ކިޔެވް، ޔޫކްރެއިން (ފެބްރުއަރީ 27) - ޔޫކްރެއިންގެ ދެ ވަނައަށް އެންމެ ބޮޑު ސިޓީ ހާރްކީވްގެ މަގުތަކަށް ރަޝިއާ ސިފައިން ފޯރުމާ އެކު ބަޑީގެ ވަރުގަދަ ހަމަލާތައް ބަދަލު ކުރަން ފަށައިފި އެވެ.
"ރަޝިއާ ދުޝްމަނުންގެ ކުދި އުޅަނދުތައް ހާރްކީވް ސިޓީގެ ތެރެއަށް ވަދެއްޖެ،" ހާރްކީވް ސަރަހައްދީ އޮފީހުގެ ވެރިޔާ އޯލެގް ސިނެގުބޯވް ފޭސްބުކްގައި ކުރި ޕޯސްޓެއްގައި ވިދާޅުވި އެވެ.
"ޔޫކްރެއިންގެ ސިފައިން ދަނީ ދުޝްމަނުން ނައްތާލުމުގެ މަސައްކަތް ކުރަމުން."
ހަނގުރާމައިގައި ހާރްކީވްގެ ހާލަތު ގޯސްވަމުންދާ އިރު، އެ ތަނުގެ ބިމު އަޑީގެ މެޓްރޯ ސްޓޭޝަނެއްގައި ފަސް ދިވެހިން ތާށިވެފައި އެބަ ތިއްބެވެ.
އެ މީހުން ހުކުރު ދުވަހު ނެރުނު ބަޔާނެއްގައި ބުނީ ރަޝިއާގެ ބޯޑަރު ކައިރީގައި އޮންނަ އެ ސިޓީއިން ނުކުމެވޭނެ ރައްކާތެރި ގޮތެއް ހޯދުމަށް ކޮންމެ ދުވަހަކު ވެސް މަސައްކަތްކުރާ ކަމަށާއި ނަމަވެސް އަދި އެ ސިޓީން ނުކުމެވޭނެ ގޮތެއް ނެތް ކަމަށެވެ. އަދި ކޮންމެ ދުވަހަކު ވެސް ބޮމުގެ ހަމަލާތަކުގެ އަޑުއިވޭ ކަމަށް ވެސް ބުންޏެވެ.
ހާރްކީވްގެ މަގުތަކުގައި ރަޝިއާ އާއި ޔޫކްރެއިންގެ ސިފައިން ހަމަލާ ބަދަލުކުރަމުން ދާއިރު، 400 ކިލޯމީޓަރު ހުޅަނގުން އޮންނަ ވެރިރަށް ކިޔެވް އަދިވެސް އޮތީ ޔޫކްރެއިން ސިފައިންގެ ކޮންޓްރޯލްގެ ދަށުގަ އެވެ. އެކަމަކު އެ ސިޓީއަށް ވަނުމަށް ވެސް ރަޝިއާ ސިފައިން ދަނީ މެދުކެނޑުމެއް ނެތި މަސައްކަތް ކުރަމުންނެވެ.
ރަޝިއާގެ ޑިފެންސް މިނިސްޓްރީން އާދީއްތަ ދުވަހު ބުނީ ދެކުނުގައި އޮންނަ ހާސަން ސިޓީ އާއި އިރުދެކުނުގައި އޮންނަ ބާޑްޔާންސްކް ސިޓީ ވެސް ހިފާފައިވާ ކަމަށެވެ.
"ފާއިތުވި 24 ގަޑިއިރުގެ ތެރޭގައި ހާސަން ސިޓީ އާއި ބާޑްޔާންސް ސިޓީ ރަޝިއާ ސިފައިންގެ ފުރިހަމަ ބާރުގެ ދަށަށް ވަނީ ގެނެސްފައި،" އެ މިނިސްޓްރީގެ ތަރުޖަމާނު އައިގޯރް ކޮނަޝެންކޯވްގެ ބަޔާނެއް މެދުވެރިކޮށް ވިދާޅުވި އެވެ.
އޭގެ އިތުރުން އަޒޯވް ކަނޑުގެ އައްސޭރިފަށުގައިވާ ގެނިޗެސްކް ޕޯޓް ސިޓީ އާއި ހާސަން ކައިރީގައިވާ އެއާފީލްޑެއް ވެސް ރަޝިއާއިން ހިފާފައިވާ ކަމަށް އޭނާ ވިދާޅުވި އެވެ.
ރަޝިއާ ސިފައިން ބުނީ ޔޫކްރެއިންގެ 975 އަސްކަރީ ފެސިލިޓީ އާއި އަށް ފައިޓާ ޖެޓާއި، ހަތް ހެލިކޮޕްޓަރު އަދި 11 ޑްރޯން އާދީއްތަ ދުވަހާ ހަމައަށް ގޮއްވާލާފައިވާ ކަމަށެވެ.
ކޮނަޝެންކޯވް ވިދާޅުވި ގޮތުގައި ޔޫކްރެއިންގެ ސިފައިން ދަނީ "ބޮޑެތި އަދަދުތަކުން" ހަތިޔާރު ބަހައްޓައި އަމާންދެމުންނެވެ.
އެގޮތުން ހޮނިހިރު ދުވަހު ހާރްކީވް ކައިރީގައިވާ އެއާ ޑިފެންސް މިސައިލް ސިސްޓަމެއް ބަލަހައްޓާ ސިފައިން އަމިއްލައަށް ހަތިޔާރު ބެހެއްޓި ކަމަށާއި މިހާތަނަށް 470 އަށް ވުރެ ގިނަ ސިފައިން ހައްޔަރުކޮށްފައިވާ ކަމަށް ވިދާޅުވި އެވެ.
ނަމަވެސް ރަޝިއާގެ ވާހަކަތައް ރަސްމީ އެހެން އެއްވެސް ފަރާތަކުން ކަށަވަރުކޮށްދީފައެއް ނުވެ އެވެ.
އަދި ޔޫކްރެއިނުން ތަކުރާރުކޮށް ބުނަމުން ދަނީ މި ހަނގުރާމައިގައި ރަޝިއާގެ ގިނަ ސިފައިންތަކެއް މަރުވެ، ބޮޑެތި ގެއްލުންތަކެއް ވަމުންދާ ކަމަށެވެ.
