ކޮވިޑްގެ ސަބަބުން ރޯގާގެ ބައެއް އާދައިގެ އަލާމާތްތައް ކުރިމަތިވެވަޑައިގެންފައި ވާތީ އިނގިރޭސި ރާނީ އެލިޒަބަތުގެ ބައެއް ވާޗުއަލް ބައްދަލުވުންތައް ކެންސަލްކޮށްފި އެވެ.
އުމުރުން 95 އަހަރުގެ ރާނީ ކޮވިޑަށް ޕޮޒިޓިވްވިކަން ބަކިންހަމް ޕެލެސްއިން އިއުލާނު ކުރީ މިދިޔަ އާދީއްތަ ދުވަހު އެވެ. އޭރު ވެސް ޝާހީ ގަނޑުވަރުން ބުނީ އާދައިގެ އަލާމާތްތައް އެކަމަނާއަށް ކުރިމަތިވެވަޑައިގެންފައިވާ ކަމަށެވެ.
ޝާހީ ގަނޑުވަރުން އޭރު ބުނީ ބައެއް ކުދިކުދި ޒިންމާތައް އަދާކުރެއްވުމުގައި ރާނީ ދެމިހުންނަވާނެ ކަމަށެވެ. މި ހަފްތާގެ ކުރިއަށް އޮތް ދުވަސްތަކަށް ތާވަލްކޮށްފައިވާ ބައްދަލުވުންތަކާ މެދު ފަހުން ގޮތެއް ނިންމާނެ އެވެ.
އާއްމުންނާ ބައްދަލުކުރެއްވުމަށް ރާނީގެ ތާވަލުގައި މި ހަފްތާގައި ހިމެނިފައި އޮތީ ހަމައެކަނި ވީޑިއޯ ބައްދަލުވުންތަކެކެވެ.
އުމުރުން 73 އަހަރުގެ ވަލީ އަހުދު ޗާލްސް އާއި ރާނީ މިދިޔަ ހަފްތާގައި ބައްދަލުވެވަޑައިގެންނެވިތާ ދެ ދުވަސް ފަހުން ޗާލްސް ކޮވިޑަށް ޕޮޒިޓިވްވި އެވެ.
ރާނީ ދިރިއުޅުއްވާ ވިންޑްސާ ކާސްލްގައި ގިނަ ބަޔަކު ކޮވިޑަށް ޕޮޒިޓިވްވެފައިވާ ކަމަށް ބީބީސީއިން ރިޕޯޓުކުރެ އެވެ.
އޭޕްރިލް މަހު 96 އަހަރު ފުރިވަޑައިގަންނަވާ ރާނީއަކީ އިނގިރޭސިވިލާތުގައި މިހާތަނަށް އެންމެ ގިނަ ދުވަހު އެ މަގާމުގައި ހުންނެވި ރާނީ އެވެ. އެކަމަނާ ތަހުތުގައި އިންނަވާތާ 70 އަހަރު ވެއްޖެ އެވެ.
