ޑިސްކޯ ޓިއުންތަކާއި މުޅިން ތަފާތު ފެޝަން ސްޓައިލްގެ ސަބަބުން މަގްބޫލުކަން ހޯދާފައިވާ އިންޑިއާގެ މިއުޒިކް ކޮމްޕޯޒަރު ބައްޕި ލަހިރީ އުމުރުން 69 އަހަރުގައި މަރުވެއްޖެ އެވެ.
އޭނާ މަރުވި ސަބަބާ ގުޅޭ މައުލޫމާތެއް އަދި އާއްމުވެފައެއް ނުވެ އެވެ. މިދިޔަ އަހަރުގެ އޭޕްރިލް މަހު ލަހިރީއަށް ކޮވިޑް ޖެހި، އެ ބަލިން ފަސޭހަވި އެވެ.
މިދިޔަ ސެޕްޓެމްބަރު މަހު ލަހިރީ ބުނީ "ހާލު ރަނގަޅު" ކަމަށާއި އޭނާގެ ސިއްހީ ހާލަތާ ގުޅޭ ދޮގު މައުލޫމާތު ފެތުރޭތީ "ދެރަވާ" ކަމަށެވެ.
އޭނާ މަރުވީ ބުދަ ދުވަހު މުމްބާއީ ސިޓީގެ ހޮސްޕިޓަލެއްގަ އެވެ.
ގިނަ ބަޔަކު ލޯބިން "ބައްޕި ޑާ" ގެ ނަމުން މުހާތަބު ކުރާ ލަހިރީ ވަނީ ގިނަ ހިޓް ފިލްމުތަކަކަށް މިޔުޒިކް ކޮމްޕޯޒްކޮށްފަ އެވެ. އެގޮތުން ޑިސްކޯ ޑާންސާ، ހިންމަތުވާލާ، ޝަރާބީ، އެޑްވެންޗާޒް އޮފް ޓާޒަން، ޑާންސް ޑާންސް، ސަތްޔަމޭވް ޖަޔަތޭ އަދި ޝޯލާ އޯރް ޝަބްނަމް ފާހަގަކުރެވެ އެވެ.
ނަމަވެސް ގިނަ މީހުންނަށް އޭނާގެ އެންމެ އަޅައިގަންނަ ކަމަކަށް ވީ ގެންގުޅުނު ތަފާތު ފެޝަން ސްޓައިލެވެ. އެގޮތުން ގިނަ އަދަދެއްގެ ރަން ފަށާއި ކެވެލި އެޅުމަކީ އޭނާގެ ސްޓައިލެވެ.
ދެހާސް ސޯޅަ ވަނަ އަހަރު ލަހިރީ ދިން އިންޓަވިއުއެއްގައި ބުނީ އޭނާ ރަނަށް އެހާ ގަޔާވަނީ އެމެރިކާގެ ރޮކް ތަރި އެލްވިސް ޕްރެސްލީއަށް އޮންނަ ލޯތްބެއްގެ ސަބަބުން ކަމަށެވެ.
