ސުޕްރީމް ކޯޓުން ނިންމާފައިވާ ގިނަ ނިންމުންތަކެއް އުވައިލެވޭ ގޮތަށް، ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލަކާ މެދު މާފަންނު އުތުރު ދާއިރާގެ އެމްޑީޕީ މެމްބަރު އިމްތިޔާޒް ފަހުމީ (އިންތި) ކަންބޮޑުވުން ފާޅުކުރައްވައިފި އެވެ.
ކޯޓްތަކާ ބެހޭ ގާނޫނަށް ބަދަލުތަކެއް ގެންނަން ސަރުކާރުގެ ފަރާތުން މަތިވެރި ދާއިރާގެ އެމްޑީޕީ މެމްބަރު ހަސަން ޒަރީރު ހުށަހަޅުއްވާފައިވާ ބިލަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި އިންތި ވިދާޅުވީ ސުޕްރީމް ކޯޓްގެ ނިންމުންތައް އުވައިލެވޭނީ ހަމަ އެ ކޯޓަށް ކަމަށެވެ. އޭނާ ވިދާޅުވީ ގާނޫނެއް ލިޔެގެން ސުޕްރީމް ކޯޓްގެ ނިންމުމެއް އުވައިލެވޭނެކަމާ މެދު ސުވާލު އުފެދޭ ކަމަށެވެ.
މެމްބަރު ޒަރީރު ހުށަހެޅުއްވި ބިލުގެ (14) ވަނަ މާއްދާގައި އޮތީ އެ މާއްދާގައި ބުނާ، ސުޕްރީމް ކޯޓްގެ ނިންމުންތަކާއި ގަރާރުތަކާއި ގަވައިދުތަކާއި ސާކިއުލާތަކާއި އާއްމު ސިޓީތައް، އެ ބިލު ގާނޫނަކަށްވުމުން އުވޭނެ ކަމަށެވެ. އެ މާއްދާގައި ދެން އޮތީ އުވައިލެވޭނެ ނިންމުންތަކުގެ ލިސްޓެކެވެ.
"މިއީ ސުވާލު އުފެދޭ ކަމެއްގެ ގޮތުގައި އަޅުގަނޑު ދެކެން. ސުޕްރީމް ކޯޓެއްގެ ރޫލިންއެއް އަޅުގަނޑު ހިތުން، ބާތިލުކުރަން ޖެހޭނީ ހަމަ ސުޕްރީމް ކޯޓުން. ގާނޫނެއް އަޅުގަނޑުމެން ލިޔެގެން ރޫލިން އެއް ބާތިލުކުރެެވިދާނެތޯ އެއީ އަޅުގަނޑު ސުވާލު އުފައްދާ ކަމެއް،" އިންތި ވިދާޅުވި އެވެ.
އޭނާ ވިދާޅުވީ އެހެން ނަމަވެސް އެ ބިލުގައިވާ ލިސްޓްގައިވާ އެހެން ބައިތައް ގާނޫނަކުން އުވައިލެވިދާނެ ކަމަށެވެ. އޭނާ ވިދާޅުވީ ސުޕްރީމް ކޯޓުން ނެރެފައިވާ ބައެއް ރޫލިންތައް އެކޯޓުން ފަހުން އުވާލައިފައި އެބަހުރި ކަމަށާއި އެގޮތަށް އަމަލުކުރެވިދާނެ ކަމަށެވެ.
ކޯޓްތަކާ ބެހޭ ގާނޫނަށް ބަދަލުތައް ގެންނަން ހުށަހެޅި ބިލުގައިވާ އެހެން ބައެއް ކަންތައްތަކަށް ވެސް އޭނާ ފާޑުވިދާޅުވި އެވެ. ބައެއް އެހެން ގާނޫނުތަކުގައި މިހާރު ވެސް ހުރި މަފްހޫމްތައް އެ ބިލުގައި ހިމަނައި، ރިޕީޓްވާ ގޮތަށް އޮތް ތުން އޭގެ ތެރޭގައި ހިމެނެ އެވެ.
