ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)ގެ ސްކޫލް އޮފް މެޑިސިންގައި ކިޔަވަމުންދާ ދަރިވަރުންތަކަކަށް ބުލީ ކުރި މައްސަލައެއް ބަލަން ފަށައިފި އެވެ.
އެމްއެންޔޫ އިން ބުނީ މެޑިސިން ސްކޫލްގައި ކިޔަވާ ދަރިވަރުންތަކަކަށް ބުލީ ކުރާ މައްސަލައެއް ޔުނިވަސިޓީގެ ވައިސް ޗާންސެލަރަށް މިދިޔަ ބުރާސްފަތި ދުވަހި ހުށަހަޅާފައިވާ ކަމަށެވެ.
ބުލީ ކުރުމަކީ ދަރިވަރުންގެ ކޯޑް އޮފް ކޮންޑަކްޓްގައި މަނާ ކަމަކަށް ވުމާއެކު އެކަން ޔުނިވާސިޓީގެ މައްސަލަ ބަލާ ކޮމިޓީއަކުން ބަލަމުން އަންނަ ކަމަށް ވެސް އެމްއެންޔޫން ބުންޏެވެ.
"މައްސަލަ ނިމުނުހާ އަވަހަކަށް މިކަން ހިނގި ގޮތް ދަރިވަރުންނާ ހިއްސާކޮށް އަޅަން ޖެހޭ ފިޔަވަޅު އަޅާނެ،" އެމްއެންޔޫން ބުންޏެވެ.
އެމްއެންޔޫގެ މެޑިސިން ސްކޫލްގެ ފުރަތަމަ ބެޗްގައި ކިޔަވާ އަންހެން ދަރިވަރަކު ރޭ ކުރި ޓްވީޓުތަކެއްގައި ބުނީ އޭނައާ އޭނާގެ އެންމެ ގާތް އެކުވެރިޔާއަށް ބުލީ ކުރާ މައްސަލަ ޑީންގެ ސަމާލުކަމަށް އެތައް ފަހަރަކު ގެނައި ނަމަވެސް އެކަމަށް އަޅާލާފައި ނުވާ ކަމަށެވެ.
އެކަން ހިނގާތާ މިހާރު ދެ އަހަރު ވެދާނެ ކަމަށާއި ކޮންމެ ފަހަރަކު ވެސް، ބުލީކުރާ މީހުން ރައްކާތެރިކޮށްދީފައިވާ ކަމަށް ވެސް އޭނާ ބުނެފައިވެ އެވެ. ބުލީ ކުރަނީ ވެސް އެ ސްކޫލުގައި ކިޔަވަަމުންދާ ދަރިވަރެއް ކަމަށްވެސް އެ ޓްވީޓްގައިވެ އެވެ.
ތަހުގީގު މަރުހަލާ ނިމެންދެން އެކަމާ ގުޅިގެން މައްސަލަ އޮޅޭގޮތަށް ވާހަކަ ނުފެތުރުމަށް ވެސް އެމްއެންޔޫން ވަނީ އެދިފަ އެވެ.
