ބޮލީވުޑްގެ މަގްބޫލު ބަތަލާ ސޯނަމް ކަޕޫރްގެ ފިރިމީހާ އަދި ވިޔަފާރިވެރިޔާ އާނަންދް އަހޫޖާ ޓެކްސްއަށް މަކަރު ހެދި ކަމަށް ބައިނަލްއަގްވާމީ ޝިޕިން ކުންފުނި މައިޔޫއެސް އިން ތުހުމަތުކޮށްފި އެވެ.
މިދިޔަ މަހު އަހޫޖާ ވަނީ އެ ކުންފުނީގެ ހިދުމަތް ކަމުނުދާ ކަމަށް ބުނެ ޓްވީޓުކޮށްފަ އެވެ. އެގޮތުން ސަބަބެއް ނެތި މުދާ ހިފެހެއްޓުމާއި، ރަސްމީ ލިޔުންތައް ބަލައިނުގަތުން ފަދަ ކަންކަން ދިމާވާ ކަމަށް ބުންޏެވެ.
ސޯނަމް ކަޕޫރް ވެސް ބުނެފައި ވަނީ ކުންފުންޏަކުން ކަސްޓަމަރުންނަށް ފޯރުކޮށްދޭ ހިދުމަތް ގޯސްވުމަކީ ލަދުގަންނަން ޖެހޭ މައްސަލައެއް ކަމަށެވެ.
ނަމަވެސް މައިޔޫއެސް އިން ކުރި ޓްވީޓުތަކެއްގައި ބުނީ މައްސަލަ ދިމާވީ ހިދުމަތް ގޯސްވެގެން ނޫން ކަމަށާއި މިއީ ޓެކްސްއަށް މަކަރު ހަދަން އުޅުމުން ޖެހުނު މައްސަލައެއް ކަމަށެވެ.
"އަހޫޖާ އީބޭއިން ގަތް ބޫޓުގެ އަގު ނުބައިކޮށް ހުށަހެޅީ ޓެކްސް އާއި ޑިއުޓީ މަދުން ދެއްކުމުގެ މަގްސަދުގައި،" އެ ކުންފުނިން ބުންޏެވެ.
އޭގެ އިތުރުން އަހޫޖާ ހުށަހެޅީ ފޭކު ލިޔުންތަކެއް ކަމަށާއި އަސްލު އަގަށް ވުރެ 90 ޕަސެންޓު ކުޑަކޮށް އަގުތައް ޖަހާފައި ހުރި ކަމަށް ވެސް އެ ކުންފުނިން ތުހުމަތު ކުރި އެވެ.
"ބައިނަލްއަގްވާމީ ޝިޕްމަންޓް ފޮނުވާއިރު، ސައްހަ މައުލޫމާތު ބޭނުންކުރުމަކީ އަޅުގަނޑުމެންގެ ގާނޫނީ ޒިންމާ. މައިޔޫއެސް އާއި އަހޫޖާ ވެސް ބައިނަލްއަގްވާމީ އެކްސްޕޯޓާ ގުޅޭ ގަވާއިދަށް ބޯލަނބަން ޖެހޭނެ. މި ކުންފުނިން މަސައްކަތް ކުރާނީ އެގޮތަށް."
ނަމަވެސް އަހޫޖާ ބުނީ އެއީ "އަގު ވައްޓާލަން ކުރާ" ދޮގު ތުހުމަތެއް ކަމަށާއި މައިޔޫއެސްއާ އެކު ދެން ވިޔަފާރި ނުކުރާނެ ކަމަށެވެ.
ސޯނަމް އާއި އަހޫޖާ ކައިވެނި ކުރީ 2018 ވަނަ އަހަރު އެވެ. އެ ދެ މީހުން ދިރިއުޅެނީ ލަންޑަންގަ އެވެ. ސޯނަމް ދެން އެންމެ އަވަހަށް ފެންނާނީ ތްރިލާ ފިލްމު "ބްލައިންޑް" އިންނެވެ.
