މޮސްކޯ، ރަޝިއާ (ފެބްރުއަރީ 25) - ޔޫކްރެއިންގެ ވެރިންނަކީ "ޓެރަރިސްޓުންނާއި ނާޒީންނާއި މަސްތުވާތަކެއްޗަށް ދެވިހިފާފައިވާ ގޭންގެއްގެ" ގޮތުގައި ސިފަކުރެއްވުމަށް ފަހު، ސަރުކާރު ވައްޓާލުމަށް އެ ގައުމުގެ ސިފައިންނަށް ރަޝިއާގެ ރައީސް ލެޑިމިއަ ޕުޓިން ގޮވާލައްވައިފި އެވެ.
އޭގެ އިތުރުން ބޮޑެތި ސިޓީތަކުގައި މީހުން ދިރިއުޅޭ ހިސާބުތަކުގައި ބަރު ހަތިޔާރު ބޭނުންކޮށް، ރަޝިއާގެ އަސްކަރިއްޔާގެ ރައްދެއް ހޯދުމަށް "ޔޫކްރެއިންގެ ގައުމިއްޔަތައިގެން އުޅޭ މީހުން" މަސައްކަތް ކުރާ ކަމަށް ވެސް ޕުޓިން ތުހުމަތު ކުރެއްވި އެވެ.
ޓީވީ މެދުވެރިކޮށް ދެއްވި ހިތާބެއްގައި ޔޫކްރެއިން އަސްކަރިއްޔާއާ މުހާތަބު ކުރައްވަމުން ޕުޓިން ގޮވާލެއްވީ "ބާރުތައް އަމިއްލަ އަތަށް ނެގުމަށެވެ."
"ނާޒީންނާއި މަސްތުވާތަކެއްޗަށް ދެވިހިފާފައިވާ މި ގޭންގާ އެކު އެއްބަސްވުމަކަށް ވުރެ، ޔޫކްރެއިން އަސްކަރިއްޔާއާ އެކު އެއްބަސްވުމަކަށް އަންނަން މާ ފަސޭހަވާނެ ކަމަށް ބެލެވޭ،" ރައީސް ވޮލޮޑިމިރް ޒެލެންސްކީގެ ސަރުކާރަށް އިޝާރާތް ކުރައްވަމުން ޕުޓިން ވިދާޅުވި އެވެ.
ޖަރުމަނުވިލާތުގައި އެޑޯލްފް ހިޓްލަރު އުފަން ކުރިގެ ނާޒީ ފިކުރަށް ޔޫކްރެއިން ސަރުކާރު ނިސްބަތްވާ ކަމަށް ޕުޓިން ސިފަކުރެއްވި އިރު، ޒެލެންސްކީއަކީ ޔަހޫދީ ދަރިކޮޅުގެ މީހެކެވެ. ހިޓްލަރު ވަނީ ޔަހޫދީންނާ ދެކޮޅަށް ބޮޑު ގަތުލުއާއްމެއް ހިންގާފަ އެވެ.
މިދިޔަ ބުރާސްފަތި ދުވަހު ޔޫކްރެއިނަށް އަރަން ރަޝިއާ ސިފައިންނަށް އަމުރު ކުރެއްވި ޕުޓިން ވިދާޅުވީ "ގައުމިއްޔަތައިގެން އުޅޭ މީހުން" ދަނީ ބޮޑެތި ސިޓީތަކުގައި އާއްމުން ދިރިއުޅޭ ހިސާބުތަކަށް އެއް ފަހަރާ ގިނަ ރޮކެޓުތަކެއް ފޮނުވަން ތައްޔާރުވަމުން ކަމަށެވެ. އެގޮތުން ވެރިރަށް ކިޔެވް އާއި އިރުއުތުރުގައި އޮންނަ ހާރްކިވްގެ ނަން ފާހަގަކުރެއްވި އެވެ.
ޔޫކްރެއިންގެ ލީޑާޝިޕުން "އަމަލު ކުރަމުން ދަނީ ޓެރަރިސްޓުންގެ ގޮތުގައި" ކަމަށާއި "ރައްޔިތުންގެ ފަހަތުގައި ފިލައި ތިބީ އާއްމުން މަރުވުމުން އެކަމުގެ އިލްޒާމް ރަޝިއާގެ ބޮލުގައި އަޅުވަންވެގެން" ކަމަށް ވެސް ޕުޓިންގެ ހިތާބުގައި ތުހުމަތު ކުރެއްވި އެވެ.
"އަޅުގަނޑުމެންނަށް އެނގޭ ހަގީގަތަކީ މިކަން ކުރަމުން ދަނީ ބޭރުގެ ކޮންޒަލްޓެންޓުން، ވަކިން ހާއްސަ އެމެރިކާގެ ލަފާދޭ ފަރާތްތަކުގެ ނަސޭހަތް އަޑުއަހައިގެންކަން."
