ސްރީލަންކާއަށް ކުރިމަތިވެފައިވާ މާލީ ކާރިސާއިން އަރައިގަތުމަށް އެ ގައުމަށް އެހީވުމުގެ ގޮތުން އިންވެސްޓް ކުރަން އިންޑިއާއިން ތައްޔާރު ކަމަށް އިންޑިއާގެ ފޮރިން މިނިސްޓަރު ސުބްރަމާނިޔަމް ޖޭޝަންކަރް ވިދާޅުވެއްޖެ އެވެ.
ސްރީލަންކާގެ ބޭރު ފައިސާގެ ރިޒާވް ދަށްވެ، ގިނަ ގޮންޖެހުންތަކާ ވަނީ ދިމާވެފަ އެވެ. އެގޮތުން ތެލުގެ އިމްޕޯޓަށް ދައްކާނެ ފައިސާ ނެތި، އެކި ހިސާބުތަކުން ދަނީ ކަރަންޓު ކަނޑަމުންނެވެ. އަދި ތަކެތީގެ އަގު ދަނީ އުފުލެމުންނެވެ.
ލަންކާގައި އިންވެސްޓް ކުރަން ތައްޔާރު ކަމަށް އިންޑިއާއިން ބުނެފައިވާ އިރު، ތެޔޮ ގަންނާނެ ބޭރު ފައިސާ ނެތުމުގެ ސަބަބުން އެމެޖެންސީ ލޯނެއްގެ ގޮތުގައި އިންޑިއާއިން 500 މިލިއަން ޑޮލަރު ވެސް ިމި މަހުގެ ކުރީކޮޅި ފޯރުކޮށްދިނެވެ.
އޭގެ ކުޑަ ދުވަސްކޮޅެއް ކުރިން އިންޑިއާއިން ވަނީ ބޭރު ފައިސާގެ ސަޕޯޓުގެ ގޮތުގައި 915 މިލިއަން ޑޮލަރު ދޭން ވެސް އެއްބަސްވެފަ އެވެ. ލަންކާއަށް ބޭނުންވާ އަވަސް ކާބޯތަކެއްޗާއި ބޭސް އިންޑިއާއިން އިމްޕޯޓް ކުރަން އިތުރު އެއް ބިލިއަން ޑޮލަރުގެ ކްރެޑިޓް ލައިނެއް ދޫކުރަން ވެސް ވާހަކަ އެބަ ދެކެވެ އެވެ.
ތެލުގެ އިތުރުން ހަނޑުލާއި ބައެއް އެހެން ޒަރޫރީ ކާބޯތަކެތީގެ ދަތިކަން ވެސް ސްރީލަންކާއަށް ވަނީ ކުރިމަތިވެފަ އެވެ. އެހެންވެ، ސުޕަމާކެޓްތަކުން ތަކެތި ވިއްކަނީ ރޭޝަންކޮށްގެންނެވެ.
ތަކެތީގެ ދަތިކަމާ ހެދި ޖެނުއަރީ މަހު އިންފްލޭޝަން ރޭޓް ރެކޯޑް މިންވަރަކުން 25 ޕަސެންޓަށް އުފުލުނެވެ.
ސްރީލަންކާއަށް ބޭރު ފައިސާ ލިބޭ މައިގަނޑު އެއް ސިނާއަތަކީ ފަތުރުވެރިކަމެވެ. ނަމަވެސް ކޮވިޑް ބަލިމަޑުކަމުގައި އެ ސިނާއަތް ވަނީ ހުއްޓިފަ އެވެ.
