ރަޝިއާގެ ހަމަލާއެއްގައި ދުނިޔޭގެ އެންމެ ބޮޑު ވައިގެ އުޅަނދު، އެންޓޮނޯވް އޭއެން-225 އަށް ގެއްލުންވެފައިވާ ކަމަށް ޔޫކްރެއިނުން ބުނެފި އެވެ.
ޔޫކްރެއިންގެ ފޮރިން މިނިސްޓަރު ޑިމިޓްރޯ ކުލެބާގެ ޓްވީޓެއްގައި ވިދާޅުވީ "މްރިޔާ" ސުންނާފަތިކޮށްލި ނަމަވެސް، މިނިވަން، ޑިމޮކްރެޓިކް ދަައުލަތެއް ހޯދުމަށް ދެކޭ ހުވަފެން ސުންނާފަތި ނުކުރެވޭނެ ކަމަށެވެ.
އެންޓޮނޯވް އޭއެން-225 އަށް ދީފައިވާ ނަމަކީ "މްރިޔާ" އެވެ. ޔޫކްރެއިން ބަހުން އެ ނަމުގެ މާނައަކީ ހުވަފެނެވެ. އެ ބޯޓަކީ ސޯވިއެޓް ޔޫނިއަންގެ ފަހު ދުވަސްވަރު ޑިޒައިންކޮށް ބިނާކުރި އެއްޗެކެވެ.
އެއީ ޖައްވަށް ދަތުރު ކުރާ ކުދި އުޅަނދުތައް އުފުލުމަށް އުފެއްދި ބޯޓެކެވެ. ނަމަވެސް ފަހަކަށް އައިސް އެ ބޯޓު ބޭނުން ކުރަނީ ވަރަށް މަދުންނެވެ.
ކުލެބާ ވިދާޅުވީ އެ ބޯޓަށް ގެއްލުންވީ ޔޫކްރެއިންގެ ވެރިރަށް ކިޔެވް ކައިރީގައި އޮންނަ ހޮސްޓޮމެލް އެއާޕޯޓަށް ރަޝިއާއިން ދިން ހަމަލާއެއްގައި ކަމަށެވެ.
