ޔޫކްރެއިންގައި އަސްކަރީ އޮޕަރޭޝަނެއް ފެށިކަން ރަޝިއާގެ ރައީސް ލެޑިމިއަ ޕުޓިން އިއުލާނު ކުރެއްވުމާ އެކު ބުރާސްފަތި ދުވަހުގެ ފަތިހު ދޭން ފެށި ހަމަލާތަކުގައި ދިވެހިން ތިބި ކާކިވް ސިޓީއަށް ވެސް ބޮޑެތި ހަމަލާތަކެއް ދެމުން އެބަ ދެ އެވެ.
ވެރިރަށް ކިޔެވްގެ އިތުރުން އެހެން ބޮޑެތި ސިޓީތަކަށް އެއް ވަގުތެއްގައި ހަމަލާދެމުން ދާއިރު، އޭގެ ތެރޭގައި ރަޝިއާގެ ބޯޑަރާ 35 ކިލޯމީޓަރު ދެކުނުން އޮންނަ ބޮޑު ސިޓީއެއް ކަމުގައިވާ ކާކިވްގައި ވެސް ގިނަ ގޮވުންތަކެއްގެ އަޑު އިވުނެވެ.
ޔޫކްރެއިންގައި ތިބި ދިވެހިން އެ މީހުންގެ ހާލަތާ މެދު ކަންބޮޑުވުން ފާޅުކޮށް މީގެ ކުރިން ނެރުނު ބަޔާނެއްގައި ބުނީ ބައެއް މީހުން ދިރިއުޅެނީ ކާކިވް ސިޓީގައި ކަމަށާއި "ކަމެއް ވެއްޖެއްޔާ ފުރަތަމަ އޭގެ އަސަރު ކުރާނީ މި ސިޓީ އަށް" ކަމަށެވެ.
ޔޫކްރެއިނަށް ހަމަލާދޭން ފެށިއިރު އެ ގައުމުގައި އަދިވެސް ވަރަށް ގިނަ ކުދިން އެބަ ތިއްބެވެ. އެ އަދަދު ގާތްގަނޑަކަށް 40 މަތިވާނެ ކަމަށް ބެލެވެ އެވެ. އެ ގައުމުން ދިވެހިން ބޭލުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އޮތީ އަންގަވައިފަ އެވެ.
ފޮރިން މިނިސްޓްރީގެ މީޑިއާ އޮފިޝަލް މިއުވާން މުހައްމަދު "އަދަދު" އަށް ވިދާޅުވީ ޔޫކްރެއިނުގައި ތިބި ދިވެހިން ގެނައުމުގެ މަސައްކަތް ކުރަމުން އަންނަ ކަމަށެވެ.
ޔޫކްރެއިނުން ވަނީ އެ ގައުމުގެ ވައިގެ ސަރަހައްދު އާއްމު ދަތުރުތަކަށް ބަންދުކޮށްފަ އެވެ. ފޮރިން މިނިސްޓަރު ޑިމިޓްރޯ ކުބެލާ ކުރެއްވި ޓްވީޓެއްގައި ވިދާޅުވީ ގައުމަށް ކުރިމަތިވެފައި ވަނީ "އެންމެ ފުރިހަމަ ސްކޭލްގެ ހަމަލާއެއް" ކަމަށެވެ.
