ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ އެތެރޭގެ އިންތިހާބުގެ ޕާލަމެންޓަރީ ގުރޫޕުގެ ލީޑަރުކަމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް މިއަދު އިންތިހާބުކޮށްފި އެވެ.
ރައްޔިތުންގެ މަޖިލީހުގެ މެޖޯރިޓީ ލީޑަރުކަމަށް އަސްލަމާއެކު ވާދަކުރެއްވީ މިހާރު ވެސް އެ މަގާމުގައި ހުންނެވި މެދު ހެންވޭރު ދާއިރާގެ މެމްބަރު އަލީ އާޒިމެވެ.
ޖުމްލަ 65 މެމްބަރުން ތިބޭ އެމްޑީޕީ ޕީޖީ ގުރޫޕުގެ މަގާމުތަކަށް މެމްބަރުން ހޮވަން މިއަދު ބޭއްވި އިންތިހާބުގައި ޕީޖީ ލީޑަރުކަމަށް އަސްލަމް ހޮވިވަޑައިގެންނެވީ 40 މެމްބަރުންގެ ވޯޓުންނެވެ.
އާޒިމަށް ލިބިވަޑައިގެންނެވީ 25 ވޯޓެވެ.
ޑެޕިޔުޓީ ޕީޖީ ލީޑަރުކަމަށް ދެ ބޭފުޅުން އިންތިހާބުކުރަންޖެހޭއިރު، އެ މަގާމަށް ތިން ބޭފުޅަކު ކުރިމަތިލެއްވި އެވެ.
އޭގެ ތެރެއިން 49 މެމްބަރުންގެ ވޯޓާއެކު އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން އިންތިހާބުވެފައިވާއިރު، ދެން ތިއްބެވި ދެ ބޭފުޅުންގެ ވޯޓު ވަނީ އެއްވަރުވެފަ އެވެ.
ހެންވޭރު ދެކުނު ދާއިރާގެ މެމްބަރު ހުސެއިން ޝަހީމާއި ހުޅުދޫ ދާއިރާގެ މެމްބަރު އިލްޔާސް ލަބީބަށް ވެސް ލިބިވަޑައިގެންނެވީ 34 ވޯޓެވެ.
އެހެންކަމުން އެ މަގާމަށް ބޭފުޅަކު އައްޔަނުކުރަން ދެވަނަ ފަހަރަށް ވޯޓެއް ނަގަންޖެހޭނެ އެވެ.
މިއަދު ބޭއްވި އިންތިހާބުގައި އަމީންއާންމުގެ މަގާމަށް ފުވައްމުލަކު މެދު ދާއިރާގެ ހުސެއިން މުހައްމަދު ދީދީ އާއި ޑެޕިޔުޓީ އަމީން އާންމުގެ މަގާމަށް ފޭދޫ ދާއިރާގެ މެމްބަރު މުހައްމަދު ނިހާދު ވެސް ވަނީ އިންތިހާބުވެފަ އެވެ.
އެމްޑީޕީގެ ޗީފް ވިޕްގެ މަގާމަށް ތިނަދޫ އުތުރު ދާއިރާގެ މެމްބަރު އަބްދުލް މުޣުނީ އިންތިހާބުވެފައިވަނީ 34 ވޯޓާއެކު އެވެ. އެ މަގާމަށް ދެން ވާދަކުރެއްވި މަކުނުދޫ ދާއިރާގެ މެމްބަރު މުހައްމަދު ރާއީއަށް ލިބިވަޑައިގެންނެވީ 31 ވޯޓެވެ.
އެމްޑީޕީގެ ޕާލިމެންޓްރީ ގްރޫޕުގެ އިންތިހާބު މިއަދު ބާއްވާފައިވާއިރު އަންނަ އޭޕްރިލް 16 ގައި ޗެއާޕާސަންގެ އިންތިހާބުގެ އިތުރުން އަންހެނުންގެ ރޫހާއި ޒުވާނުންގެ ހިތްވަރުގެ އިންތިހާބު ބާއްވަން ވަނީ ނިންމާފަ އެވެ.
