ސުލްހަ އިހްތިޔާރު ކުރަން ރަޝިއާއަށް މަޖުބޫރު ކުރަން ޖެހޭ ކަމަށް ވިދާޅުވެ، އެ މޭރުމުން ފިޔަވަޅު އެޅުމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ގައުމުތަކުގެ ވެރިނަންނަށް ގޮވާލައްވައިފި އެވެ.
ޒެލެންސްކީ ކުރެއްވި ޓްވީޓެއްގައި ވިދާޅުވީ ޔޫކްރެއިންގެ އެކުވެރިން ދަނީ ރަޝިއާގެ ރައީސް ލެޑިމިއަ ޕުޓިންއާ ދެކޮޅު "ކޯލިޝަނެއް" ބިނާ ކުރަމުން ކަމަށެވެ. އަދި ރަޝިއާއިން ޔޫކްރެއިނަށް ދެމުންދާ ހަމަލާތައް ހުއްޓުވުމަށް މަޖުބޫރު ކުރުވުމަށް ގައުމުތަކަށް ގޮވާލެއްވި އެވެ.
"އަޅުގަނޑުމެން އުފައްދަމުން މި ދަނީ ޕުޓިންއާ ދެކޮޅު ކޯލިޝަނެއް،" އެމެރިކާ، އީޔޫ، އިނގިރޭސިވިލާތް، ޖަރުމަނުވިލާތް އަދި ޕޮލޭންޑާ އެކު ބޭއްވި ބައްދަލުވުމަކަށް ފަހު ޒެލެންސްކީ ކުރެއްވި ޓްވީޓުގައި ވިދާޅުވި އެވެ.
"ރަޝިއާއިން ސުލްހަ އިހްތިޔާރު ކުރަން ދުނިޔެއިން މަޖުބޫރު ކުރުވަން ޖެހޭ."
ޒެލެންސްކީ މީގެ ކުރިން ވިދާޅުވެފައި ވަނީ ރަޝިއާއިން ހަމަލާ ދީފި ނަމަ އަމިއްލަ ދިފާއުގައި ޔޫކްރެއިނުން ވެސް ހަމަލާ ދޭނެ ކަމަށެވެ. ރަޝިއާއިން މިއަދު ފަތިހުން ފެށިގެން ދަނީ ޔޫކްރެއިންގެ ބޮޑެތި ސިޓީތަކަށް ހަމަލާދެމުންނެވެ.
