އިނގިރޭސި ރާނީ އެލިޒަބަތު ދެ ވަނަ ކޮވިޑަށް ޕޮޒިޓިވްވެފައިވާ ކަމަށް ބަކިންހަމް ޕެލެސްއިން ބުނެފި އެވެ.
ޝާހީ ގަނޑުވަރުން ބުނީ ރާނީއަށް ކުރިމަތިވެވަޑައިގެންފައި ވަނީ "އާދައިގެ ރޯގާއެއްގެ އަލާމާތްތައް" ކަމަށާއި ކުރިއަށް އޮތް ހަފްތާގައި ވެސް "ބައެއް ކުދިކުދި ޒިންމާތައް" އަދާކުރައްވާނެ ކަމަށެވެ.
"އެކަމަނާއަށް ބޭނުންވެވަޑައިގަންނަގާ ސިއްހީ އެހީތެރިކަން ފޯރުކޮށްދެމުންދާނެ އަދި ކޮވިޑާ ގުޅިގެން އަޅާފައިވާ ހުރިހާ އުސޫލަކަށް އަމަލުކުރައްވަމުން ދާނެ،" ގަނޑުވަރުން ނެރުނު ބަޔާނުގައި ބުންޏެވެ.
މިދިޔަ ހަފްތާގައި ކޮވިޑަށް ޕޮޒިޓިވްވި ވަލީ އަހުދު ޗާލްސްއާ ރާނީ ބައްދަލުވެވަޑައިގެންނެވި އެވެ. ރާނީ ދިރިއުޅުއްވާ ވިންޑްސާ ކާސްލްގައި ގިނަ ބަޔަކު ކޮވިޑަށް ޕޮޒިޓިވްވެފައިވާ ކަމަށް ބީބީސީއިން ރިޕޯޓުކުރެ އެވެ.
އުމުރުފުޅުން 95 އަހަރުގެ ރާނީއަކީ އިނގިރޭސިވިލާތުގައި މިހާތަނަށް އެންމެ ގިނަ ދުވަހު އެ މަގާމުގައި ހުންނެވި ރާނީ އެވެ. އެކަމަނާ ތަހުތުގައި އިންނަވާތާ 70 އަހަރު ވެއްޖެ އެވެ.
