ޔޫކްރެއިން އާއި ރަޝިއާގެ މަޝްރަހު އިތުރަށް ގޯސްވެ، ތެލުގެ ސަޕްލައިގެ ދަތިކަމާ ކުރިމަތިވުމުގެ ބިރު އިތުމާ އެކު، ދުނިޔޭގެ ބާޒާރުގައި ތެލާއި ގޭހުގެ އަގު އުފުލެން ފަށައިފި އެވެ.
ސާފު ނުކުރާ ކްރޫޑް ތެލުގެ އަގު އަންގާދަ ދުވަހު ވަނީ ހަތް އަހަރުގެ ތެރޭގައި ރެކޯޑް މިންވަރަކަށް މަތިވެ، ފީފާއަކަށް ޖެހޭ އަގު 99.38 ޑޮލަރަށް އަރާފަ އެވެ.
ހޯމަ ދުވަހުގެ ރޭ ރަޝިއާއިން ވަނީ އިރުމަތީ ޔޫކްރެއިންގައި ސަރުކާރާ ވަކިން ހިންގާ ދެ ސަރަހައްދު މިނިވަން ދައުލަތްތަކެއްގެ ގޮތުގައި ބަލައިގަނެ، ސުލްހަ ބެލެހެއްޓުމުގެ ނަމުގައި ސިފައިން ފޮނުވާފަ އެވެ.
އެމެރިކާ އާއި ހުޅަނގުގެ އެހެން ގައުމުތަކުން ވެސް ރަޝިއާއާ ދެކޮޅަށް ދަތިކުރުމުގެ ފިޔަވަޅުތައް އިއުލާނުކޮށްފައިވާ އިރު، ސައުދީ އަރަބިއްޔާއަށް ފަހު ދެ ވަނަ އެންމެ ގިނައިން ތެޔޮ އެކްސްޕޯޓް ކުރާ ގައުމަކީ ރަޝިއާ އެވެ. އޭގެ އިތުރުން ދުނިޔޭގައި ގުދުރަތީ ގޭސް އެންމެ ގިނައިން އުފައްދަނީ ވެސް ރަޝިއާގަ އެވެ.
ތަޖުރިބާކާރުން ދެކޭ ގޮތުގައި ޔޫކްރެއިނާއި ރަޝިއާގެ މަޝްރަހަށް އަންނަ ކޮންމެ ބަދަލެއްގެ އަސަރު ވެސް ދުނިޔޭގެ ތެލުގެ އަގަށް ކުރާނެ އެވެ. މި ފެބްރުއަރީ މަހުގެ ތެރޭގައި އެކަނިވެސް ތެލުގެ އަގު ވަނީ 10 ޕަސެންޓް އުފުލިފަ އެވެ.
ދަތިކުރުމުގެ ފިޔަވަޅުތަކާ އެކު ސާފު ނުކުރާ ތެލާއި ގުދުރަތީ ގޭސް ސަޕްލައި ކުރުން ރަޝިއާއިން މަދުކުރަން މަޖުބޫރުވާނެ އެވެ. އެކަމުގެ އަސަރު ވެސް ދުނިޔޭގެ މާކެޓަށް ކުރާނެ ކަމަށް ތަޖުރިބާކާރުން ދެކެ އެވެ.
