އދ.، އެމެރިކާ (ފެބްރުއަރީ 26) - ރަޝިއާގެ ސިފައިން ޔޫކްރެއިނަށް ފޮނުވައިގެން ދެމުންދާ ހަމަލާތަކާ ދެކޮޅަށް އދ. ގެ ސަލާމަތީ މަޖިލީހުން ފާސްކުރި ގަރާރު ރަޝިއާއިން ވީޓޯ ކުރި އިރު، ތިން ގައުމަކުން ވަކި ކޮޅަކަށް ވޯޓު ނުދޭން ނިންމައިފި އެވެ.
ސަލާމަތީ މަޖިލީހުގެ 15 މެމްބަރުންގެ ތެރެއިން 11 މެމްބަރުން އެ ގަރާރަށް ތާއީދު ކުރި އެވެ. ގަރާރު ތައްޔާރު ކުރީ އެމެރިކާ އާއި އަލްބޭނިއާ އިންނެވެ. ވަކި ކޮޅަކަށް ވޯޓު ނުދޭން ނިންމި ގައުމުތަކަކީ ޗައިނާ، އިންޑިއާ އަދި ޔޫއޭއީ އެވެ.
ސަލާމަތީ މަޖިލީހުގެ ދާއިމީ މެމްބަރެއްގެ ގޮތުގައި ހިމެނޭ ރަޝިއާއަށް ވީޓޯ ކުރުމުގެ ބާރު އޮތުމާ އެކު ގަރާރު ތައްޔާރު ކުރި އިރު ވެސް ފެއިލްވާނެކަން އެނގެ އެވެ. ނަމަވެސް ގަރާރަށް ބަހުސް ކުރަން ލިބުނު ފުރުސަތުގައި ގައުމުތަކުގެ ހިތްހަމަނުޖެހުން ފާޅުކުރަން ލިބުނެވެ.
"ރަޝިއާއަށް މި ގަރާރު ވީޓޯ ކުރެވިދާނެ، އެކަމަކު އަޅުގަނޑުމެންގެ އަޑުތައް ވީޓޯއެއް ނުކުރެވޭނެ. ހަގީގަތެއްގެ ވީޓޯއެއް ނުކުރެވޭނެ. އަޅުގަނޑުމެން ގަބޫލު ކުރާ އުސޫލުތަކާއި ޔޫކްރެއިން ރައްޔިތުން ވީޓޯއެއް ނުކުރެވޭނެ،" އެމެރިކާގެ މަންދޫބު ލިންޑާ ތޯމަސް-ގްރީންފީލްޑް ވިދާޅުވި އެވެ.
ވޯޓަށް އެހުމުގެ ކުރިން ގަރާރުގައި ބޭނުންކޮށްފައި ހުރި ބައެއް ޖުމްލަތަކާއި ބަސްތަކަށް ބަދަލު ގެނަ އެވެ. އެއީ ގިނަ ގައުމުތަކުގެ ތާއީދު ހޯދުމަށެވެ. އެގޮތުން ސުލްހަ އަނބުރާ ގެނައުމަށް އދ. ގެ މެމްބަރުންނަށް އަސްކަރީ ފިޔަވަޅު އެޅޭނެ ކަމަށް އދ. ގެ ޗާޓަރުގައި ބުނާ މާއްދާ ގަރާރުން އުނިކުރި އެވެ.
ގަރާރުގައި ބުނީ ޔޫކްރެއިންގެ އިސްތިގްލާލް ބަލައިގަންނަ ކަމަށާއި ރަޝިއާއިން ޔޫކްރެއިނަށް ދެމުންދާ ހަމަލާތައް ވަގުތުން ހުއްޓާލަން ގޮވާލާ ކަމަށެވެ. އދ. ގެ މެމްބަރު 70 އަށް ވުރެ ގިނަ ގައުމުން އެ ގަރާރު ކޯ-ސްޕޮންސާ ކުރި އެވެ.
ރަޝިއާގެ މަންދޫބު ވަސިލީ ނެބެންޒިއާ ވިދާޅުވީ ގަރާރަކީ ރަޝިއާ އަދި ޔޫކްރެއިނާ ވެސް ދެކޮޅު ގަރާރެއް ކަމަށެވެ.
"ގައުމުތަކަށް އަރައި ހަމަލާ ދިނުމުގައި އަޅުގަނޑުމެންނަށް އެމެރިކާއާ ވާދަކުރަން އުނދަގޫ. އެހެންވީމާ، މި ކަމުގައި ރަނގަޅު ގޮތަކީ މިއީ އޭ ބުނުމުގެ އެއްވެސް ހައްގެއް އެމެރިކާއަކަށް ނެތް."
ޔޫކްރެއިންގެ މަންދޫބު ސާގީ ކިސްލިސްޓާ އެދިވަޑާއިގެންނެވީ ހުރިހާ ގައުމަކުން ވެސް ސުލްހައަށް އެދި ދުއާ ކުރުމަށެވެ.
"ރަޝިއާއިން ބޭނުންވަނީ ހިޓްލަރުގެ ނާޒީ ޕާޓީގެ އަމަލުތަކާ އެއް ގޮތަށް ކުރިއަށް ދާން."
ޗައިނާގެ މަންދޫބު ޒާންގް ޖުންގެ ވާހަކައިގައި މަސައްކަތް ކުރެއްވީ ވަކި ކޮޅަކަށް ވޯޓު ނުދޭން ނިންމި ސަބަބު ސާފުކޮށްދިނުމަށެވެ.
"ރަޝިއާއިން ކަންބޮޑުވާ ސަލާމަތީ މައްސަލަތަކަށް ސަމާލުކަންދީ އެ ކަންކަމާ މެދު ފުރިހަމައަށް އަމަލު ކުރަން ޖެހޭ."
ބެލެވޭ ގޮތުގައި އދ. ގެ މެމްބަރު 193 ގައުމު ހިމެނޭ އާއްމު މަޖިލީހުގައި ވެސް ރަޝިއާއާ ދެކޮޅު ގަރާރަަށް ވޯޓަށް އަހާނެ އެވެ. އެ ގަރާރު ވީޓޯ ކުރުމުގެ ބާރު ރަޝިއާއަށް ނެތުމާ އެކު، ހަނި ގޮތަކަށް ފާސްވުމުގެ ފުރުސަތު އެބަ އޮތެވެ. ނަމަވެސް އެއީ ގާނޫނީ ގޮތުން އަމަލު ކުރުން މަޖުބޫރު ގަރާރެއް ނޫނެވެ.
މީގެ ކުރިން 2014 ވަނަ އަހަރު ރަޝިއާއިން ކްރައިމިއާ ހިފުމުން ވެސް އާއްމު މަޖިލީހުން އެފަދަ ގަރާރަކަށް ވޯޓަށް އެހި އެވެ. އެ ފަހަރު ރަޝިއާއާ ދެކޮޅަށް 100 ގައުމުން ވޯޓު ދިނެވެ.
