އިންގްލޭންޑުގެ އިރުމަތީގެ ލުޓޮން އެންޑް ޑަންސްޓެބަލް ހޮސްޕިޓަލުގައި ލަސާ ހުމަށް ފަރުވާ ކުރަނިކޮށް މީހަކު މަރުވެއްޖެ އެވެ.
ޔޫކޭ ހެލްތު ސެކިއުރިޓީ އެޖެންސީ (ޔޫކޭއެޗްއެސްއޭ) އިން ބުނީ މަރުވި މީހާއަށް ފަރުވާ ކުރަމުން ދިޔައީ ޖަނަވާރުގެ ސަބަބުން އިންސާނުންނާ ހަމައަށް ފޯރާ ލަސާ ހުމަށް ކަމަށެވެ. މި ބައްޔަކީ ދޭތެރެ ދޭތެރެއިން ހުޅަނގު އެފްރިކާގެ ހިސާބުތަކުގައި ފެތުރޭ ބައްޔެކެވެ.
"އާއްމުންނަށް އޮތް ނުރައްކާ ވަރަށް ކުޑަ" ކަމަށް ޔޫކޭއެޗްއެސްއޭއިން ބުންޏެވެ.
ލަސާ ހުން ޖެހިގެން އިނގިރޭސިވިލާތުން އެކަކު މަރުވެފައިވާ އިރު، ދާދި ފަހުން އެ ގައުމުން ވަނީ މި ހުމުގެ ތިން ކޭސް ފެނިފަ އެވެ.
ޔޫކޭއެޗްއެސްއޭގެ ޗީފް މެޑިކަލް އެޑްވައިޒަރު ޑރ. ސޫޒަން ހޮޕްކިންސް ވިދާޅުވީ ތިން ކޭސް ވެސް ނިސްބަތް ވަނީ އެއް އާއިލާއަކަށް ކަމަށާއި އެ އެންމެން ވެސް ވަރަށް ފަހުން ހުޅަނގު އެފްރިކާއަށް ދަތުރު ކުރި ކަމަށެވެ.
މިއީ 10 އަހަރުގެ ތެރޭގައި މި ބަލީގެ ކޭސްތަކެއް އިނގިރޭސިވިލާތުން ފެނުނު ފުރަތަމަ ފަހަރެވެ. އެންއެޗްއެސް އިރުމަތީ އިންގްލޭންޑުން ވަނީ "ސަރަހައްދީ ބޮޑު ހާދިސާއެއް" ހިނގާފައިވާ ކަމަށް ކަނޑައަޅާފަ އެވެ.
ބީބީސީން ބުނީ އެގޮތަށް ކަނޑައެޅީ ލަސާ ހުން ޖެހުނު ދެ މީހަކު ލަންޑަންގެ ހޮސްޕިޓަލަކަށް ބަދަލު ކުރުމުގެ ކުރިން ކެމްބްރިޖުގައި ހުންނަ އެޑެންބްރޫކް ހޮސްޕިޓަލުގައި ފަރުވާދީފައި ވާތީ އެވެ.
"ޔޫކޭއެޗްއެސްއޭގެ އިލްތިމާސަކީ ބަލި މީހުންނަށް ފަރުވާ ދިން ހޮސްޕިޓަލްތަކުގެ ބައެއް ސްޓާފުން ޓެސްޓުކޮށް، ޕީޕީއީ ލައިގެން އުޅުން،" އެންއެޗްއެސް އިން ނެރުނު ބަޔާނެއްގައި ބުންޏެވެ.
"ބަލި މީހުންނާ ސީދާ ކޮންޓެކްޓުވި ސްޓާފުން މުއްދަތެއް ވަންދެން އައިސޮލޭޓް ވާން ޖެހޭނެ."
މިހާރު ޔަގީންވެފައިވާ ތިން ކޭސްގެ ކުރިން 1980 ވަނަ އަހަރުގެ ފަހުން އިނގިރޭސިވިލާތުން މި ބަލީގެ އަށް ކޭސް ފެނިފައިވެ އެވެ.
ލަސާ ހުމަކީ އެބޯލާ އާއި މާބާގް ވައިރަހުގެ އާއިލާއަށް ނިސްބަތްވާ ހުމެކެވެ. ނަމަވެސް މިއީ އެ ދެ ބައްޔަށް ވުރެ ނުރައްކާ ކުޑަ ބައްޔެކެވެ.
ލަސާ ހުން ފެތުރެނީ މީދަލުގެ ނަޖިހުގެ ސަބަބުންނާއި ބަލި ޖެހިފައިވާ މީހެއްގެ ގައިންނެވެ.
ބަލި ޖެހޭ ގިނަ މީހުންގެ އެއްވެސް އަލާމާތެއް ނުފެނުނު ނަމަވެސް ފަސްބައިކޮށްފައި އެއްބައި ކޭސްތަކުގައި ބަލި ޖެހޭ މީހުންގެ ގައިން އާދަޔާ ހިލާފަށް ގިނައިން ލޭ އައިސް، ގުނަވަންތައް ފެއިލްވެ އެވެ.
ކޮންމެ އަހަރަކު ވެސް ކުރީކޮޅު މި ހުން ނައިޖީރިއާއިން ފެނެ އެވެ. ސައިންޓިސްޓުން ބުނާ ގޮތުގައި އެކަން ގުޅިފައި ވަނީ ވާރޭ ނުވެހި ގިނަ ދުވަސްވުމާ އެވެ.
ބަލި ފަތުރާ ވައިރަހަށް ލަސާގެ ނަން ދިނީ އެ ވައިރަސް އެންމެ ފުރަތަމަ ފެނުނީ 1969 ވަނަ އަހަރު އުތުރު ނައިޖީރިއާގެ ލަސާ އަވަށުން ކަމަށް ވާތީ އެވެ.
