ޓޫރިސްޓެއްގެ ގޮތުގައި މީގެ 50 އަހަރު ކުރިން އެންމެ ފުރަތަމަ ރާއްޖެ އައި ކުޑަކުއްޖާ ޖޯޖިއާ ކޯބިން ހަޔާތުގައި ދެވަނަ ފަހަރަށް މިއަދު ރާއްޖެ އަތުވެއްޖެ އެެވެ.
ޖޯޖިއާ ކޯބިންއަކީ ރާއްޖެ އަށް ޓޫރިޒަމް ތައާރަފު ކުރެއްވި އިޓަލީގެ ޖޯޖް ކޯބިންގެ އަންހެން ދަރިފުޅެވެ. ޖޯޖިއާ އެންމެ ފުރަތަމަ ރާއްޖެ އައީ 1972 ވަނަ އަހަރުގެ ފެބްރުއަރީ 16 ވަނަ ދުވަހު އިޓަލީން ރާއްޖެ އައި ޓުއާ ގްރޫޕާ އެކު، ބައްޕައާ އެކުގަ އެވެެ. އެ ދަތުރުގައި އޭނާ މާލޭގައި މަޑުކުރީ ހ. މާގިރީގަ އެވެ. މިހާރު އެއީ ޓޫރިސްޓު ހޮޓަލެކެވެ.
"އޭރު ދެ އަހަރު، ކިހިނެތް ހަދާން ހުންނަނީ؟ އޭގެ ފަހުން ބޭބެމެން އަޔަސް އަހަރެން ނާންނަން، މި ފަހަރު މިއައީ ބައްޕަ އާއެކު މީގެ ފަންސާސް އަހަރު ކުރިން އައިސް ހުރި ގެ އާއި ދިޔަ ތަންތަން ބަލާލަން،" ޖޯޖިއާ މިއަދު 'އަދަދު' އަށް ދިން އިންޓަވިއު އެއްގައި ބުންޏެވެ.
ޖޯޖިއާ ކޯބިން (މ) އަދި ޖޯޖް ކޯބިން ހެލްތު މިނިސްޓަރު އަހުމަދު ނަސީމު އާ ވެލާނާ އިންޓަނެޝަނަލް އެއާޕޯޓުގައި މިއަދު ބައްދަލު ކުރައްވަނީ
ޖޯޖިއާ ބުނި ގޮތުގައި ކުރީގެ ހަދާނަކަށް ރާއްޖެއާ ބެހޭ ގޮތުން ހުރީ ބައްޕަ އާ އެކު ރާއްޖޭގައި ނަގާފައިވާ ފޮޓޯތަކާއި ފުރަތަމަ ދަތުރުރާ ބެހޭ ގޮތުން ބައްޕަ ކިޔާ ދެއްވާފައިވާ ވާހަކަތަކެެވެ. ޖޯޖިއާގެ ބައްޕައަކީ ކަނޑު އަޑީގެ ފޮޓޯތައް ނަންގަވާ އެޑްވެންޗާ ޓޫރިޒަމްއަށް ލޯބި ކުރާ ބޭފުޅެކެވެ.
ޖޯޖިއާ އާ ޖޯޖް ކޯބިން ވެލާނާ އިންޓަނެޝަނަލް އެއާޕޯޓުން ސީދާ ދިޔައީ އެންމެ ފުރަތަމަ ވެސް ދެ ބޭފުޅުން ތިއްބެވި ގެއަށް، މާގިރި ހޮޓަލަށެެވެ.
ޖޯޖިއާ ބުނި ގޮތުގައި ރާއްޖޭގެ ޓޫރިޒަމަށް 50 އަހަރު ފުރުން ފާހަގަ ކުރުމަށް ބައްޕައަށް ލިބުނު ދައުވަތުގައި ކޮންމެހެން ވެސް ބައިވެރިވާން ބޭނުންވީ، ރާއްޖެއަށް ޓޫރިޒަމް ތައާރަފު ކުރުމަށް ބައްޕަ ކުރެއްވި މަސައްކަތާއި ބައްޕަ ކުރެއްވި ތަޖުރިބާގެ ހަދާންތައް ބަލާލަން ބެނުންވާތީ އެވެެ.
"ރިސޯޓެއްގައި މަޑު ކުރާކަށް ނޫން ބޭނުމީ، ބޭނުމީ މީގެ 50 އަހަރު ކުރިން ބައްޕަ ދިޔަ ތަންތަނަށް ގޮސް ދިވެހިންނާ ބައްދަލުވާން، ދިވެހިންނާ ވާހަކަ ދައްކަން," ޖޯޖިއާ ހުރީ ޓޫރިޒަމް މިނިސްޓްރީން ބައްޕައަށް ދައުވަތު ދިނުމުން ވަރަށް އުފާވެފަ އެވެ.
ކޯބިން، ދިވެހިނާއި ބެހޭ ގޮތުން ޖޯޖިއާއަށް ބުނެދީފައި ވަނީ ދިވެހިންނަކީ ވަރަށް ހިތްހެޔޮ ރަނގަޅު ބައެއް ކަމަށެވެ. ޖޯޖިއާ ދިވެހިންނާ އެހާ ބޮޑަށް ބައްދަލުކުރަން ބޭނުންވަނީ އެހެންވެ އެވެެ.
ކޯބިން ވިދާޅުވި ގޮތުގައި ހޮޓަލަށް ދިއުމަށްފަހު އެންމެ ފުރަތަމަ ކުރަން ބޭނުންވާ ކަމަކީ، ޖޯޖިއާއަށް މާލޭގެ މަސް މާރުކޭޓާ ތަންތަން ދައްކާލަން ދިއުމެވެ.
"އެންމެ ފުރަތަމަ ވެސް ދާނީ ޖޯޖިއާއަށް މަސް މާރުކޭޓު ދައްކާލަން، ކުރިން މާލެއަކީ ވަރަށް ހަމަ ހިމޭން ތަނެއް، މިހާރު މިއޮތީ ވަރަށް ބޮޑަށް ބަދަލުވެފައި،" ކޯބިން ވިދާޅުވި އެވެ.
ރާއްޖޭގެ ޓޫރިޒަމަށް ފަންސާސް އަހަރު ފުރުން ފާހަގަ ކުރާއިރު، ޖޯޖިއާ އާއި ކޯބިން އެކުގައި ރާއްޖެ އައި ދުވަހަކީ، ރާއްޖެ އަށް އެންމެ ފުރަތަމަ ޓޫރިސްޓު ގްރޫޕް އައި ރާއްޖެގެ ޓޫރިޒަމްގައި މުހިންމު ދުވަހެވެ. މާލޭގެ ތިން ގެއެއްގައި މަޑުކުރި އެ ގްރޫޕުގައި ގިނައިން ހިމެނުނީ ނޫސްވެރިންނެވެ. އޭގެ 50 އަހަރު ފަހުން އެ ދެބޭފުޅުން އެކުގައި ރާއްޖެ ވަޑައިގަތުމަކީ ދިވެހިންނަށް ލިބޭ ފަހުރެކެވެ.
