ތިމާވެއްޓަށް ބޮޑު ގެއްލުމެއްވާނެތީ, ސަރުކާރުން އައްޑޫގައި ކުރިއަށް ގެންދިއުމަށް ނިންމާފައިވާ ބިން ހިއްކުމުގެ މަޝްރޫއު، އައްޑޫ ޑިވެލޮޕްމެންޓް ޕްރޮޖެކްޓް (އޭޑީޕީ) ހުއްޓުވައި ދިނުމަށް އެދި އަމިއްލަ ފަރާތަކުން ހުށަހެޅި މައްސަލަ ސ. މީދޫ މެޖިސްޓްރޭޓް ކޯޓުން މިއަދު ބަލައިގެންފި އެވެ.
މިނިސްޓްރީ އޮފް ނެޝަނަލް ޕްލޭނިން، ހައުސިން އެންޑް އިންފްރާންސްޓްރަކްޗާ އާ ދެކޮޅަށް މި މައްސަލަ އެ ކޯޓަށް ހުށަހެޅި އަބްދުﷲ ނުޒައިރު (މުރިގު، ސ.މީދޫ) އެވެ. އޭނާގެ ފަރާތުން މި މައްސަލާގައި ކޯޓުގައި ވަކާލާތުކުރާނީ ޕްރައިމް ސްޓްރެޓެޖީ އެޓާނީސް އެންޑް ކޮންސަލްޓަންޓްސް އެވެ.
އޭނާ މި މައްސަލަ ހުށަހެޅީ "މިހާރު އެ ޕްރޮޖެކްޓް ޕްލޭން ކޮށްފައިވާ ގޮތަށް އައްޑޫގެ އެތެރެވަރިން ވެލިނަގައިގެން ޕްރޮޖެކްޓް ކުރިޔަށް ގެންގޮސްފިނަމަ އެކަމުގެ ސަބަބުން އިޔާދަވެސް ނުކުރެވޭނެ ވަރުގެ ގެއްލުންތަކެއް އާންމު ރައްޔިތުންނަށާއި، ތިމާވެއްޓަށް އަދި އަންނަން އޮތް ޖީލުތަކަށް ކުރާނެ ކަމަށް ކަމާއި ގުޅުންހުރި ދިރާސާއިން ސާފުކޮށް އެނގެން އޮންނާތީ" ކަމަށް ބުނެފައިވެ އެވެ.
އަދި، އެއީ "ޤާނޫނުއަސާސީގެ 22 ވަނަ މާއްދާ އާ ހިލާފަށް ކުރިޔަށް ގެންދެވޭ ގެއްލުން ބޮޑު ކަމަކަށް ވާނެތީ އާންމު މަސްލަހަތު ހިމާޔަތް ކޮށް ތިމާވެށި ހިމާޔަތް ކުރުމުގެ ގޮތުން" ހުށަހެޅި މައްސަލައެއް ކަމަށް ވެސް މިއަދު ޕްރައިމް ސްޓްރެޓެޖީ އެޓާނީސް އިން ނެރުނު ބަޔާނުގައިވެ އެވެ.
އޭޑީޕީއަކީ އައްޑޫގެ އިގްތިސާދު ކުރިއަރުވާ، ފަތުރުވެރިކަމާއި، މަސްވެރިކަމާއި ރީޓެއިލް އަދި ހޯލްސޭލް ވިޔަފާރީގެ ދާއިރާއިން ޕްރައިވެޓް އިންވެސްޓްމެންޓްތައް އައްޑޫއަށް ގެނައުމަށްޓަކައި ސަރުކާރުން ފަށާފައިވާ މަޝްރޫއުއެކެވެ.
އެ މަޝްރޫއުގެ ދަށުން އައްޑޫގެ ހަތަރު ސަރަހައްދެއްގެ ބިން ހިއްކުމުގެ މަޝްރޫއަކީ އިންޑިއަން އެގްޒިމް ބޭންކުގެ 800 މިލިއަން އެމެރިކާ ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ކުރިޔަށް ގެންދާނެ އެވެ. އަދި އައްޑޫގެ ގުދުރަތީ ތިމާވެށި ހިމާޔަތްކޮށް ރައްކާތެރިކުރުމުގެ ގޮތުން، 228 ހެކްޓަރުގެ ބިމުގެ އޭރިޔާއެއް އުފެއްދޭނެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ 'ވަން-އޮފް' މަޝްރޫއުއެއް ވަނީ ހުށަހަޅާފަ އެވެ.
އެގޮތުން ރެޒިޑެންޝަލް، ކޮމާޝަލް، އަދި އިންޑަސްޓްރިއަލް ބޭނުންތަކަށް އައްޑޫ ސިޓީގެ ހިތަދޫ، ހުޅުދޫ/މީދޫ (38 ހެކްޓަރު، 5 ހެކްޓަރުގެ 2 ރިސޯޓް ރަށާއި ލައިގެން) އަދި މަރަދޫ/މަރަދޫފޭދޫ (75 ހެކްޓަރު) ގައި ބިން ހިއްކުމަށް ވަނީ ހަމަޖެހިފަ އެވެ.
މި މަޝްރޫއު ކުރިއަށް ގެންދިއުމަށް 6.9 މިލިއަން ކޮޑިމީޓަރުގެ ވެލި ބޭނުންވެ އެވެ. އެއީ ގާތްގަނޑަކަށް 465 ފުޓްބޯޅަ ދަނޑުގެ ތެރެއަށް ދެ މީޓަރު އުސްމިނަށް އަޅާނެހާ ވެއްޔެވެ. އަދި މިކަމަށް ބޭނުންވާ ވެލި ނަގާނީ އައްޑޫގެ އެތެރެވަރިން ދެ ސަރަހައްދަކުންނެވެ.
އެ މަޝްރޫއު ވަގުތުން ހުއްޓާލުމަށް ޓްރާންސްޕޭރަންސީ މޯލްޑިވްސް، ސޭވް މޯލްޑިވްސް، ޒީރޯ ވޭސްޓް މޯލްޑިވްސް، މޯލްޑިވްސް ރިސިލިއަންޓް ރީފްސް، ލޭންޑް ސީ މޯލްޑިވްސް، އިކޯކެއާ މޯލްޑިވްސް އިން ވެސް ގޮވާލާފައިވެ އެވެ.
