ރަޝިއާއިން އަވައްޓެރި ޔޫކްރެއިނަށް އަސްކަރީ ހަމަލާތަކެއް ދޭން ފެށީ ބުރާސްފަތި ދުވަހުގެ ފަތިހު އެވެ. ޔޫކްރެއިންގެ އެކި ދިމަދިމާލުގައިވާ ޓާގެޓުތަކަށް މިހާރު ވަނީ ހަމަލާ ދީފަ އެވެ. ތިރީގައި މި ވަނީ މިއަދު ފަތިހުން ފެށިގެން ހިނގި ބައެއް މުހިންމު ކަންކަމެވެ.
ޕުޓިންގެ ނިންމެވުން
ބުރާސްފަތި ދުވަހުގެ ފަތިހާ އެކު ރަޝިއާގެ ވެރިރަށް މޮސްކޯގައި ޓީވީ ޗެނަލްތަކުން ކުއްލިއަކަށް ދައްކަން ފެށީ ރައީސް ލެޑިމިއަ ޕުޓިންގެ ރެކޯޑުކޮށްފައިވާ ހިތާބެކެވެ.
ރަޝިއާގެ ރައީސް ލެޑިމިއަ ޕުޓިން.
އުމުރުން 69 އަހަރުގެ ޕުޓިން އިއުލާނު ކުރެއްވި ގޮތުގައި އެމަނިކުފާނު ވާނީ ޔޫކްރެއިނުގައި "އަސްކަރީ އޮޕަރޭޝަނަކަށް" އަމުރު ކުރައްވާފަ އެވެ. އަދި ޔޫކްރެއިންގެ ސިފައިން ހަތިޔާރު ބެހެއްޓުމަށް ވެސް ގޮވާލެއްވި އެވެ.
ހަމަލާތައް ފެށުން
އެ ހިތާބު ޓީވީން ދެއްކިތާ މިނެޓުކޮޅެއްގެ ތެރޭގައި ޔޫކްރެއިންގެ ވެރިރަށް ކިޔެވް އާއި އެހެން ބޮޑެތި ސިޓީތަކުގައި ވަރުގަދަ ގޮވުންތަކުގެ އަޑު އިވުނެވެ. އެގޮތުން ކިޔެވްގެ އިތުރުން އޮޑެއްސާ، ހާރްކީވް، ކްރަމަޓޯސްކް އަދި މަރިޔުޕޯލްގައި ހަމަލާތައް ދިނެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވީ ހަމަލާތަކުގައި ޓާގެޓް ކުރަނީ އެ ގައުމުގެ އަސްކަރީ އިންފްރާސްޓްރަކްޗާއަށް ކަމަށެވެ.
ހާރްކީވްގައި ހުންނަ އަސްކަރީ އެއާޕޯޓަކުން ދުން އަރަނީ.
ރަޝިއާގެ ޑިފެންސް މިނިސްޓްރީން ބުނީ ހަމަލާދެމުން ދަނީ "ވައިގެ ދިފާއީ ފެސިލިޓީތަކާއި، އަސްކަރީ އެއާފީލްޑްތަކާއި، ޔޫކްރެއިން ސިފައިންގެ ވައިގެ ގޮތްޕަށް" ކަމަށެވެ.
ރިޕޯޓުތައް ބުނާ ގޮތުން ޓާގެޓުތަކަށް ހަމަލާ ދިނީ ބެލިސްޓިކް މިސައިލް، އާޓިލެރީ ޝެލް އަދި ކުދި އެހެނިހެން ގޮވާ ތަކެތިންނެވެ.
ދެ ގައުމުގެ ސިފައިންގެ މެދުގައި ސީދާ ހަމަލާ
ޔޫކްރެއިންގެ ބޯޑަރު ކައިރީގައި އުޅޭ ފައުޖުން ބުނީ ރަޝިއާ އާއި ބެލަރޫސް ގުޅޭ ބޯޑަރާ ދިމާލުން ޔޫކްރެއިންގެ ޔުނިޓްތަކާއި ޗެކްޕޮއިންޓްތަކަށް ހަމަލާދެމުންދާ ކަމަށެވެ. އޭގެ އިތުރުން ރަޝިއާއިން ހިފައިގެން އުޅޭ ކްރައިމިއާއާ ދިމާލުން ވެސް ދިޔައީ ހަމަލާދެމުންނެވެ.
ޔޫކްރެއިންގެ އިންޓީރިއާ މިނިސްޓްރީގެ އޮފިޝަލަކު ބުނީ ޔޫކްރެއިންގެ އިރުމަތީގައިވާ ޝްޗަސްތްޔާ އަވަށުގެ ކޮންޓްރޯލް ގެއްލިފައިވާ ކަމަށެވެ.
ޔޫކްރެއިން ދިފާއު ކުރުން
ރައީސް ޒެލެންސްކީ އެންމެ ފުރަތަމަ ވެސް މާޝަލް ލޯ ތަންފީޒުކޮށް، ރައްޔިތުން ހަމަޖެހިގެން ތިބުމަށް އެދިވަޑައިގެންނެވި އެވެ. ގައުމު ދިފާއު ކުރަން ކުރެވެން ހުރި ހުރިހާ ކަމެއް ކުރާނެ ކަމަށް އެމަނިކުފާނު ވިދާޅުވި އެވެ.
ޔޫކްރެއިންގެ ސިފައިން ބުނީ އެ ގައުމުގެ އިރުމަތީ ސަރަހައްދުން ރަޝިއާގެ ފަސް ފްލައިޓް އަދި ހެލިކޮޕްޓަރެއް ވައްޓާލާފައިވާނެ ކަމަށެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ.
އެކްޓް ކުރުމުން ސިޔާސީ ދާއިރާއަށް ވަދެވަޑައިގެންނެވި ޒެލެންސްކީ ވިދާޅުވީ އެމެރިކާގެ ރައީސް ޖޯ ބައިޑެންއާ އެކު ފޯނުން މަޝްވަރާ ކުރައްވާފައިވާ ކަމަށެވެ.
ބައިޑެން ވިދާޅުވީ ދުނިޔެއިން ރަޝިއާ ޖަވާބުދާރީ ކުރުވާނެ ކަމަށެވެ. އެމެރިކާ އާއި އެހެން ގައުމުތަކުން އަޅާނެ ދަތި ކުރުމުގެ އިތުރު ފިޔަވަޅުތައް މިއަދު އިއުލާނު ކުރާނެ އެވެ.
ދުނިޔޭގެ ބާޒާރަށް ލޮޅުންތައް
ރަޝިއާގެ ހަމަލާގެ ހަބަރާ އެކު ދުނިޔޭގެ މާލީ މާކެޓަށް އަސަރު ކުރި އެވެ. ޓޯކިޔޯ، ހޮންކޮން އަދި ސިޑްނީގައި ހިއްސާގެ ބާޒާރަށް ލޮޅުންތައް އަރައި، ތެޔޮ ފީފާއެއްގެ އަގު 100 ޑޮލަރަށް ވުރެ މަތިިވި އެވެ.
މޮސްކޯ އަދި ސެއިންޓް ޕީޓާޒްބާގްގެ ސްޓޮކް އެކްސްޗޭންޖް މުއްދަތެއް ނެތް ގޮތަށް ބަންދު ކުރި އިރު، ރަޝިއާ ފައިސާގެ އަގު ނުވަ ޕަސެންޓު ވެއްޓުނެވެ.
ޔޫކްރެއިނާއި ރަޝިއާގެ ދެކުނު ސިޓީތަކުގެ ވައިގެ ސަރަހައްދުން ފްލައިޓްތައް ވަނީ ކެންސަލްކޮށްފަ އެވެ.
