއި ނަގަޒާކީއަށް ވައްޓާލި ބޮންތަކަށް ވުރެ 3000 ގުނަ ބާރުގަދަ ބޮމެކެވެ.
ދުނިޔޭގެ ތާރީހުގައި ހަނގުރާމައިގެ މައިދާނުގައި ނިޔުކްލިއާ ހަތިޔާރު ބޭނުން ކުރީ އެންމެ ދެ ފަހަރު ނަމަވެސް، އޭގެ ފަހުން 2،000 އަށް ވުރެ ނިޔުކްލިއާ ހަތިޔާރު ޓެސްޓުކޮށްފައިވެ އެވެ. ބައެއް ޓެސްޓުތައް ކުރީ ބިމުން މަތީގައި ކަމަށް ވާތީ ޖައްވުގެ ތެރެއަށް ރޭޑިއޭޝަން ބޭރުވެ، ދުނިޔޭގެ ބައެއް ހިސާބުތަކަކީ އާޢްމުންނަށް ދިރިއުނޫޅެވޭ ވަރަށް ތަގައްޔަރުވެ، ފުރާނައަށް ނުރައްކާ ހިސާބުތަކެވެ.
ނިޔުކްލިއާ ހަމަލާއަކާ ދެކޮޅަށް ދިފާއުވެވޭނެ ގޮތެއް ނޯވެ އެވެ. އޭގެ ބަދަލުގައި ދައުލަތްތަކުން ގެންގުޅޭ ސިޔާސަތަކީ "މިޔުޗުއަލީ އެޝުއާޑް ޑިސްޓްރަކްޝަން ނުވަތަ މޭޑް" އެވެ. އެއީ ނިޔުކްލިއާ ހަމަލާއެއް ދީފި ނަމަ ރައްދުގައި އެފަދަ ހަމަލާއެއް ދިނުމުގެ އިންޒާރެވެ. އެއީ އެކަކު އަނެކަކުގެ ބޮލުގައި ބަޑި ޖައްސައިގެން ތިބުން ފަދަ ހާލަތެކެވެ.
ކަޒަކިސްތާނުގެ މި ސައިޓަކީ ސޯވިއެޓް ޔޫނިއަންއިން ނިޔުކްލިއާ ހަތިޔާރު ޓެސްޓު ކުރުމުން ދިރޭ ތަކެއްޗަށް ނުރައްކާތެރި މިންވަރަށް ޖައްވުގައި ރޭޑިއޭޝަން ހިމެނޭ ތަނެއް.
ދުނިޔޭގެ ކޮންމެ ގައުމަކަށް ވެސް ނިޔުކްލިއާ ހަތިޔާރެއް ފޮނުވުމުގެ ގާބިލްކަން ލިބިފައި ވަނީ ފަސް ގައުމަކަށެވެ. އެއީ ޗައިނާ، ފްރާންސް، ޔޫކޭ، އެމެރިކާ، އަދި ޜަޝިއާ އެވެ.
އިންޑިއާ، ޕާކިސްތާން، އުތުރު ކޮރެއާގައި ވެސް ނިޔުކްލިއާ ހަތިޔާރު އެބަ ހުރި ކަމަށް އެ ގައުމުތަކުން ބުނެ އެވެ. އޭގެ އިތުރުން ސައުދީ އަރަބިއްޔާ، އިރާން، އިޒްރޭލް، ދެކުނު ކޮރެއާ އަދި ޓައިވާނުގައި ވެސް ނިޔުކްލިއާ ހަތިޔާރު ހުރި ކަމަށް ބެލެވެ އެވެ.
ދުނިޔޭގެ އެންމެ ގިނަ ނިޔުކްލިއާ ހަތިޔާރު ހުރީ ރަޝިއާގަ އެވެ. ޔޫކްރެއިންގައި ނިޔުކްލިއާ ހަތިޔާރު ނެތް ނަމަވެސް، ޔޫކްރެއިންގެ އެކުވެރި އެމެރިކާގައި ބޮޑު ސްޓޮކެއް އޮވެ އެވެ. އޭގެ އިތުރުން ޔޫކްރެއިނަށް އެހީވަމުންދާ ހުޅަނގުގެ ފްރާންސާއި ޔޫކޭގެ ވެސް ނިޔުކްލިއާ ހަތިޔާރުގެ ސްޓޮކެއް އެބަ ހުއްޓެވެ.
