ކިޔެވް، ޔޫކްރެއިން (ފެބްރުއަރީ 27) - ރަޝިއާއާ އެކު މަޝްވަރާ ކުރަން ތައްޔާރު ނަމަވެސް، އެކަމުން އެދެވޭ ނަތީޖާއެއް ފެންނާނެ ކަމުގެ އުއްމީދެއް ނެތް ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ރަޝިއާ ސިފައިން ޔޫކްރެއިނަށް އަރައި ހަމަލާދޭތާ ހަތަރު ވަނައަށް ވީ ދުވަހު ރަޝިއާއިން ބުނީ އެ ގައުމުގެ ވަފުދެއް މަޝްވަރާ ފެށުމަށް ބެލަރޫސްއަށް ގޮސްފައިވާ ކަމަށެވެ. ބައްދަލުވުން އޮންނާނީ ބެލަރޫސް އާއީ ޔޫކްރެއިން ގުޅޭ ބޯޑަރު ކައިރީގަ އެވެ.
"އަބަދުވެސް އަޅުގަނޑު ދަންނަވާ ގޮތަށް ވަރަށް ސީދާކޮށް މި ދަންނަވަނީ. މި ބައްދަލުވުން ނަތީޖާއެއް ފެންނާނެ ކަމަށް އަޅުގަނޑު ގަބޫލެއް ނުކުރަން. އެކަމަކު ވާ ގޮތެއް ބަލަމާ ހިނގާ،" ވީޑިއޯ މެދުވެރިކޮށް ޒެލެންސްކީ ވިދާޅުވި އެވެ.
އޭނާ ވިދާޅުވީ ހަނގުރާމަ ނިންމަން ފުރުސަތެއް އޮތް ނަމަ، މަޝްވަރާގައި ބައިވެރިވާން ޖެހޭނެ ކަމަށެވެ. ޒެލެންސްކީ އެ ވީޑިއޯ އާއްމު ކުރެއްވީ ރަޝިއާއާ ގާތް ގުޅުމެއް އޮންނަ ބެލަރޫސްގެ ލީޑަރު އެލެގްޒެންޑާ ލުކަޝެންކޯއާ ފޯނުން ވާހަކަ ދެއްކެވުމަށް ފަހު އެވެ.
ޔޫކްރެއިންގެ އެކި ދިމާލުން ރަޝިއާ ސިފައިން ހަމަލާދެމުންދާ އިރު، ބެލަރޫސްގެ ފަސްގަނޑު ބޭނުންކޮށްގެން ޔޫކްރެއިނަށް ހަމަލާދީފައި ވާތީ، ޒެލެންސްކީ މީގެ ކުރިން ނުރުހުން ފާޅުކުރެއްވި އެވެ. އަދި ބެލަރޫސްގައި މަޝްވަރާ ބާއްވާ ނަމަ ބައިވެރި ނުވާނެ ކަމަށް ވިދާޅުވި އެވެ.
ނަމަވެސް ޒެލެންސްކީ ފަހުން ވިދާޅުވީ ޔޫކްރެއިނާއި ބެލަރޫސް ގުޅޭ ބޯޑަރު ކައިރީގައި އޮންނަ ޕްރިޕްޔަތް ކޯރު ކައިރީގައި ބައްދަލުވުން ބާއްވަން މައްސަލައެއް ނެތް ކަމަށެވެ. ބެލަރޫސްއިން ބުނީ ބައްދަލުވުން އޮންނާނީ އެލެކްސަންޑްރޮވްކާ އަދި ވިލްޗާ ބޯޑަރު ޗެކްޕޮއިންޓުގައި ކަމަށެވެ.
