ބުރާސްފަތި ދުވަހުގެ ފަތިސް ވަގުތާ ދިމާކޮށް ޔޫކްރެއިންގެ ވެރިރަށް ކިޔެވް އާއި އެހެން ބައެއް ބޮޑެތި ސިޓީތަކަށް ހަމަލާ ދޭން ފަށައިފި އެވެ.
ކިޔެވް އާއި އެހެން ސިޓީތަކުގައި ބޮޑެތި ގޮވުންތަކުގެ އަޑު އިވެމުންދާ އިރު، އޭގެ ކުޑައިރުކޮޅެއް ކުރިން ރަޝިއާގެ ރައީސް ލެޑިމިއަ ޕުޓިން ވަނީ ޔޫކްރެއިންގައި އަސްކަރީ އޮޕަރޭޝަނެއް ފެށިކަން އިއުލާނު ކުރައްވައިފަ އެވެ.
ޔޫކްރެއިނަށް ހަމަލާދޭން ފެށިއިރު މިހާރު އެންމެ ވަރުގަދައަށް ހަމަލާދެމުންދާ ރަޝިއާ ބޯޑަރާ އެންމެ ކައިރީގައި އޮންނަ ހާރްކީވް ސިޓީގައި އަދިވެސް ފަސް ދިވެހިން އެބަތިއްބެ އެވެ. އެ ގައުމުން ދިވެހިން ބޭލުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އޮތީ އަންގަވައިފަ އެވެ.
ފޮރިން މިނިސްޓްރީގެ މީޑިއާ އޮފިޝަލް މިއުވާން މުހައްމަދު ވިދާޅުވީ ހާރްކީވްގައި ތިބި ފަސް ދިވެހިން ވެސް ތިބީ ރައްކާތެރި ހިސާބެއްގައި ކަމަށެވެ. އިތުރު ތަފްސީލެއް ނުދެއްވަ އެވެ.
ހާރްކީވް ހިމެނޭ ގޮތަށް ޔޫކްރޭންގައި ޖުމްލަ 50 އަކަށް ދިވެހި ދަރުވަރުން ތިބި ކަމަށް ފޮރިން މިނިސްޓްރީން މީގެ ކުރިން ވަނީ ބުނެފަ އެވެ.
އޭއެފްޕީގެ ނޫސްވެރިންނަށް ވަނީ ބްލެކް ސީގެ އައްސޭރިފަށުގައިވާ މުހިއްމު ޕޯޓް ސިޓީއެއް ކަމުގައިވާ އޮޑެއްސާގައި ވެސް ގޮވުންތަކެއްގެ އަޑު އިވިފަ އެވެ. ގޮވުންތަކުގެ އަޑުފަށްގަނޑާ އެކު ކިޔެވްގައި ފުލުހުންނާއި އެމްބިއުލޭންސްގެ ސައިރެންގެ އަޑު ވެސް އިވެމުން ދިޔަ އެވެ.
ރަޝިއާގެ ބޯޑަރާ 35 ކިލޯމީޓަރު ދެކުނުން އޮންނަ ބޮޑު ސިޓީއެއް ކަމުގައިވާ ކާކިވްގައި ވެސް ގިނަ ގޮވުންތަކެއްގެ އަޑު އިވުނެވެ.
ޔޫކްރެއިންގެ އިރުމަތީގައި ސަރުކާރުގެ މައި ސިޓީއެއްގެ ގޮތުގައި އޮންނަ ކްރަމަޓޯސްކް އިން ވެސް ބޮޑު ހަތަރު ގޮވުން ނޫސްވެރިން ރިޕޯޓުކުރި އެވެ. އޭގެ އިތުރުން އިތުމަތީގެ ޕޯޓް ސިޓީ މަރިއުޕޯލް އިން ވެސް ގޮވުންތަކުގެ އަޑު އިވުނެވެ.
ޔޫކްރެއިނުން ވަނީ އެ ގައުމުގެ ވައިގެ ސަރަހައްދު އާއްމު ދަތުރުތަކަށް ބަންދުކޮށްފަ އެވެ. ފޮރިން މިނިސްޓަރު ޑިމިޓްރޯ ކުބެލާ ކުރެއްވި ޓްވީޓެއްގައި ވިދާޅުވީ ގައުމަށް ކުރިމަތިވެފައި ވަނީ "އެންމެ ފުރިހަމަ ސްކޭލްގެ ހަމަލާއެއް" ކަމަށެވެ.
އިތުރު ތަފްސީލު އަންނަނީ ---
