ރަޝިއާގެ ދިދައާ އެކު ދަތުރު ކުރަމުން ދިޔަ މުދާ އުފުލާ ބޯޓެއް ފްރާންސުން ހިފަހައްޓައިފި އެވެ.
ބޯލްޓިކް ލީޑާ ބޯޓު ދަތުރު ކުރަމުން ދިޔައީ ފްރާންސްގެ ހުޅަނގު އުތުރުން ރަޝިއާގެ ސެއިންޓް ޕީޓާޒްބާގް އަށެވެ. އޭގައި ހުރީ ކާރުގެ ޝިޕްމަންޓެކެވެ.
ރަޝިއާގެ ދައުލަތުގެ މީޑިއާއިން ބުނީ އެ ބޯޓަކީ އީޔޫ އާއި އެމެރިކާއިން އެޅި ދަތިކުރުމުގެ ފިޔަވަޅުތަކުން ޓާގެޓުކޮށްފައިވާ ބޭންކެއްގެ ސަބްސިޑަޔަރީ ކުންފުންޏެއްގެ ބޯޓެއް ކަމަށެވެ.
ފްރާންސްގެ އޮފިޝަލަކު ބުނީ ބޯޓެއް ހިފެހެއްޓުން ފަދަ ފިޔަވަޅު އަޅާ މަންޒަރު ފެންނަނީ މަދުން ކަމަށާއި މިއީ ޔޫކްރެއިން މައްސަލައިގައި ގައުމުތަކުގެ ވިސްނުން ހުރި ގޮތުގެ ބާރު ދައްކުވައިދޭ ކަމެއް ކަމަށެވެ.
ބޯޓު ހިފެހެއްޓުމުން ރަޝިއާގެ ބޭންކުން ބުނީ ދަތިކުރުމުގެ ފިޔަވަޅު އެޅުމުގެ ކުރިން އެހެން ބަޔަކަށް އެ ބޯޓު ވިއްކާލި ކަމަށެވެ. އެހެންކަމުން ފްރާންސުން ދަނީ އެ ވާހަކަ ޔަގީން ކުރުމުގެ މަސައްކަތް ކުރަމުންނެވެ.
އެ މަސައްކަތަށް 48 ގަޑިއިރު ނަގާނެ ކަމަށް ލަފާކޮށްފައިވެ އެވެ. ޕެރިހުގައި ހުންނަ ރަޝިއާގެ އެމްބަސީން ބުނީ އެކަމާ މެދު ނުރުހުން ފާޅުކޮށް ފްރާންސްގެ ފޮރިން މިނިސްޓްރީއަށް ލިޔުމެއް ފޮނުވާނެ ކަމަށެވެ.
