ރަޝިއާއާ ދެކޮޅަށް ހަނގުރާމަ ކުރަމުންދާ ޔޫކްރެއިނަށް އެހީވުމުގެ ގޮތުން ޔޫރަޕުގެ ގައުމުތަކުން ކުރާ މަސައްކަތް އިތުރުކޮށްދޭން ރައީސް ވޮލޮޑިމިރް ޒެލެންސްކީ އެދިވަޑައިގެންފި އެވެ.
ބުރާސްފަތި ދުވަހުގެ ފަތިހު ރަޝިއާއިން ހަމަލާ ދޭން ފެށުމުން ޔޫކްރެއިނުން ވެސް ދިފާއުގައި ހަމަލާދެމުންދާ އިރު، ހުކުރު ދުވަހު އަސްކަރީ ޓޭންކުތައް ވެރިރަށް ކިޔެވްއަށް އެތެރެވި އެވެ.
ޔޫކްރެއިންގެ އޮފިޝަލުން ބުނީ ހަނގުރާމައިގައި ވޮލަންޓިއަރުންގެ ގޮތުގައި ބައިވެރިވާން ބޭނުންވާ ރައްޔިތުންނަށް 18،000 ބަޑި ބަހާފައިވާ ކަމަށެވެ. އޭގެ އިތުރުން ޕެޓްރޯލް ބޮން ހަދާނެ ގޮތުގެ އިރުޝާރު ވެސް ސަރުކާރުން ވަނީ އާއްމުންނަށް ދީފަ އެވެ.
ރަޝިއާއިން ކިޔެވް ހިފުމަށް މަސައްކަތް ކުރަމުންދާ އިރު، ޔޫކްރެއިންގެ އުތުރާއި، ދެކުނާއި، އިރުމަތިން ދެމުންދާ ހަމަލާތައް ވެސް ހުއްޓުމެއް ނެތި ދަނީ ކުރިއަށެވެ.
ދެ ވަނައަށް އެންމެ ބޮޑު ސިޓީ ހާރްކީވްގައި ހުކުރު ދުވަހު ވެސް ބޮޑެތި ގޮވުންތަކުގެ އަޑު އިވުނު އިރު، ޔޫކްރެއިނުން ބުނީ ރަޝިއާ ސިފައިން އެ ސިޓީއަށް ވަންނަން ކުރާ މަސައްކަތަށް ހުރަސް އަޅަމުންދާ ކަމަށެވެ.
އަޒޯވް ކަނޑުގެ އައްސޭރިފަށުގައި އޮންނަ މުހިއްމު ސިޓީއެއް ކަމަށްވާ މަރިޔުޕޯލް އަށް ރަޝިއާގެ ސިފައިން ދަނީ ވަންނަން މަސައްކަތް ކުރަމުންނެވެ.
އޭގެ އިތުރުން ޒްމީނީ ރަށުގައި ތިބި 13 ސިފައިން ރަޝިއާގެ އަސްކަރީ މަނަވަރެއްގެ އެންގުމާ އެއް ގޮތަށް އަމާން ދޭން ދެކޮޅު ހެދުމުން، ބޮން އަޅާ މަރާލާފައިވާ އިރު، އެ މީހުންނަށް ގައުމީ ބަތަލުންގެ ލަގަބު ދޭން ވަނީ ނިންމާފަ އެވެ.
ޔޫކްރެއިނުން ބުނީ ސިފައިންނާއި އާއްމުން ހިމެނޭ ގޮތަށް ޖުމްލަ 137 މީހުން މަރުވެފައިވާ ކަމަށެވެ. ރަޝިއާގެ ފަޅިން އެއްވެސް މީހަކު މަރުވިކަން އިއުލާނުކޮށްފައެއް ނުވެ އެވެ.
ބެލެވޭ ގޮތުގައި 100،000 އަށް ވުރެ ގިނަ މީހުން ގެތައް ދޫކޮށް ވަނީ ރައްކާތެރި ހިސާބުތަކަށް މިސްރާބު ޖަހާފަ އެވެ.
އެމެރިކާ އާއި އިނގިރޭސިވިލާތް އަދި އީޔޫއިން ރަޝިއާއާ ދެކޮޅަށް ފިޔަވަޅުތައް އެޅި ނަމަވެސް، ބައިނަލްއަގްވާމީ ބޭންކިން ނިޒާމް، ސްވިފްޓުން ރަޝިއާ ވަކިކުރުމަށް ނިންމާފައެއް ނުވެ އެވެ.
ނަމަވެސް ޔޫކްރެއިންގެ ރައީސް ޒެލެންސްކީ ވިދާޅުވީ ހުޅަނގުގެ ގައުމުތަކުން އިތުރު ކަންކަން ކުރަން ޖެހޭ ކަމަށާއި ވަކިން ހާއްސަކޮށް ކައިރީގައި ޔޫރަޕްގެ ގައުމުތަކުން ލަސްނުކޮށް އަމަލު ކުރަން ޖެހޭ ކަމަށެވެ.
"މި އަނިޔާވެރިކަން ހުއްޓުވަން ބޭނުންވާ ބާރު ޔޫރަޕުގެ އަތުގައި އެބަ އޮތް."
ޒެލެންސްކީ ވިދާޅުވީ ރަޝިއާއާ ދެކޮޅަށް އެޅެން ހުރި ހުރިހާ ފިޔަވަޅަކާ މެދު ވިސްނަން ޖެހޭ ކަމަށާއި އޭގެ ތެރޭގައި ސްވިފްޓުން ވަކި ކުރުމާއި، ވިސާ ނުދިނުމާއި، ވައިގެ ސަރަހައްދު ބަންދު ކުރުން ހިމެނޭ ކަމަށެވެ.
ޔޫރަޕްގެ އެހީ އިތުރު ކުރަން ޒެލެންސްކީ ގޮވާލައްވާފައިވާ އިރު، ރަޝިއާއިން ވަނީ މަޝްވަރާ ކުރަން ފުރަތަމަ ފަހަރަށް ޔޫކްރެއިނަށް ހުށަހަޅާފަ އެވެ.
