ބޭހާ ފާމަސީތަކުން ވިއްކާ އެކި އުފެއްދުންތަކުން ދުނިޔޭގެ ކޯރުތައް ތަގައްޔަރުވެ، ތިމާވެއްޓާއި އިންސާނުންގެ ސިއްހަތަށް ނުރައްކާ އެބަ އޮތް ކަމަށް ދިރާސާއަކުން ދައްކައިފި އެވެ.
ޔުނިވާސިޓީ އޮފް ނިއު ޔޯކުން ހެދި ދިރާސާއިން ދެއްކި ގޮތުގައި ކޯރުތަކުން އެންމެ ގިނައިން ފެނިފައި ވަނީ ޕެރެސެޓަމޯލް، ނިކޮޓީން، ކެފެއިން އަދި އެޕިލެޕްސީ އާއި ހަކުރު ބައްޔަށް ބޭނުން ކުރާ ބޭސްތަކެވެ.
މިއީ ދުނިޔޭގެ ފެންވަރެއްގައި ކޯރުތަކުގެ ފެން މިގޮތަށް ޓެސްޓުކޮށް އެންމެ ފުޅާކޮށް ހެދި ދިރާސާ އެވެ.
އެންމެ ބޮޑަށް ތަގައްޔަރުވެފައި ވަނީ ޕާކިސްތާނާއި، ބޮލީވިއާ އަދި އިތިއޯޕިއާގެ ކޯރުތަކެވެ. އަދި އެންމެ ކުޑަކޮށް ތަގައްޔަރުވެފައި ވަނީ އައިސްލޭންޑް، ނޯވޭ އަދި އެމޭޒަން ޖަންގަލީގެ ކޯރުތަކެވެ.
ބޭހުގެ ކޮމްޕައުންޑް ކޯރުގެ ފެނުގައި ހުރުމުން ކުރާނެ ސީދާ އަސަރާއި އޭގެ ބޮޑުމިން އަދި ވަޒަންކުރެވިފައެއް ނުވެ އެވެ.
ނަމަވެސް ކުރިން ހަދާފައިވާ ދިރާސާތަކުން ދައްކާ ގޮތުގައި އިންސާނުންގެ ދޭތެރެ ދޫކުރާ ބޭހުގެ ކޮމްޕައުންޑްތައް ފެނުގައި ހުންނަ ނަމަ، މަސްތަކުގެ ދަރިމައިވުމަށް އަސަރު ކުރެ އެވެ.
ސައިންސްވެރިން އެންމެ ކަންބޮޑުވާ މައްސަލައަކީ ކޯރުތަކުގައި އެންޓިބަޔޮޓިކްސްގް ކޮމްޕައުންޑް އިތުރުވާ ނަ،ަ އިންސާނުން އެ ބޭސްތަކަށް ނުގުޑުމުގެ މައްސަލަ ދިމާވުމެވެ.
ދިރާސާ ހަދާފައި ވަނީ 100 އަށް ވުރެ ގިނަ ގައުމުގެ 1000 އަށް ވުރެ ގިނަ ސައިޓުން ފެނުގެ ސާމްޕަލް ނަގައިގެން ޓެސްޓުކޮށްގެންނެވެ.
ޓެސްޓު ކުރި 258 ކޯރުގެ ތެރެއިން 25 ޕަސެންޓަށް ވުރެ ގިނަ ކޯރުން "އެކްޓިވް ފާމަސޫޓިކަލް އިންގްރީޑިއަންޓްސް" ފެނުނެވެ. އެއީ ފެނުގެ ދިރުންތަކަށް ނުރައްކާ މިންވަރަކަށެވެ.
"މިކަން ވާ ގޮތަކީ، ކެމިކަލް އަޅައިގެން ހަދާފައި ހުންނަ ބޭސް ކެއުމުން، އޭގެން އަޅުގަނޑުމެންނަށް އަސަރުތަކެއް ކުރަނީ. ދެން ހަށިގަނޑުން ނުކުމެގެން ދަނީ،" ދިރާސާގައި އިސްކޮށް އުޅުނު ޑރ. ޖޯން ވިލްކިންސަން ބީބީސީއަށް ވިދާޅުވި އެވެ.
"އަޅުގަނޑުމެންނަށް އެނގޭ ކަމަކީ އެންމެ ޒަމާނީ ނަރުދަމާގެ ނިޒާމަށް ވެސް މި ކޮމްޕައުންޑްތައް އެއްކޮށް ނައްތާނުލެވޭކަން. އެހެންވީމާ، އެ ތަކެތި މި ދަނީ ކޯރާއި އެހެން ފެންގަނޑުތަކަށް."
