ސުވާލު އުފެދޭ ފަދަ ގޮތަކަށް މަރުވެފައި އޮއްވާ ފެނުނު އައިޖީއެމްއެޗުގެ ފިލިޕީންސް ނަރުސް މޭރީ ގްރޭސް ޕިނޭޑާގެ ގަތުލުގައި ބައިވެރިވިކަމަށް ތުހުމަތުކުރެވޭ ބޮޑެތި ހެކިތަކާ އެކު ދައުވާލިބޭ އޭނާގެ ފިރިމީހާއާ ލޯބީގެ ގޮތުން ގުޅިގެން އުޅުނު ހަލީމަތު ލަމްހާ ޝަރީއަތް ނިމެންދެން ބަންދުކޮށްފި އެވެ.
މިއަދު ކްރިމިނަލް ކޯޓުގައި ކުރިއަށް ދިޔަ އަޑުއެހުމުގައި ދައުލަތުން ބުނީ ލަމްހާ ދިރިއުޅުނު ކޮޓަރިން ފެނުނު ތިން އިންޖެކްޝަން ބޭނުންކުރަނީ ހޭނެއްތުމަށާއި، ވާގިނެއްތުމަށް ކަމަށެވެ. އަދި އެއިން އެއް އިންޖެކްޝަން ބޭނުންކޮށްފައި ހުރި ކަމަށް ޑޮކްޓަރެއް ތަހުގީގަށް ބަޔާން ދީފައިވާ ކަމަށާއި، މޭރީގެ ގައިން އިންޖެކްޝަން ޖަހާފައިވާ މާކްތަކެއްވެސް ފެނިފައިވާ ކަމަށެވެ.
މީގެ އިތުރުން ފިލިޕިންސްގެ އިޖުރާއަތްތަކުގެ ތެރެއިން މޭރީގެ އޮޓޮކްސީ ޓޮކްސޮކޮލޮޖީ ރިޕޯޓެއް ތައްޔާރުކުރުމުގެ މަސައްކަތް ކުރަމުން ގެންދާކަންވެސް ދައުލަތުން ފާހަގަކުރި އެވެ.
"މިހާރު އަނގަބަހުން އޭގެ ޖަވާބު ލިބިދަފައި ވަނީ، އަނގަބަހުން ލިބިފައިވާ ޖަވާބަކީ އެ ޓޮކްސިކޮލޮޖީ ރިޕޯޓުން ސަކްސިނައިލްކޯލައިން [ވާގިނެއްތުމަށް ބޭނުންކުރާ މާއްދާއެއް] ކިޔާ މާއްދާއެއް، މޭރީ ގްރޭސްގެ ލޭގެ ހުރިކަމަށް، މާދަމާގެ ވަގުތެއްގައި އޭގެ ސޮޕްޓްކޮޕީއެއް އީމެއިލްކުރައްވާނެ ކަމަށް، އަދި ހަފްތާ ނިމުމުގެ ކުރިން ޑީއެޗްއެލް މެދުވެރިކޮށް އެ ލިޔުން ދޭނެކަމަށް މައުލޫމާތު ދީފައި ވަނީ،" ޖިނާއީ މައްސަލަތަކުގައި އެހެން ގައުމުތަކުގެ އެހީތެރިކަން ހޯދުމަށް ޕީޖީއަށް ގާނޫނުން ލިބޭ ބާރުގެ ދަށުން ކުރަމުން ގެންދާ މަސައްކަތް ދައުލަތުގެ ވަކީލް އަހްމަދު ނައުފަލް ކިޔައިދެއްވި އެވެ.
އެހެންވެ މުޖްތަމައުގެ ސަލާމަތަށް ނުރައްކާވާނެ ކަމަށް ކަނޑައަލާ ލަމްހާ ޝަރީއަތް ނިމެންދެން ބަންދުކުރުމަށް ދައުލަތުން އެދުނީ ލައިސެންސް އޮތް ނަރުހެއް، ހޮސްޕިޓަލުން ބޭރަށް ގެންދިޔުން މަނާ، މީހަކު މަރާލެވޭނެ ފަދަ ބާރުގަދަ އިންޖެކްޝަނެއް އޭނާގެ ގެއަށް ގެންގޮސްފައި ވާތީ އެވެ. އަދި އެ އިންޖެކްޝަންތައް ބޭނުންކޮށްގެން މޭރީ މަރާލުމުގައި ލަމްހާގެ ބައިވެރިވުން އޮތް ކަމަށް ގުޅުވާލެވޭ ގިނަ ހެކިތަކެއް ހުރުމުންނެވެ.
މާވިންއާ މޭރީ ދިރިއުޅެމުން އައި ގެއަށް އެދެމަފިރިންނަށް ލިބިފައިވާ ދަރިފުޅު ގޮވައިގެން ލަމްހާ ދިޔަ ކަމަށާއި، އެގޭގައި 20 މިނެޓް ހޭދަވި ކަމުގެ އިތުރުން، އެގެއިން ނިކުތްތާ މިނެޓެއް ފަހުން މޭރީ ދަންޖެހުނުކަން ރިޕޯޓްކުރި ކަމަށް ބާރުދޭ ސީސީޓީވީ ފޫޓޭޖެއް އޮތް ކަމަށް ދައުލަތުން ބުނި ނަމަވެސް, އެ ވީޑިއޯ ލިބިފައި ނުވާ ކަމަށް ދިފާއުން ބުނެ އެވެ.
އަދި އެ ގަތުލަކީ މޭރީގެ ފިރިމީހާއާ، އޭނާ ލޯބީގެ ގޮތުން ގުޅިގެން އުޅުނު ލަމްހާ ރާވައިގެން ހިންގި ކަމެއްކަން ސާބިތު ކުރުމަށް މޯބައިލް ފޮރިންސިކް ރިޕޯޓެއް ހުށަހަޅާނެ ކަމަށް ދައުލަތުން ބުނި ނަމަވެސް މިހާތަނަށް އެއިން އެއްވެސް އެއްޗެއް ޝަރީއަތަށް ހުށަހަޅާފައި ނުވާކަން ދިފާއުން ފާހަގަކުރި އެވެ.
އެކަމަކު އެ މައްސަލަ ބައްލަވާ ގާޒީ ހުސައިން ފާއިޒް ރަޝީދު ނިންމެވީ ލަމްހާއަށް ކުރާ ތުހުމަތުތަކަށް ބާރުދޭ ގިނަ ހެކިތަކެއް ދައުލަތުން ހުށަހަޅާފައި ވާތީ ޝަރީއަތް ނިމެންދެން އޭނާ ބަންދު ކުރުމަށެވެ.
މިއަދު ކުރިއަށް ދިޔަ ބަންދު މުރާޖާގެ އަޑުއެހުމަށް ނޫސްވެރިން ވަދެ ތިބުމުން ދިފާއުން ވަނީ ލަމްހާގެ ސިއްހީ ވާހަކަތައް ދެއްކުމަށް އުޒުރުވެރިވެފަ އެވެ. ނޫސްވެރިން ބޭރުކޮށް، އެ އަޑުއެހުން ސިއްރުން ކުރިއަށް ގެންދަން އެދުނު ނަމަވެސް، އެކަމަށް ދައުލަތުން އިއުތިރާޒްކުރުމާ ގުޅިގެން، އަދި ދިފާއުއަށް ގާނޫނީ ބުރަދަނެއް ދެވޭވަރު ވާހަކައެއް ދެއްކިފައި ނުވާތީ، ގާޒީ ނިންމެވީ އެ ފުރުސަތު ނުދިނުމަށެވެ.
މޭރީގެ މަރުގެ މައްސަލާގައި ކޯޓު އަމުރެއްގެ ދަށުން ފުލުހުން ލަމްހާ ހައްޔަރުކޮށްފައިވަނީ މިދިޔަ އަހަރުގެ ޑިސެމްބަރުމަހުގެ 16، ގަ އެވެ. ތިން ފަހަރަށް އޭނާގެ ބަންދުގެ މުއްދަތު އިތުރުކޮށްފައިވާއިރު، އޭނާގެ މައްޗަށް ކޮށްފައިވާ ފުރަތަމަ ތުހުމަތަކީ މީހަކު މަރާލަން އެހީތެރިވުމެވެ. ދެން އެހެން މީހެއްގެ މުދަލެއްގެ މައްޗަށް ހުއްދަ ނޫންގޮތެއްގައި ބާރު ހިންގުމުގެ ދައުވާ އެވެ. އަދި އޭނާ ދިރިއުޅޭ ގެއިން ފެނުނު އިންޖެކްޝަންތަކާ ގުޅިގެން ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދައުވާ ވެސް އުފުލާފައި ވެއެވެ.
މިއަދުގެ އަޑުއެހުން ނިންމާލީ އަންނަ މަހުގެ 15 ވަނަ ދުވަހު އެ މައްސަލައިގެ ދައުވާތައް އިއްވާ، ހެކިތައް ހުށަހެޅުމުގެ މަރުހަލާ ފަށަނެ ކަމަށް ވިދާޅުވެ އެވެ.
titledesc
