ވެނާލާ އިންްޓަނެޝަންލަ އެއާޕޯޓު (ވީއައިއޭ) އަށް އަންނަ ފްލައިޓުތައް ޑިލޭވުން ހުއްޓި، ޝެޑިއުލްގައިވާ ގަޑިއަށްވުރެ ކުރިއަށް ގިނަ ފްލައިޓުތައް ޖައްސަން ފަށައިފި އެވެ.
މިއަދު ހެނދުނު ވީއައިއޭއަށް ދަތުރުކުރި އިންޓަނެޝަނަލް ޕްލައިޓްތަކުގެ ޝެޑިއުލަށް ބާލާއިރު ގިނަ ޕްލައިޓުތައް 5-25 މިނިޓް އަވަހަށް ޖައްސާފައިވެ އެވެ. މިސާލަކަށް ބަލާއިރު، މިއަދު ދޯހާއިން ރާއްޖެ އައި ގަތަރު އެއާވޭސްގެ ކިޔުއާރު676 ޕްލައިޓް ޖައްސަން އޮތީ ހެނދުނު 7:40 ގަ އެވެ. އެ ޕްލައިޓް ޖެއްސީ އޭގެ 22 މިނިޓް ކުރިން 7:18 ގަ އެވެ.
މިއަދު ހެނދުނު ވީއައިއޭ އަށް އައި ފްލައިޓްތަކުގެ ޝެޑިއުލް-
މިމަހުގެ އެއްވަން ދުވަހުން ފެށިގެން ފާހަގަ ކުރެވުނު މި ބަދުގައި، ކުރިން ބައި ގަޑިއިރަށް ވުރެ ބޮޑުތަން ޑިލޭވާ، ޕްލައިތްތައް، ބައި ގަޑިއިރަށް ވުރެ އަވަހަށް ޖައްސާފައި އެބަހުއްޓެެވެ. އިންޓަނެޝަން ފްލައިޓުތަކުގެ އިތުރުން، ޑޮމެސްޓިކް ފްލައިޓުތައް ވެސް ޝެޑިއުލް އަށްވުރެ 10-15 މިނިޓް އަވަހަށް ޖެއްސުން މިހާރު ވަނީ އާންމުވެފަ އެވެ.
ވީއައިއޭ ހިންގާ އެމްއޭސީއެލްގެ ކޯޕަރޭޓް ކޮމިއުނިކޭޝަންސް މެނޭޖަރު ޝަމްއާން ޝާކިރު ވިދާޅުވި ގޮތުގައި މި ކުރިއެރުން ފާހަގަ ކުރެވުނީ، އާ ރަންވޭ ޓެކްސީވޭއެއްގެ ގޮތުގައި ބޭނުން ކުރަން ފެށުމާ ގުޅިގެންނެވެ. އެ ބަދަލާއެކު ޕްލައިޓެއް ޖައްސާތާ ދެ މިނިޓް ތެރޭގައި ރަންވޭ ހުސްކުރެވޭތީ، މަތީގައި ބޯޓު މަޑުކުރަން ޖެހުން ވަނީ ނިމުމަކަށް އައިސްފަ އެވެ.
"ޓެއިލް ވިންޑުގައި (ފަހިވަޔަށް) އަންނަ ކަމަށް ވަންޏާ ފްލައިޓު އަވަހަށް އަންނާނެ، ކުރިން އަވަހަށް އާދެވުނަސް ރަންވޭ އިން ޖާގަ ނުލިބިގެން މަތީގައި ނުޖެއްސި އޮންނަން ޖެހޭ،" އެމްއޭސީއެލްގެ ޓަވަރުގެ ބޭފުޅަކު ވިދާޅުވި އެވެ. "އަޅުގަނޑުމެން ބަލަން ވީހާ އަވަހަކަށް ޖާގަ ދޭން،"
އެމްއޭސީއެލްއިން ގެނައި މި ބަދަލުގެ ސަަބަބުން، ރާއްޖެ އަންނަ އެއާލައިންތަކުން ތެލަށް ކުރާ ހޭދަ ވެސް ކޮންމެވެސް މިންވަރެއް ކުޑަވެގެން ދާނެ އެވެ.
ކޮވިޑް-19 ގެ ކުރީގެ ހާލަތަށް ދިއުމަކީ މި އަހަރަށް އެމްއޭސީއެލް އިން ކަނޑައަޅާފައިވާ ޓާގެޓެކެވެ. މިދިޔަ އަހަރުގެ ޖެނުއަރީ މަހާ އަޅާބަލާއިރު މިދިޔަ މަހު ވީއައިއޭއިން ހިދުމަތް ދިން ބޯޓު ފަހަރުގެ އަދަދު 42 ޕަސެންޓް އިތުރުވެ، ހިދުމަތް ހޯދި ފަސިންޖަރުންގެ އަދަދު 73 ޕަސެންޓް އިތުރުވެފައިވެ އެވެ. މިދިޔަ މަހު 5،694 ފަލައިޓަށް ހިދުމަތް ދީފައިވާއިރު، 446،000 ފަސިންޖަރުން އެއާޕޯޓު ބޭނުން ކޮށްފައިވެ އެވެ.
