ދިވެހިންނާ ކައިވެނިކޮށްގެން އުޅޭ ބައެެއް ބިދޭސީންނަކީ އުޅެން ފަަސޭހައަކަށް ކައިވެނިކުރާ ބައެެއް ކަމަށާއި އެފަދަ ބައެއް މީހުން ރާއްޖޭގައި ބޮޑެތި ކުށްތައް ކުރާ ކަމަށް އިމިގްރޭޝަނުން މިއަދު ބުނެފި އެވެ.
ރައްޔިތުންގެ މަޖިލީހުގެ ހާރިޖީ ގުޅުންތަކުގެ ކޮމިޓީން އިމިގްރޭޝަނާއި ފޮރިން މިނިސްޓްރީ އާއި އިކޮނޮމިކް މިނިސްޓްރީގެ އިސް ބޭފުޅުންނާ އެކު މިއަދު ބޭއްވި ބައްދަލުވުމެއްގައި ޑެޕިއުޓީ ޗީފް އިމިގްރޭޝަން އޮފިސަރު މުހައްމަދު ޝިފާން ވިދާޅުވީ ދިވެހިންނާ ކައިވެނިކޮށްގެން އުޅޭ ބައެެއް ބިދޭސީން، ހަށިވިއްކުން ފަދަ ކުށްތައް ކުރުމުގައި އުޅޭ ކަމަށް ތުހުމަތުކުރެވޭ ކަމަށެވެ.
"މެރިޖް އޮފް ކޮންވީނިއެންސް" ގައި ނުވަތަ އުޅެން ފަސޭހައަކަށް ކައިވެނިކުރާ ބިދޭސީން ކައިވެނިކުރަނީ ހާއްސަކޮށް އުމުރުން ދުވަސްވީ ދިވެހިންނާ ކަމަށް ވެސް އޭނާ ވިދާޅުވި އެވެ.
"ބައެއް ފަރާތްތައް، މި ތުހުމަތު ކުރެވެނީ ހަށިވިއްކުމުގަޔާ އެކަަހަލަ ކަންކަމުގައި އުޅޭކަމަށް. ދިވެހިންނާ، މެރިޖް އޮފް ކޮންވީނިއެންސްގެ ގޮތުގައި [އުޅެން ފަސޭހަކައަށް] ކައިވެނިކޮށްގެން އުޅޭ ފަރާތްތައް މި ފާހަގަކުރެވެނީ. ހާއްސަކޮށް އުމުރުން ދުވަސްވީ ބައެއް ބޭފުޅުންނާ ކައިވެނިކޮށްގެން، މިކަހަލަ ކައިވެނިތަކުގެ ތެރޭން،" ޝިފާން ވިދާޅުވި އެވެ.
އެފަދަ ތުހުމަތެއް ކުރެވުނަސް، ދިވެއްސަކާ ކައިވެނިކޮށްގެން އުޅޭ މީހަކު ރާއްޖޭން ފޮނުވައިލުމުގައި ކުރިމަތިވާ ގޮންޖެހުންތަކެއް ހުންނަ ކަމަށް ވެސް އޭނާ ވިދާޅުވި އެވެ. އެކަމާ ބެހޭ ގޮތުން އިމިގްރޭޝަނުން ފުލުހުންނާ ވެސް މަޝްވަރާކުރަމުން އަންނަ ކަމަށް ވެސް އޭނާ ވިދާޅުވި އެވެ.
"ވިސާ ކެންސަލް ކުރަން ބަލާއިރު އަޅުގަނޑުމެންނަށް މިވާ ގޮތަކީ އެކައިވެނީގައި، ގިނަ ދުވަސްވެފައި ތިބި ކައިވެނިވީމާ ކުދިން އެބަތިބޭ. އެެހެންވީމާ، ބައްޕައެއް ނުވަތަ މަންމައެއް ފޮނުވައިލަންވީމާ އެެފަދަ މައްސަލަތައް ކުރިމަތި އެބަވޭ،" ޝިފާން ވިދާޅުވި އެވެ.
އެ ބައްދަލުވުމުގައި ކޮންޓްރޯލާ އޮފް އިމިގްރޭޝަން މުހައްމަދު އަހުމަދު ހުސައިން (ހަނަފީ) ވިދާޅުވީ ބިދޭސީން ދިވެހިންނާ ކައިވެނިކުރާ އިރު އެ ބިދޭސީއަކީ ރާއްޖޭގައި ގާނޫނާ ގަވައިދާ އެއްގޮތަށް އައިސްހުރި މީހެއްތޯ ކޯޓުން ބަލާ ކަމަށެވެ. ކޯޓުން ކައިވެންޏެއް ކޮށްދެވީ އިމިގްރޭޝަނުން ހުއްދަ ދިނީމާ ކަމަށް ވެސް އޭނާ ވިދާޅުވި އެވެ.
އެހެން ނަމަވެސް, އެފަދަ ބައެއް ކައިވެނިތަކުން ނާޖާއިޒް ފައިދާ ނަގާ ބިދޭސީން އުޅޭ ކަމަށް އޭނާ ވެސް ވިދާޅުވި އެވެ.
