ބުރާސްފަތި ދުވަހުގެ ފަތިހު ރަޝިއާއިން ޔޫކްރެއިނަށް ދޭން ފެށި ހަމަލާތަކުގައި މިހާތަނަށް ޔޫކްރެއިންގެ 50 މީހުން މަރުވެފައިވާ ކަމަށް އެ ގައުމުގެ އިސް އޮފިޝަލަކު ބުނެފި އެވެ.
ރައީސް ވޮލޮޑިމިރް ޒެލެންސްކީގެ ސެކެޓްރީ އޮލެކްސީ އަރެސްޓޮވިޗް ނޫސްވެރިންނަށް ވިދާޅުވީ 40 ސިފައިންނާއި 10 އާއްމުން މަރުވެފައިވާ ކަމަށެވެ.
"އަޅުގަނޑަށް ލިބިފައިވާ މައުލޫމާތުން އެނގޭ ގޮތުގައި 40 އަށް ވުރެ ގިނަ މީހުން މަރުވެއްޖެ އަދި އެތައް ބަޔަކަށް އަނިޔާވެއްޖެ. އެނގިފައިވާ ގޮތުގައި 10 އާއްމުން ވެސް މަރުވެފައިވޭ،" އޭނާ ވިދާޅުވި އެވެ.
ޔޫކްރެއިންގެ ބޮޑެތި ސިޓީތަކުގެ އަސްކަރީ އިމާރާތްތަކަށް ހަމަލާ ދިނުމަށް ފަހު އިރުމަތީ ޔޫކްރެއިނާއި ބެލަރޫސްއާ ގުޅޭ ބޯޑަރާއި ކްރައިމިއާއާ ގުޅޭ ބޯޑަރު ކައިރިން ރަޝިއާ ސިފައިން ވަނީ ޔޫކްރެއިން ފަސްގަނޑަށް އަރާފަ އެވެ.
އެ ތިން ދިމާލުގައި ވެސް ދެ ގައުމުގެ ސިފައިން ދަނީ ސީދާ ހަމަލާތައް ބަދަލު ކުރަމުންނެވެ. ރަޝިއާއިން ހަމަލާ ދޭން ފެށުމާ އެކު ޔޫކްރެއިނުން މިހާރު ވަނީ އެ ގައުމާ އެކު އޮތް ޑިޕްލޮމެޓިކް ގުޅުން ކަނޑާލާފަ އެވެ.
