ބުރާސްފަތި ދުވަހުގެ ފަތިހު ރަޝިއާއިން ޔޫކްރެއިނަށް ހަމަލާ ދޭން ފެށުމާ އެކު ދުނިޔޭގެ ވެރިން އަވަސްވެގަތީ ރަޝިއާގެ އަމަލު ކުށްވެރި ކުރުމަށެވެ. ހުޅަނގުގެ ގައުމުތަކުން ރަޝިއާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ވަރުގަދަ ކުރާނެ ކަމުގެ އިންޒާރު ދޭން ފެށި އިރު، އދ. އިން ގޮވާލީ ވަގުތުން ހަމަނުޖެހުން ނިމުމަކަށް ގެނައުމަށެވެ.
ތިރީގައި މި ވަނީ ދުނިޔޭގެ ވެރިން ފާހަގަކުރެއްވި ޝުއޫރުތަކެވެ.
"ރަޝިއާއިން އެއްވެސް ސަބަބެއް ނެތި ހަމަލާ ދޭން ފެށުމުން، މިރޭ މުޅި ދުނިޔެއިން ވެސް ދުއާ ކުރަމުން ދަނީ ޔޫކްރެއިންގެ ރައްޔިތުންނަށްޓަކައި،" ހަމަލާ ފެށިތާ ކުޑަ ވަގުތުކޮޅެއްގެ ތެރޭގައި އެމެރިކާގެ ރައީސް ޖޯ ބައިޑެން ވިދާޅުވި އެވެ.
"މި ހަމަލާއިން ލިބޭ ގެއްލުމާއި ވަކިވެގެންދާ ފުރާނަތަކުގެ ފުރިހަމަ ޒިންމާ ނަގަން ޖެހޭނީ ހަމައެކަނި ރަޝިއާއިން" ކަމަށް ބައިޑެން ވިދާޅުވި އެވެ.
"ދުނިޔެއިން ރަޝިއާ ޖަވާބުދާރީ ކުރުވާނެ."
ސަލާމަތީ މަޖިލީހުގެ ކުއްލި ބައްދަލުވުމަކަށް ފަހު އދ. ގެ ވެރިޔާ އެންޓޯނިއޯ ގުޓެރޭޒް ވަނީ ރަޝިއާގެ ރައީސް ލެޑިމިއަ ޕުޓިންގެ އަރިހުން ވަރަށް އަސަރާ އެކު "އިންސާނިއްޔަތަށްޓަކައި ހަމަލާ ހުއްޓާލުމަށް" އެދިވަޑައިގެންފަ އެވެ.
"މި ގަރުނު ފެށި ފަހުން މިހާތަނަށް ޔޫރަޕަށް ކުރިމަތިނުވާ ވަރުގެ ބޮޑު ހަނގުރާމައެއް ފަށަން، އިންސާނިއްޔަތަށްޓަކައި، ފުރުސަތު ނުދީ،" ގުޓެރޭޒް ވިދާޅުވި އެވެ.
"ހަމަނުޖެހުން ހަމަ މި ވަގުތު ނިންމާލަން ޖެހޭ،" އދ. ގެ ވެރިޔާގެ މަގާމުގައި ހޭދަވި މުއްދަތުގައި މިއަދަކީ "އެންމެ ހިތާމަވެރި ދުވަސް" ކަމުގައި ފާހަގަކުރައްވަމުން އޭނާ ވިދާޅުވި އެވެ.
އެމެރިކާ އާއި ހުޅަނގުގެ ގައުމުތަކުގެ އަސްކަރީ ކޯލިޝަން، ނޭޓޯގެ ވެރިޔާ ޖެންސް ސްޓޮލްޓެންބާގް ވިދާޅުވީ "ރަޝިއާއިން ހިޔާރު ކުރީ މިނިވަން ދައުލަތަކާ ދެކޮޅަށް އަނިޔާވެރިވުމަށް" ކަމަށެވެ.
ހަމަލާގެ ސަބަބުން "އަދަދު ނުކުރެވޭހާ ގިނަ އާއްމުންގެ ފުރާނަ ނުރައްކަލަށް ހުށަހެޅޭނެ" ކަމަށާއި މިއީ "ބައިނަލްއަގްވާމީ ގާނޫނާ ހިލާފު އަދި ޔޫރަޕާއި އެޓްލާންޓިކް ކަނޑުގެ ސަރަހައްދަށް ނުރައްކަލެއް" ކަމަށް އޭނާ ސިފަކުރެއްވި އެވެ.
ނޭޓޯ ގައުމުތަކުގެ ސަފީރުން ނިންމާފައި ވަނީ ހާލަތު މަޝްވަރާ ކުރަން ކުއްލި ބައްދަލުވުމެއް ބޭއްވުމަށެވެ.
"ޔޫކްރެއިންގައި ހިނގަމުންދާ ބިރުވެރި ކަންކަން ފެނި އަޅުގަނޑު އަންތަރީސްވެއްޖެ. ރައީށް ވޮލޮޑިމިރް ޒެލެންސްކީއާ އަޅުގަނޑު ވާހަކަ ދައްކައި، ދެން އަޅާނެ ފިޔަވަޅުތަކާ މެދު މަޝްވަރާކޮށްފިން،" އިނގިރޭސި ބޮޑު ވަޒީރު ބޮރިސް ޖޯންސަންގެ ޓްވީޓެއްގައި ވިދާޅުވި އެވެ.
"ރައީސް ޕުޓިން ހިޔާރު ކުރެއްވީ ލޭއޮހޮރުވުމާއި ގެއްލުން ބޮޑު މަގު. އިނގިރޭސިވިލާތާއި އަޅުގަނޑުމެންގެ އެކުވެރިން ރައްދު ދޭނީ ވިސްނައިގެން."
ޖަރުމަނުވިލާތުގެ ޗާންސެލަރު އޯލާފް ޝޯލްޒް ވިދާޅުވީ ޕުޓިންގެ "ވިޔާނުދާ އަމަލު" ކުށްވެރި ކުރާ ކަމަށާއި ޔޫކްރެއިނާ އެކު ޖަރުމަނު ރައްޔިތުން ތިބި ކަމުގެ ފުރިހަމަ ޔަގީންކަން ރައީސް ޒެލެންސްކީއަށް ދެއްވާފައިވާ ކަމަށެވެ.
ފްރާންސްގެ ރައީސް އިމޭނުއެލް މެކްރޯން ގޮވާލެއްވީ ރަޝިއާގެ އަސްކަރީ އޮޕަރޭޝަން ހުއްޓުވުމަކަށް ގެންނަން ދުނިޔެއިން ފިޔަވަޅު އެޅުމަށެވެ.
"ފްރާންސް މި އޮތީ ޔޫކްރެއިނާ އެކު. އަޅުގަނޑުމެން މި ތިބީ ޔޫކްރެއިން ރައްޔިތުންނާ އެކު. ހަނގުރާމަ ނިމުމަކަށް ގެންނަން މި ދަނީ މަސައްކަތް ކުރަމުން."
އދ. ގެ ސަލާމަތީ މަޖިލީހުގެ ކުއްލި ބައްދަލުވުމުގައި ޔޫކްރެއިންގެ މަންދޫބު ސާގެއި ކިސްލިސްޓިޔާ ވިދާޅުވީ ހަނގުރާމަ ނިންމަން ކުރެވެން ހުރި ހުރިހާ ކަމެއް ކުރަން ޖެހޭނެ ކަމަށެވެ.
ސަލާމަތީ މަޖިލީހުގެ ރިޔާސަތު ބަލަހައްޓަނީ ރަޝިއާ އިންނެވެ. އެހެންވެ، އޭނާ ޑިމާންޑް ކުރެއްވީ އެ މަގާމުން ރަޝިއާގެ މަންދޫބު ވަގުތުން އިސްތިއުފާ ދެއްވުމަށެވެ.
"ހަނގުރާމައިގެ މުޖުރިމުންނަށް ސަލާމަތެއް ނޯންނާނެ. އެ މީހުން ދާނީ ސީދާ ނަރަކަށް،" އެ ބައްދަލުވުމުގައި ވަރަށް އަސަރާ އެކު ކިސްލިސްޓިޔާ ވިދާޅުވި އެވެ.
